ກະຊວງ ປກສ ຈັດກອງປະຊຸມຫາລືການແກ້ໄຂອາຊະຍາກຳທາງໄຊເບີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 10 ຄັ້ງ | ເວ​ລາ | 2026-06-19 15:04:15 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2026-06-19 15:04:15

ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປຶກສາຫາລືການແກ້ໄຂກຸ່ມແກ້ງສໍ້ໂກງຊັບທາງເອເລັກໂຕຣນິກ (ອາຊະຍາກຳທາງໄຊເບີ) ໃນວັນທີ 17 ມິຖຸນາ ນີ້ ທີ່ກະຊວງ ປກສ, ເປັນປະທານກອງປະຊຸມໂດຍ ທ່ານ ພົທ ວັນທອງ ກອງມະນີ ຄະນະເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ, ມີບັນດາຮອງລັດຖະມົນຕີ, ຫົວໜ້າກົມໃຫຍ່, ຮອງກົມໃຫຍ່ ແລະ ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ຫ້ອງສັນຕິບານ, ຫ້ອງຕຳຫຼວດ ແລະ ພະນັກງານທີ່ກ່ຽວ ເຂົ້າຮ່ວມ.

ກອງປະຊຸມດັ່ງກ່າວຈັດຂຶ້ນເພື່ອທົບທວນຄືນການຈັດຕັ້ງປະບັດ ຄຳສັ່ງ ສະບັບເລກທີ 01/ປກສ, ລົງວັນທີ 5 ມັງກອນ 2026 ວ່າດ້ວຍການຈັດຕັ້ງປະຕິບັດຄຳສັ່ງ ສະບັບເລກທີ 32/ນຍ, ລົງວັນທີ 12 ທັນວາ 2025 ວ່າດ້ວຍການເພີ່ມທະວີການສະກັດກັ້ນ ແລະ ແກ້ໄຂອາຊະຍາກຳທາງອິນເຕີເນັດ ແລະ ເວັບພະນັນອອນລາຍ ໃນໄລຍະຜ່ານມາ; ໃນໂອກາດ ນີ້, ບັນດາທ່ານທີ່ເຂົ້າຮ່ວມກອງປະຊຸມໄດ້ປະກອບຄຳຄິດເຫັນ ແລະ ແລກປ່ຽນບົດຮຽນຢ່າງກົງໄປກົງມາ ພ້ອມທັງປຶກສາຫາລືທິດທາງໃນການແກ້ໄຂບັນຫາອາຊະຍາກຳທາງໄຊເບີໃຫ້ໝົດໄປຈາກປະເທດລາວ.

ນັບແຕ່ເດືອນມັງກອນ 2026 ເຖິງປັດຈຸບັນ, ເຈົ້າໜ້າທີ່ວິຊາສະເພາະ ໄດ້ເອົາໃຈໃສ່ໃນການແກ້ໄຂ, ເລີກຮື້ ບັນດາກຸ່ມແກ້ງສໍ້ໂກງທາງເອເລັກໂຕຣນິກ (ອາຊະຍາກຳທາງໄຊເບີ) ສາມາດແກ້ໄຂໄດ້ທັງໝົດ 20 ຄັ້ງ, ກັກຜູ້ຖືກຫາໄດ້ ຈຳນວນ 2,652 ຄົນ ຍິງ 780 ຄົນ, ລວມມີ 14 ສັນຊາດ.

ໂອກາດນີ້, ທ່ານ ພົທ ວັນທອງ ກອງມະນີ ໄດ້ຊີ້ນຳເນັ້ນໜັກໃຫ້ຄະນະພັກ-ບັນຊາ ແລະ ເຈົ້າໜ້າທີ່ວິຊາສະເພາະ ສືບຕໍ່ແກ້ໄຂບັນຫາປະກົດການຫຍໍ້ທໍ້ໃນສັງຄົມ ຕິດພັນກັບການແກ້ໄຂບັນຫາກຸ່ມແກ້ງກໍ່ອາຊະຍາກຳທາງໄຊເບີ ໃຫ້ເຂັ້ມງວດ, ໝົດໄປຈາກ ສປປ ລາວ ພ້ອມທັງສືບຕໍ່ໂຄສະນາ-ສຶກສາອົບຮົມ ໃຫ້ທົ່ວສັງຄົມຮັບຮູ້-ເຂົ້າໃຈຢ່າງເລິກເຊິ່ງ ເພື່ອພ້ອມກັນມີສະຕິ, ເປັນເຈົ້າການຕິດຕາມ, ລາຍງານ ແລະ ຮ່ວມມືກັບເຈົ້າໜ້າທີ່ ໃນການແກ້ໄຂ.

ພ້ອມທັງຊີ້ນຳໃຫ້ຕິດຕາມ, ກວດກາການດໍາເນີນທຸລະກິດຂອງສະຖານທີ່ບັນເທີງ, ໂຮງແຮມ, ເຮືອນພັກ, ເຮືອນເຊົ່າ ແລະ ປະຕິບັດໂທດຕໍ່ໜ້າກົດໝາຍຢ່າງເຂັ້ມງວດ ເມື່ອກວດພົບມີການລະເມີດ ແລະ ເພີ່ມທະວີຄວາມເຂັ້ມງວດ ໃນການກວດກາ, ສະກັດກັ້ນການລັກລອບເຂົ້າມາ ສປປ ລາວ ແບບຜິດກົດໝາຍ ແລະ ຕິດຕາມ, ກວດກາການພັກເຊົາຂອງຄົນຕ່າງປະເທດ ໃຫ້ເປັນປົກກະຕິ, ເຂັ້ມງວດ; ດໍາເນີນຄະດີຕໍ່ຫົວໂປ່ໂຕການ ແລະ ຜູ້ອຳນວຍຄວາມສະດວກ ຕາມຂະບວນການຍຸຕິທຳ ຂອງ ສປປ ລາວ.

ແຫຼ່ງ: ປະ​ຊາ​ຊົນ, ຂ່າວ-ພາບ: ບຸນພະຈັນ