ມ້າງແກ້ງສະແກມເມີ 2 ຈຸດຢູ່ບ້ານໂນນແກ້ວ ຈັບຕົວໄດ້ 80 ກວ່າຄົນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 7 ຄັ້ງ | ເວ​ລາ | 2026-06-19 14:55:25 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2026-06-19 14:55:25

ວັນທີ 12 ມິຖຸນາ 2026, ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ເຂົ້າມ້າງກຸ່ມແກ້ງສໍ້ໂກງຊັບທາງໂທລະຄົມ ແລະ ການສື່ສານ ຫຼື ແກ້ງສະແກມເມີ ຢູ່ເຮືອນໃຫ້ເຊົ່າ 2 ຈຸດຢູ່ບ້ານໂນນແກ້ວ ເມືອງສີໂຄດຕະບອງ ສາມາດຈັບກຸ່ມແກ້ງ ໄດ້ທັງໝົດ 82 ຄົນ ແລະ ເຄື່ອງຂອງກາງທີ່ນຳໃຊ້ເຂົ້າໃນການກະທຳຜິດຈຳນວນຫຼາຍລາຍການ.

ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ລາຍງານວ່າ: ວັນທີ 12 ມິຖຸນາ 2026 ເວລາ 13:20 ໂມງ ເຈົ້າໜ້າທີ່ ປກສ ເມືອງສີໂຄດຕະບອງ ໄດ້ສົມທົບກັບອຳນາດການປົກຄອງບ້ານໂນນແກ້ວ ເຂົ້າເເກ້ໄຂເປົ້າໝາຍແກ້ງສະແກມເມີ ຢູ່ເຮືອນໃຫ້ເຊົ່າເປັນເຮືອນວິນລ່າຊັ້ນດຽວຂອງ ທ້າວ ໄຊສົມພອນ (ເຈົ້າຂອງເຮືອນ) ຕັ້ງຢູ່ບ້ານ ໂນນແກ້ວ, ສາມາດຈັບຕົວເປົ້າໝາຍໄດ້ 6 ຄົນ ໃນນີ້ ມີສັນຊາດຈີນ 3 ຄົນ ແລະ ສັນຊາດລາວ 3 ຄົນ ພ້ອມຂອງກາງມີ: ຄອມພິວເຕີຕັ້ງໂຕະ ຈໍານວນ 12 ຊຸດ, ໂທລະສັບມືຖື 12 ໜ່ວຍ, ຢາບ້າຈໍານວນ 154 ເມັດ , ເມັດສີຂາວ (ສົງໄສສານເສບຕິດ) ຈໍານວນ 1 ຖົງນ້ອຍ.

ໃນເວລາ 17:00 ໂມງ ຂອງມື້ດຽວກັນ, ເຈົ້າໜ້າທີ່ ປກສ ເມືອງ ສີໂຄດຕະບອງ ໄດ້ສົມທົບກັບພາກສ່ວນກ່ຽວຂ້ອງ ເຂົ້າແກ້ໄຂເປົ້າໝາຍແກ້ງສະແກມເມີ ຢູ່ທີ່ເຮືອນໃຫ້ເຊົ່າ ເປັນເຮືອນວິລ່າ 3 ຊັ້ນ ຂອງ ທ້າວ ທະວີສັກ ບູລົມ ຕັ້ງຢູ່ບ້ານໂນນແກ້ວ ເປັນຈຸດທີ 2 ສາມາດຈັບຕົວເປົ້າໝາຍໄດ້ທັງໝົດ 76 ຄົນ ຍິງ 3 ຄົນ, ໃນນັ້ນ ສັນຊາດຈີນ ຈໍານວນ 75 ຄົນ ຍິງ 2 ຄົນ, ລາວ 1 ຄົນ ຍິງ 1 ຄົນ ແລະ ຢຶດເຄື່ອງຂອງກາງ ປະກອບມີ: ໂທລະສັບມືຖື 131 ໜ່ວຍ, ຄອມພິວເຕີໂນດບຸກ 52 ໜ່ວຍ.

ພວກກ່ຽວຮັບສາລະພາບໃນເບື້ອງຕົ້ນຕໍ່ເຈົ້າໜ້າທີ່ວ່າ: ວິທີການເຮັດວຽກຂອງພວກກ່ຽວແມ່ນໄດ້ແບ່ງໜ້າທີ່ ອອກເປັນ 3 ກຸ່ມຄື: ກຸ່ມຊອກຮູບພາບ, ກຸ່ມຕອບແຊັດ ແລະ ກຸ່ມສ້າງໂປຣຟາຍ, ວິທີການໃນເບື້ອງຕົ້ນກຸ່ມຊອກຮູບພາບແມ່ນຈະເປັນຮູບພາບຜູ້ຊາຍ ອາຍຸປະມານ 35 ປີ ຫາ 40 ປີ, ແລ້ວມາສ້າງເປັນໂປຣຟາຍໃນສື່ສັງຄົມອອນລາຍ, ແລ້ວໄດ້ແອັດຫາຍິງສາວອາຍຸປະມານ 35 ປີ ໂດຍເນັ້ນໃສ່ຄົນຈີນ ເພື່ອຊອກຫາເຫຍື່ອ ດ້ວຍຮູບການຕີສະໜິດສ້າງຄວາມລຶ້ງເຄີຍ ແລະ ສ້າງຄວາມເຊື່ອໝັ້ນ; ຫຼັງຈາກນັ້ນກໍໄດ້ຕົວະຍົວະໃຫ້ຍິງສາວທີ່ຕົກເປັນເຫຍື່ອນັ້ນຊື້ເງິນໂດລາຢູເອັສດີທີ (USDT) ນໍາພວກກ່ຽວ, ພາຍຫຼັງຊື້ແລ້ວກໍໂອນເງິນມາໃຫ້ກຸ່ມແກ້ງດັ່ງກ່າວ ຕໍ່າສຸດ 100 ໂດລາ, ສູງສຸດ 10,000 ໂດລາ, ເມື່ອເຫຍື່ອໂອນເງິນໃຫ້ສໍາເລັດແລ້ວ, ກຸ່ມແກ້ງດັ່ງກ່າວ ກໍບຼ໋ອກການຕິດຕໍ່ທຸກຊ່ອງທາງ.

ອີກໜຶ່ງວິທີ ແມ່ນຕັ້ງເຟສບຸກ ແລ້ວຂໍເປັນເພື່ອນນຳຄົນທົ່ວໄປ ເພື່ອຊອກຫາເຫຍື່ອ, ພາຍຫຼັງເຫຍື່ອຮັບແອັດເປັນເພື່ອນແລ້ວ ກໍແຊັດລົມກັນແບບຊູ້ສາວ ແລ້ວຂໍເອົາຄິວອາໂຄດຂອງ ລາຍ ຫຼື ວັອດແອັບໄວ້ ເພື່ອເຂົ້າເບິ່ງເບີໂທລະສັບເຈົ້າຂອງເຟສບຸກດັ່ງກ່າວ, ພາຍຫຼັງຮູ້ເບີໂທລະສັບແລ້ວ ຈຶ່ງແຊັດໄປຫາບັນດາເຫຍື່ອທາງວັອດແອັບ ຫຼື ທາງລາຍ ເພື່ອສົ່ງຄິວອາໂຄດເຂົ້າໄປແອັບເຟຈິ (ແອັບຈີນ) ແລະ ຫຼອກເອົາຊັບສິນຂອງເຫຍື່ອ.

ຂໍຮຽກຮ້ອງມາເຖິງປະຊາຊົນ ຈົ່ງມີສະຕິລະວັງຕົວ ຢ່າຫຼົງເຊື່ອຄົນແປກໜ້າທີ່ແຊັດມາຫາທາງອອນລາຍ ຫຼື ຖ້າພົບເຫັນ ກຸ່ມຄົນ ຫຼື ບຸກຄົນ ຫຼື ສະຖານທີ່ບ່ອນພັກເຊົາ ທີ່ໜ້າສົງໃສ ໃຫ້ແຈ້ງເຈົ້າໜ້າທີ່ໂດຍດ່ວນ.

ແຫຼ່ງ: ປະ​ຊາ​ຊົນ, ພາບ-ຂ່າວ: ແກ້ວ ອຸເພັດ