ມອບ-ຮັບໜ້າທີ່ ເລຂາຄະນະບໍລິຫານງານພັກ ນະຄອນຫຼວງວຽງຈັນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 15 ຄັ້ງ | ເວ​ລາ | 2026-03-18 11:14:10

ພິທີມອບ-ຮັບໜ້າທີ່ ເລຂາຄະນະບໍລິຫານງານພັກ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 29 ມັງກອນ ນີ້ ທີ່ຫ້ອງວ່າການນະຄອນຫຼວງ ໂດຍການເປັນກຽດເຂົ້າຮ່ວມຂອງສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມັນຕີ.

ໃນພິທີ ສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ນະຄອນຫຼວງວຽງຈັນ ໄດ້ລາຍງານຫຍໍ້ຜົນສໍາເລັດການນໍາພາ-ຊີ້ນໍາ ຄະນະພັກທຸກຂັ້ນທົ່ວນະຄອນຫຼວງວຽງຈັນ ຕະຫຼອດໄລຍະ 5 ປີຜ່ານມາ ຊຶ່ງໄດ້ນໍາພາ-ຊີ້ນໍາ ຈັດຕັ້ງ ເຜີຍແຜ່ ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ແລະ ມະຕິກອງປະຊຸມຄົບຄະນະບໍລິຫານງານສູນກາງພັກແຕ່ລະຄັ້ງ ເຊື່ອມສານເຂົ້າກັບມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນະຄອນຫຼວງວຽງຈັນ ເຂົ້າສູ່ລວງເລິກ ດ້ວຍຄວາມເປັນເຈົ້າການ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ສາມາດບັນລຸບັນດາຄາດໝາຍເປັນສ່ວນໃຫຍ່, ໄດ້ນໍາພາ-ຊີ້ນໍາ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ໃຫ້ໄດ້ຮັບການຈັດຕັ້ງປະຕິບັດຢ່າງແຂງແຮງ ແລະ ເລິກເຊິ່ງ, ໄດ້ນຳພາຊີ້ນຳ ການພັດທະນາເສດຖະກິດຢ່າງຕໍ່ເນື່ອງ, ມີການຂະຫຍາຍຕົວສະເລ່ຍ 5.34 % ຕໍ່ປີ, ລວມຍອດຜະລິດຕະພັນພາຍໃນປີ 2025 ບັນລຸໄດ້ 89,278.8 ຕື້ກີບ, ສະເລ່ຍຕໍ່ຫົວຄົນ ເທົ່າກັບ 85.17 ລ້ານກີບ, ໂຄງປະກອບເສດຖະກິດ ໄດ້ມີການຫັນປ່ຽນໄປຕາມທິດທາງທີ່ກໍານົດໄວ້, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໄດ້ຮັບການຈັດຕັ້ງປະຕິບັດ.

ຈາກນັ້ນ, ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານຄໍາສັ່ງ ສະບັບເລກທີ 10 /ກມສພ ລົງວັນທີ 23 ມັງກອນ 2026 ວ່າດ້ວຍການຍົກຍ້າຍ ສະຫາຍ ອານຸພາບ ຕຸນາລົມ ເລຂາທິການສູນກາງພັກ ເລຂາຄະນະບໍລິຫານງານພັກ ນະຄອນຫຼວງວຽງຈັນ ໄປຮັບໜ້າທີ່ໃໝ່ຢູ່ສະຖາບັນການເມືອງ ແລະ ການປົກຄອງແຫ່ງຊາດ ພ້ອມກັນນີ້ ໄດ້ຜ່ານມະຕິຕົກລົງເລກທີ 20/ກມສພ ລົງວັນທີ 23 ມັງກອນ 2026 ວ່າດ້ວຍການແຕ່ງຕັ້ງ ສະຫາຍ ອາດສະພັງທອງ ສີພັນດອນ ກໍາມະການສູນກາງພັກ ເປັນເລຂາຄະນະບໍລິຫານງານພັກ ນະຄອນຫຼວງວຽງຈັນ. ໃນພິທີ ຍັງໄດ້ມອບຄໍາສັ່ງ ແລະ ມະຕິຕົກລົງ ໃຫ້ກັບ 2 ທ່ານທີ່ໄດ້ຮັບໜ້າທີ່ໃໝ່ ພ້ອມທັງມີການເຊັນບົດບັນທຶກມອບ-ຮັບໜ້າທີ່ ລະຫວ່າງ ສະຫາຍ ອານຸພາບ ຕຸນາລົມ ເລຂາຄະນະບໍລິຫານງານພັກ ນະຄອນຫຼວງວຽງຈັນ ຜູ້ເກົ່າ ແລະ ສະຫາຍ ອາດສະພັງທອງ ສີພັນດອນ ເລຂາຄະນະບໍລິຫານງານພັກ ນະຄອນຫຼວງວຽງຈັນຜູ້ໃໝ່.

ໂອກາດນີ້, ສະຫາຍ ສອນໄຊ ສີພັນດອນ ນາຍົກລັດຖະມົນຕີໄດ້ມີຄໍາເຫັນໂອ້ລົມຕໍ່ພິທີວ່າ: ຕາງຫໜ້າໃຫ້ກົມການເມືອງສູນກາງພັກ ຕາງໜ້າໃຫ້ລັດຖະບານ ສປປ ລາວ ແລະ ໃນນາມສ່ວນຕົວ ຕີລາຄາສູງຕໍ່ຜົນງານທີ່ພົ້ນເດັ່ນ ພາຍໃຕ້ການນໍາພາ-ຊີ້ນໍາຂອງອົງຄະນະພັກ ນະຄອນຫຼວງວຽງຈັນ ໂດຍມີສະຫາຍ ອານຸພາບ ຕຸນາລົມ ເປັນຄັນທຸງນໍາໜ້າ ຊຶ່ງຍາດໄດ້ຜົນສໍາເລັດທີ່ພົ້ນເດັ່ນໃນຊຸມປີຜ່ານມາ. ພ້ອມນີ້ ຍັງໄດ້ມີບາງຄໍາເຫັນໃນການສືບຕໍ່ຜັນຂະຫຍາຍມະຕິຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ແລະ ຂອງທ້ອງຖິ່ນໃນຊຸມປີຕໍ່ໜ້າ ເຂົ້າສູ່ການປະຕິບັດຕົວຈິງ.

ອັນສໍາຄັນທີ່ສຸດ ກໍແມ່ນການປະຕິບັດຫຼັກການເຮັດວຽກຂອງພັກ ໃຫ້ບັນດາສະຫາຍຮີບຮ້ອນແບ່ງງານ ແບ່ງຄວາມຮັບຜິດຊອບ ທັງມອບໝາຍໜ້າທີ່ໃຫ້ທັນເວລາ. ພ້ອມນີ້ ໃຫ້ພ້ອມກັນສືບຕໍ່ສ້າງນະຄອນຫຼວງວຽງຈັນ ໃຫ້ມີການປ່ຽນແປງໃໝ່ຮອບດ້ານທີ່ດີຂຶ້ນ, ເປັນແບບຢ່າງໃຫ້ແຂວງຕ່າງໆໃນທົ່ວປະເທດ ແລະ ເປັນຕົວແບບຂອງການພັດທະນາທ້ອງຖິ່ນ.

ແຫຼ່ງຂ່າວ: ວຽງຈັນໃໝ່