ກອງປະຊຸມ ຄະນະເຈົ້າໜ້າທີ່ອາວຸໂສ ດ້ານໂທລະຄົມມະນາຄົມ - ສະພາດັດສົມໂທລະຄົມ 2017 ແລະ ກອງປະຊຸມປິ່ນອ້ອມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 53 ຄັ້ງ | ເວ​ລາ | 2024-12-22 00:00:00

ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປັນເຈົ້າພາບຈັດກອງປະຊຸມ ຄະນະເຈົ້າໜ້າທີ່ອາວຸໂສ ດ້ານໂທລະຄົມມະນາຄົມ - ສະພາດັດສົມໂທລະຄົມ 2017 ແລະ ກອງປະຊຸມປິ່ນອ້ອມ (TELSOM-ATRC Joint Working Group 2017 and Related Meeting with Dialogue Partner) ຕາມຮອບວຽນຂອງອາຊຽນຂຶ້ນ ໃນລະຫວ່າງວັນທີ 09-11 ພຶດສະພາ 2017, ທີ່ ໂຮງແຮມແລນມາກ, ນະຄອນຫຼວງວຽງຈັນ. ພາຍໃຕ້ການເປັນປະທານຂອງເຈົ້າໜ້າທີ່ອາວຸໂສໂທລະຄົມມະນາຄົມ ບຣູໄນ, ໃຫ້ກຽດກ່າວເປີດກອງປະຊຸມໂດຍ ຫົວໜ້າກົມແຜນການ ແລະ ການຮ່ວມມື (ກຜຮ), ກະຊວງ ປທສ, ເຈົ້າໜ້າທີ່ອາວຸໂສໂທລະຄົມມະນາຄົມ ສປປ ລາວ ໃນນາມເປັນຈຸດປະສານງານດ້ານວຽກງານໂທລະຄົມມະນາຄົມ ແລະ ໄອຊີທີ (ICT) ຂອງ ສປປ ລາວ ໃນອາຊຽນ. ຊຶ່ງມີຜູ້ເຂົ້າຮ່ວມຈາກບັນດາປະເທດສະມາຊິກອາຊຽນ ແລະ ຕາງໜ້າຈາກປະເທດຄູ່ຮ່ວມເຈລະຈາ ເປັນຕົ້ນແມ່ນ: ສປ. ຈີນ, ຍີ່ປຸ່ນ, ສ. ເກົາຫຼີ, ອິນເດຍ, ສະຫະພາບເອີຣົບ, ອາເມລິກາ ແລະ ອົງການສະຫະພາບໂທລະຄົມມະນະຄົມສາກົນ (ITU), ພະນັກງານຫຼັກແຫຼ່ງພາຍໃນກະຊວງ ປທສ ແລະ ຜູ້ໃຫ້ບໍລິການດ້ານໂທລະຄົມມະນາຄົມ.

               ໃນກອງປະຊຸມແມ່ນມີຫຼາຍວາລະທີ່ສຳຄັນ ຄື: (1) ຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດບັນດາແຜນງານ ແລະກິດຈະກຳໃນສົກປີ 2017; (2) ປຶກສາຫາລືກ່ຽວກັບ ແຜນງານ ແລະ ກິດຈະກຳສຳລັບສົກປີ 2018. ໂດຍໃນນັ້ນຈະມີວາລະສຳຄັນໃນການມາຜ່ານບັນດາໂຄງການທີ່ບັນດາປະເທດສະມະຊິກສະເໜີເພື່ອເຮັດຮ່ວມກັນອີງຕາມແຜນແມ່ບົດອາຊຽນ ໄອຊີທີ, ຊຶ່ງລວມມີ ໂຄງການຂອງ ກະຊວງ ປທສ; (3) ປຶກສາຫາລື ແລະ ຮັບຟັງການລາຍງານຜົນຂອງການຮ່ວມມືກັບບັນດາປະເທດຄູ່ຮ່ວມມື ໃນສົກປີ 2017 ແລະ ຄົ້ນຄ້ວາການສະເໜີແຜນການຮ່ວມມື ສຳລັບສົກປີ 2018.

               ເວົ້າລວມແລ້ວ ຈຸດປະສົງຂອງການລວມຕົວກັນຂອງ 10 ປະເທດໃນອາຊຽນໃນຄັ້ງນີ້, ແມ່ນເພື່ອການຮ່ວມກັນສ້າງຄວາມເຂັ້ມແຂງທາງດ້ານເສດຖະກິດ ທີ່ສາມາດເຊື່ອມໂຍງເຂົ້າຫາເສດຖະກິດໂລກ. ຍຸດທະສາດລວມໃນແຜນແມ່ບົດ ຂອງການເຊື່ອມຈອດ ASEAN 2025 ໂດຍລວມມີ 5 ຂົງເຂດຄື: ການພັດທະນາພື້ນຖານໂຄງລ່າງແບບຍືນຍົງ, ນະວັດຕະກຳດີຈີຕອນ, ການຂົນສົ່ງທີ່ສະດວກສະບາຍ, ລະບຽບການຄຸ້ມຄອງທີ່ເປັນເລີດ ແລະ ການໄປມາຫາສູ່ກັນທີ່ສະດວກສະບາຍ. ຊຶ່ງວຽກງານໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ ຫຼື ໄອຊີທີ (ICT) ກໍ່ມີການຂະຫຍາຍຕົວຢ່າງວ່ອງໄວ, ຕິດພັນກັບການພັດທະນາ ແລະນອນຢູ່ໃນທຸກຂະແໜງການ. ດັ່ງນັ້ນ, ວຽກງານ ICT ຈຶ່ງຖຶກວາງໃນແຜນແມ່ບົດການເຊື່ອມໂຍງພື້ນຖານໂຄງລ່າງຂອງອາຊຽນ (ASEAN) ເພື່ອການເຊື່ອມຈອດ ASEAN 2025 ຫຼື ເອີ້ນວ່າ: “ASEAN Connectivity” ເປັນພື້ນຖານໃນການຊຸກຍູ້, ພັດທະນາເສດຖະກິດດິຈິຕອນ ໃຫ້ມີການຂະຫຍາຍຕົວແບບຍືນຍົງ, ມີຄວາມປອດໄພທາງດ້ານຂໍ້ມູນຂ່າວສານ ແລະ ເພື່ອສະໜັບສະໜຸນການເຊື່ອມໂຍງປະຊາຄົມອາຊຽນ. ສຳລັບ ສປປ ລາວຂອງພວກເຮົາແລ້ວ ກໍ່ແມ່ນກະຊວງ ປທສ ເປັນຜູ້ຕາງໜ້ານຳພາຈັດຕັ້ງປະຕິບັດ AIM 2020 ແລະລວມທັງເປັນຜູ້ປະສານງານໃນອາຊຽນສຳລັບຂົງເຂດວຽກງານດັ່ງກ່າວ. ຊຶ່ງການດຳເນີນບັນດາກິດຈະກຳ ແລະດຳເນີນແຜນວຽກ AIM2020 ຂອງພວກເຮົາບໍ່ແມ່ນຈະມີແຕ່ພາກລັດ ເທົ່ານັ້ນ ແຕ່ຍັງໄດ້ມີການຊຸກຍູ້ການມີສ່ວນຮ່ວມຂອງພາກທຸລະກິດ ທີ່ສະແດງໃຫ້ເຫັນໃນບັນດາການເຄື່ອນໄຫວວຽກງານຂອງພວກເຮົາເຊັ່ນ: ງານປະກວດຜະລິດຕະພັນດ້ານ ICT ໃນລະດັບປະເທດ ແລະຂອງອາຊຽນ ທີ່ຈັດເປັນປະຈຳທຸກປີ, ການຝຶກອົບຮົມ, ບັນດາວຽກງານເຜີຍແຜ່ ໃຫ້ຄວາມຮູ້ ແກ່ສັງຄົມ ແລະ ວາລະສານໄອຊີທີ.

                ສະນັ້ນ, ການຈັດກອງປະຊຸມໃນຄັ້ງນີ້ ຈຶ່ງມີຄວາມໝາຍຄວາມສໍາຄັນ ໂດຍສະເພາະ ແມ່ນເປັນການຮັດແໜ້ນສາຍພົວພັນຮ່ວມມືກັບສາກົນ ຂອງ ສປປ ລາວ ແລະ ຍັງເປັນການປະຕິບັດພັນທະທີ່ມີຕໍ່ກັບອາຊຽນ, ເພາະເປັນເວທີໜຶ່ງ ທີ່ແຕ່ລະປະເທດ ສະມາຊິກອາຊຽນ ແລະ ປະເທດຄູ່ຮ່ວມເຈລະຈາ ຈະໄດ້ປຶກສາຫາລື ແລະ ແລກປ່ຽນຄໍາຄິດເຫັນນໍາກັນ ໃນວຽກງານ ໄອຊີທີ ເພື່ອໃຫ້ເກີດປະໂຫຍດສູງສຸດໃຫ້ແກ່ພາກພື້ນອາຊຽນ. ໂດຍໄລຍະຜ່ານມາ ອາຊຽນກໍ່ໄດ້ຮ່ວມມືກັບປະເທດຄູ່ຮ່ວມເຈລະຈາ ແລະ ອົງການຈັດຕັ້ງສາກົນຫຼາຍດ້ານ ເປັນຕົ້ນເຊັ່ນ: ການພັດທະນາບຸກຄະລາກອນ, ການແລກປ່ຽນຄວາມຮູ້ ຄວາມສາມາດດ້ານ ໄອຊີທີ, ການພັດທະນາພື້ນຖານໂຄງລ່າງ ແລະ ວຽກງານຄວາມປອດໄພທາງໄຊເບີ. ພ້ອມເຊື່ອໝັ້ນວ່າ ບັນດາປະເທດຄູ່ຮ່ວມເຈລະຈາ ຈະສືບຕໍ່ຮ່ວມມື ແລະ ຮັດແໜ້ນສາຍພົວພັນໃນການສະໜັບສະໜຸນ ການຈັດຕັ້ງປະຕິບັດບັນດາກິດຈະກໍາ ໃຫ້ບັນລຸເປົ້າໝາຍ ຕາມແຜນຍຸດທະສາດ ໄອຊີທີ AIM2020 ຂອງພາກພື້ຶ້ນ ອາຊຽນ ກໍ່ຄື ການເຮັດວຽກຮ່ວມກັນເພື່ອໃຫ້ບັນລຸເປົ້າໝາຍການເຊື່ອມຈອດ ASEAN 2025 (ASEAN Connectivity) ໃນ ປີ 2025.

(ຂໍ້ມູນເພິ່ມເຕີມ ກ່ຽວກັບໂຄງການປະກວດຜະລິດຕະພັນດ້ານ ICT ຂອງ ສປປ ລາວ - Lao ICT Award 2017 ສາມາດຕິດຕາມໄດ້ໃນ ເວັບໄຊ: www.laoictaward.gov.la, www.mpt.gov.la. Facebook: Laoictaward).

ແຫ່ງ: ກ​ຊ ເຕັກ​ໂນ​ໂລ​ຊີ ແລະ ການ​ສື່​ສານ, ໂດຍ: ພາວັນນາ ດວງບຸບຜາ. / 16/06/2017