ຂະແໜງ ພບ ແຕ່ນີ້ຮອດປີ 2030 ຕ້ອງບືນຕົວໃຫ້ແຂງແຮງ

​ເຜີຍ​ແຜ່​ໂດຍ: admin|ຢ້ຽມ​ຊົມ: ຄັ້ງ | ເວ​ລາ | 2026-04-11 20:52:50

ໂດຍ: ສຳນານ ພົມພັກດິ

ການຄາດຄະເນ ທິດທາງ ແລະ ໜ້າທີ່ລວມໃນການພັດທະນາຂະແໜງພະລັງງານ ແລະ ບໍ່ແຮ່, ໃນໄລຍະ 2026-2030 ຈະສູ້ຊົນເຮັດໃຫ້ຂະແໜງດັ່ງກ່າວກາຍເປັນຂະແໜງເສດຖະກິດທີ່ເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມຂອງຊາດທັງສະເພາະໜ້າ ແລະ ໄລຍະຍາວ, ສ້າງໃຫ້ກາຍເປັນປັດໄຈພື້ນຖານສໍາລັບການພັດທະນາຂະແໜງການອື່ນໆ. ໃນຂະນະດຽວກັນ ກໍເອົາໃຈໃສ່ເປັນພິເສດການປະກອບສ່ວນຢ່າງຕັ້ງໜ້າ ເຂົ້າໃນການພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ.

ໃນໂອກາດເຂົ້າຮ່ວມກອງປະຊຸມວຽກງານ ພະລັງງານ-ບໍ່ແຮ່ທົ່ວປະເທດ ປະຈຳປີ 2024 ຜ່ານມາ, ທ່ານ ສອນໄຊ ສີພັນດອນ ນາຍົກລັກຖະມົນຕີ ແຫ່ງ ສປປ ລາວ ໄດ້ເນັ້ນວ່າ: ແຕ່ນີ້ຮອດປີ 2030 ເຮັດແນວໃດຂະແໜງພະລັງງານ ແລະ ບໍ່ແຮ່ຕ້ອງບືນຕົວໃຫ້ແຂງແຮງ ແລະ ພະຍາຍາມສູ້ຊົນໃຫ້ບັນລຸໄດ້ 1/4 ຫຼື ປະມານ 25% ຂອງລວມຍອດຜະລິດຕະພັນພາຍໃນ ຫຼື GDP. ສູ້ຊົນຮັກສາຈັງຫວະການຂະຫຍາຍຕົວຂອງຂະແໜງພະລັງງານ ແລະ ບໍ່ແຮ່ ສະເລ່ຍແຕ່ລະປີ ບໍ່ໃຫ້ຫຼຸດ 10-12%. ພ້ອມດຽວກັນນີ້, ກໍຕ້ອງເຮັດການບັງຄັບໃຊ້ກົດໝາຍ ແລະ ນິຕິກຳຕ່າງໆຢູ່ໃນຂະບວນການຄຸ້ມຄອງລັດໃນຂະແໜງ ພະລັງງານ ແລະ ບໍ່ແຮ່ ຢ່າງມີຜົນສັກສິດ, ສຸມໃສ່ແກ້ໄຂບັນຫາຕ່າງໆ ຢູ່ໃນຂອບເຂດຄວາມຮັບຜິດຊອບ ເພື່ອປະກອບສ່ວນເຂົ້າໃນການແກ້ໄຂວິກິດການການເງິນລວມ ຂອງປະເທດຊາດ ຊຶ່ງກ່ອນອື່ນໝົດແມ່ນພວກເຮົາຕ້ອງສ້າງແຜນລະອຽດໃນການພັດທະນາໂດຍມີການວິໄຈວິເຄາະຜົນໄດ້ຜົນເສຍຄັກແນ່ ເຊັ່ນ: ຈະເຮັດຫຍັງ? ຢູ່ໃສ? ເວລາໃດ? ເຮັດກັບໃຜ? ເພື່ອຈຸດປະສົງຫຍັງ? ຮູບແບບການລົງທຶນຈະເຮັດແນວໃດ? ເພື່ອໃຫ້ລັດຖະບານ ແລະ ປະເທດຊາດເຮົາມີ ຜົນປະໂຫຍດສູງສຸດ. ຢາກຮັບປະກັນບັນລຸຈຸດປະສົງດັ່ງກ່າວ: ບັນຫາຕົ້ນຕໍແມ່ນພວກເຮົາຈະຕ້ອງເລືອກເອົາຜູ້ທີ່ຈະມາພັດທະນາ ຫຼື ລົງທຶນຕ້ອງແມ່ນມືອາຊີບ, ມີຄວາມສໍານິຊຳນານ, ມີທຶນຮອນ, ມີເຕັກນິກວິທະຍາສາດ, ວິທະຍາການສູງ. ພ້ອມດຽວກັນນີ້, ລັດຖະບານຕ້ອງມີນະໂຍບາຍຢ່າງຈະແຈ້ງເພື່ອສົ່ງເສີມ, ຊຸກຍູ້ການຈັດຕັ້ງປະຕິບັດ ແລະ ຕ້ອງມີບຸກຄະລາກອນທີ່ມີຄວາມຮູ້, ຄວາມສາມາດ, ຄວາມເດັດຂາດ ແລະ ໂປ່ງໃສ.

ໃນນັ້ນ, ການພັດທະນາວຽກງານພະລັງງານ ຕ້ອງຮັບປະກັນການນໍາໃຊ້ ແລະ ປົກປັກຮັກສາຊັບພະຍາກອນທໍາມະຊາດຢ່າງມີປະສິດທິຜົນ ແລະ ຍືນຍົງ, ພັດທະນາແຫຼ່ງຜະລິດພະລັງງານໄຟຟ້າທີ່ເປັນການຂະຫຍາຍລະບົບສາຍສົ່ງໄຟຟ້າ, ແນໃສ່ເພື່ອຕອບສະໜອງຄວາມຕ້ອງການຊົມໃຊ້ໄຟຢູ່ພາຍໃນເພື່ອເປັນທ່າແຮງໃນການພັດທະນາເສດຖະກິດຂອງຊາດ, ສົມທົບກັບການພັດທະນາເພື່ອສົ່ງອອກ, ສ້າງລາຍຮັບໃຫ້ແກ່ປະເທດຊາດ ແລະ ສຸມໃສ່ແກ້ໄຂໜີ້ສິນຂອງລັດວິສາຫະກິດໄຟຟ້າລາວເປັນເທື່ອລະກ້າວ,ໃນຂະນະດຽວກັນກ່ຽວກັບການປະຕິບັດແຜນພັດທະນາພະລັງງານ, ຕ້ອງເອົາໃຈໃສ່ໂຄງສ້າງກ່ຽວກັບລາຄາໄຟຟ້າໃນແຕ່ລະໄລຍະໃຫ້ສອດຄ່ອງສົມເຫດສົມຜົນ, ເອົາໃຈໃສ່ດຶງດູດທຶນຮອນເພື່ອສຸມໃສ່ການພັດທະນາລະບົບສາຍສົ່ງ, ເອົາໃຈໃສ່ປັບປຸງລະບົບຈຳໜ່າຍ, ການຫັນໄປສູ່ທັນສະໄໝໃນການໃຫ້ການບໍລິການແກ່ຜູ້ຊົມໃຊ້ ແລະ ນະໂຍບາຍດ້ານອື່ນໆຕິດພັນກັບການຍູ້ແຮງການຈັດຕັ້ງປະຕິບັດຍຸດທະສາດການພັດທະນາພະລັງງານທົດແທນ ແລະ ພະລັງງານທາງເລືອກສໍາລັບພາກຂົນສົ່ງ, ເອົາໃຈໃສ່ສົ່ງເສີມການອະນຸລັກ ແລະ ປະຢັດພະລັງງານຢ່າງກວ້າງຂວາງ, ພ້ອມດຽວກັນ, ກໍເປັນເຈົ້າການສົ່ງເສີມການນໍາໃຊ້ພາຫານະທີ່ນໍາໃຊ້ໄຟຟ້າ ເພື່ອເປັນການສົ່ງເສີມການນໍາໃຊ້ໄຟຟ້າຫຼາຍຂຶ້ນ ແລະ ຫຼຸດຜ່ອນການນໍາໃຊ້ເງິນຕາເພື່ອຊື້ນໍ້າມັນເຊື້ອໄຟ, ສຸມໃສ່ແກ້ໄຂສະພາບຄວາມຫຍຸ້ງຍາກໃນການພັດທະນາວຽກງານພະລັງງານໄຟຟ້າໃນຕໍ່ໜ້ານີ້ ຕ້ອງເອົາໃຈໃສ່ປັບປຸງການກໍານົດແຜນໃຫ້ລະອຽດ, ຊັດເຈນ, ສົມທົບຢ່າງແໜ້ນແຟ້ນ ລະຫວ່າງ ການພັດທະນາແຫຼ່ງຜະລິດກະແສໄຟຟ້າກັບການພັດທະນາລະບົບສາຍສົ່ງ-ສະຖານີ ແລະ ການຕະຫຼາດ. ນອກນັ້ນ ຕ້ອງສຸມໃສ່ການກໍານົດລາຄາໄຟຟ້າໃຫ້ເໝາະສົມກັບທຸກຝ່າຍໃນສັງຄົມ.

ໃນຂະນະດຽວກັນ ບໍລິສັດສາຍສົ່ງໄຟຟ້າແຫ່ງຊາດ (EDL-T) ຕ້ອງເຄື່ອນໄຫວໃຫ້ແຂງແຮງກວ່າເກົ່າ ເພື່ອເຮັດບົດບາດ ເປັນຜູ້ພັດທະນາວຽກງານສາຍສົ່ງແບບຄົບວົງຈອນ, ດຶງດູດ ຍາດແຍ່ງການຮ່ວມລົງທຶນນັບທັງພາຍໃນ ແລະ ຕ່າງປະເທດ, ຫຼຸດຜ່ອນການແບ່ງເບົາພາວະການລົງທຶນ ແລະ ໜີ້ສິນຂອງລັດຖະບານ ສ້າງເງື່ອນໄຂເຮັດໃຫ້ການພັດທະນາດ້ານນີ້ມີຄວາມສະດວກ ແລະ ຂະຫຍາຍຕົວໄວຂຶ້ນເພື່ອໃຫ້ທັນກັບຄວາມຕ້ອງການຂອງການສະໜອງໄຟຟ້າພາຍໃນ ແລະ ເຊື່ຶອມໂຍງກັບພາກພື້ນ, ປັບປຸງລັດວິສາຫະກິດໄຟຟ້າລາວໃຫ້ໜັກແໜ້ນ, ເຂັ້ມແຂງ ແລະ ການພັດທະນາດ້ານບໍ່ແຮ່ຕ້ອງມີການເລືອກເຟັ້ນຢ່າງເຄັ່ງຄັດ, ເຮັດດ້ວຍຄວາມລະມັດລະວັງ ແລະ ຮັບປະກັນການພັດທະນາໃຫ້ໄປຕາມທິດຍືນຍົງ ແລະ ຄຸ້ມຄອງການຂຸດຄົ້ນບໍ່ແຮ່ໃຫ້ເກີດປະໂຫຍດສູງສຸດ.