ປະທານປະເທດໂອ້ລົມເນັ້ນຫຼາຍບັນຫາຕໍ່ກອງປະຊຸມສະຫຼຸບວຽກງານຄະນະປະຕິຮູບລັດວິສາຫະກິດປະຈໍາປີ 2025

​ເຜີຍ​ແຜ່​ໂດຍ: admin|ຢ້ຽມ​ຊົມ: 14 ຄັ້ງ | ເວ​ລາ | 2026-03-18 05:43:04

ກອງປະຊຸມສະຫຼຸບການປະຕິບັດວຽກງານວຽກຄະນະປະຕິຮູບລັດວິສາຫະກິດປະຈຳປີ 2025 ແລະ ທິດທາງແຜນວຽກຈຸດສຸມປີ 2026 ຈັດຂຶ້ນໃນວັນທີ 17 ທັນວານີ້ ທີ່ຫ້ອງປະຊຸມ ICTC, ພາຍໃຕ້ການເປັນປະທານ ຂອງທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ຫົວໜ້າຄະນະປະຕິຮູບລັດວິສາຫະກິດ, ເປັນກຽດເຂົ້າຮ່ວມ ແລະ ໂອ້ລົມ ຂອງທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ, ມີ ບັນດາທ່ານ ຄະນະປະຕິຮູບລັດວິສາຫະກິດຂັ້ນສູນກາງ ກະຊວງ-ອົງການ ແລະ ຂັ້ນແຂວງ, ບັນດາທ່ານຜູ້ອໍານວຍການ ຕາງໜ້າສະພາບໍລິຫານ ລັດວິສາຫະກິດໃນຂອບເຂດທົ່ວ ປະເທດ, ຜູ້ຕາງໜ້າຈາກທະນາຄານໂລກປະຈຳລາວ ພ້ອມດ້ວຍແຂກຖືກເຊີນເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຂອງ ທ່ານ ກິແກ້ວ ຈັນທະບູຣີ ຮອງຫົວໜ້າຫ້ອງວ່າການສູນກາງພັກ, ຮອງຫົວໜ້າຄະນະປະຕິຮູບ, ຜູ້ປະຈຳການຫ້ອງການຄະນະປະຕິຮູບລັດວິສາຫະກິດ ຊຶ່ງໄດ້ຍົກໃຫ້ເຫັນສະພາບລວມການປະຕິຮູບລັດ ວິສາຫະກິດ ຢູ່ ສປປ ລາວ ໃນໄລຍະຜ່ານມາ, ສະຫຼຸບການຈັດຕັ້ງປະຕິບັດວຽກງານປະຕິຮູບລັດວິສາຫະກິດ ປີ 2025, ທິດທາງແຜນການ ແລະ ວຽກຈຸດສຸມຂອງການປະຕິຮູບລັດວິສາຫະກິດ ປີ 2026.

ມາຮອດທ້າຍປີ 2025 ຫ້ອງການຄະນະປະຕິຮູບລັດວິສາຫະກິດ ໄດ້ລົງເກັບກຳຂໍ້ມູນການເຄື່ອນ ໄຫວດໍາເນີນ ທຸລະກິດຂອງລັດວິສາຫະກິດ ຄືນໃໝ່ໃນຂອບເຂດທົ່ວປະເທດ ແຕ່ປີ 2021-2024 ສາມາດສັງລວມໄດ້ຈໍານວນລັດວິສາຫະກິດທັງໝົດມີ 168 ຫົວໜ່ວຍ (ຫຼຸດລົງຈາກເດີມ 2.89% ໃນນັ້ນ 12 ຫົວໜ່ວຍຖືກຕັດອອກຈາກບັນຊີ ແລະ 7 ຫົວໜ່ວຍເພີ່ມໃໝ່ເຂົ້າໃນບັນຊີ), ໃນນັ້ນ ຂັ້ນສູນກາງຄຸ້ມຄອງ 95 ຫົວໜ່ວຍ ຊຶ່ງກວມເອົາ 56.55%, ຂັ້ນແຂວງ ຄຸ້ມຄອງ 73 ຫົວໜ່ວຍ. ເມື່ອຈໍາແນກຕາມໂຄງສ້າງການຖືຮຸ້ນ ສາມາດແບ່ງອອກເປັນ 3 ກຸ່ມຄື: ກຸ່ມລັດຖືຮຸ້ນ 100% ມີ 102 ຫົວໜ່ວຍ (ກວມເອົາ 60.71%), ກຸ່ມລັດຖືຮຸ້ນແຕ່ 51%-99% ມີ 13 ຫົວໜ່ວຍ (ກວມເອົາ 7.74%), ກຸ່ມລັດຖືຮຸ້ນຕໍ່າກວ່າ 51% ມີ 53 ຫົວໜ່ວຍ (ກວມເອົາ 31.55%), ໃນຈໍານວນ 188 ຫົວໜ່ວຍ ມີ 19 ຫົວໜ່ວຍ ບໍ່ໄດ້ເຄື່ອນໄຫວ (ບໍ່ໄດ້ຮັບເອກະສານຢັ້ງຢືນເປັນທາງການ ໃນການຍຸບເລີກ), ຍັງເຄື່ອນໄຫວຕົວຈິງ ຈໍານວນ 149 ຫົວໜ່ວຍ (ກວມ 88.69% ຂອງຈໍານວນທັງໝົດ), ໃນນີ້ ມີ 25 ຫົວໜ່ວຍ ບໍ່ໄດ້ສົ່ງແບບຟອມການປະກອບຂໍ້ມູນ ແລະ 1 ຫົວ ໜ່ວຍປະກອບຂໍ້ມູນບໍ່ຄົບຖ້ວນ. ສະນັ້ນ, ຫົວໜ່ວຍທີ່ປະກອບຂໍ້ມູນຄົບຖ້ວນຕາມແບບຟອມມີພຽງ 123 ຫົວໜ່ວຍ ຊຶ່ງເພີ່ມຂຶ້ນຈາກ ໃນປີ 2023 ຈໍານວນ 6 ຫົວໜ່ວຍ (ປີ 2023 ເກັບໄດ້ 117 ຫົວໜ່ວຍ), ໃນຈໍານວນ 123 ຫົວໜ່ວຍ ແບ່ງອອກເປັນ ລັດຖືຮຸ້ນ 100% ມີ 74 ຫົວໜ່ວຍ, ລັດຖືຮຸ້ນແຕ່ 51-99% ມີ 13 ຫົວໜ່ວຍ ແລະ ລັດຖືຮຸ້ນໜ້ອຍກວ່າ 51% ມີ 36 ຫົວໜ່ວຍ.

ສໍາລັບຜົນການດໍາເນີນທຸລະກິດໃນ ຈໍານວນ 123 ຫົວໜ່ວຍ ສາມາດສ້າງລາຍຮັບໄດ້ທັງໝົດ 171,358.76 ຕື້ກີບ ທຽບໃສ່ປີ 2023 ເພີ່ມຂຶ້ນ 29.38%, ລາຍຈ່າຍປະຕິບັດໄດ້ 166,842.75 ຕື້ກີບ ທຽບໃສ່ປີ 2023 ຫຼຸດລົງ 5,59%, ມີກຳໄລສຸດທິ ລວມ 3,653.20 ຕື້ກີບ ເມື່ອທຽບໃສ່ ປີ 2023 ເພີ່ມຂຶ້ນ 108%, ແຕ່ເຖິງຢ່າງໃດກໍ່ຕາມ ຜົນປະກອບການໃນປີ 2024 ມີກຳໄລ ແຕ່ອັດຕາສ່ວນລາຍກໍາໄລສຸດທິ (Net profit margin) ກໍຍັງຢູ່ໃນລະດັບທີ່ ຂ້ອນຂ້າງຕໍ່າ ຢູ່ທີ່ 2.19% ເທົ່ານັ້ນ. ໃນນີ້ຫົວໜ່ວຍທີ່ສ້າງກຳໄລ ມີຈໍານວນ 78 ຫົວໜ່ວຍ, ລັດຖືຮຸ້ນ 100% ມີ 49 ຫົວໜ່ວຍ, ລັດຖືຮຸ້ນ 51-99% ມີ 9 ຫົວໜ່ວຍ ແລະ ໜ້ອຍກວ່າ 51% ມີ 20 ຫົວໜ່ວຍ, ສາມາດມອບເງິນເຂົ້າ ງົບປະມານໄດ້ ຈໍານວນ 12,785.27 ຕື້ກີບ, ໃນນັ້ນ, ເປັນເງິນປັນຜົນຈໍານວນ 1,673.79 ຕື້ກີບ ເທົ່າ 45.8% ຂອງກຳໄລສຸດທິ ແລະ ສາມາດມອບພັນທະຕ່າງໆ ເຂົ້າງົບປະມານ ໄດ້ 11,111 48 ຕື້ກີບ ເທົ່າ 7.46% ຂອງລາຍຮັບທັງໝົດ. ເມື່ອສົມທຽບໃສ່ ປີ 2023 ເພີ່ມຂຶ້ນ 383.13 ຕື້ກັບ ແລະ ພັນທະຕ່າງໆ ເພີ່ມຂຶ້ນ 4.261.27 ຕື້ກີບ, ສັງເກດ ເຫັນໄດ້ວ່າມີ ທັງເງິນປັນຜົນ ແລະ ການມອບພັນທະຕ່າງໆ ເຂົ້າງົບປະມານແມ່ນເພີ່ມຂຶ້ນ ເຫັນວ່າການດໍາເນີນທຸລະກິດ ຂອງວິສາຫະກິດມີທ່າອ່ຽງທີ່ດີຂຶ້ນເລັກໜ້ອຍ.

ກອງປະຊຸມ, ທ່ານ ສະເຫຼີມໄຊ ກົມມະສິດ ໄດ້ລາຍງານໂດຍຫຍໍ້ ກ່ຽວກັບ ການປະຕິບັດວຽກງານໃນໄລຍະທີ່ຜ່ານມາ ໃຫ້ກັບທ່ານ ທອງລຸນ ສີສຸລິດ ໄດ້ຮັບຊາບ ແລະ ໃນໂອກາດດັ່ງກ່າວ ທ່ານ ທອງລຸນ ສີສຸລິດ ໄດ້ໂອ້ລົມ ຊີ້ທິດເຍືອງທາງ ບາງຕອນທີ່ສໍາຄັນຄື:

1. ປັບປຸງພາລະບົດບາດ, ໜ້າທີ່ຂອງລັດວິສາຫະກິດ ໃຫ້ຈະແຈ້ງ, ຕ້ອງແຍກ ແລະ ແກ້ໄຂບັນຫາສາຍພົວພັນ ລະຫວ່າງ ການຄຸ້ມຄອງມະຫາພາກ ຂອງລັດ ຕໍ່ລັດວິສາຫະກິດ ແລະ ຄວາມເປັນເຈົ້າ, ສິດ ໃນການຄຸ້ມຄອງ-ບໍລິຫານທຸລະກິດ ຂອງລັດວິສາຫະກິດ.

2. ປັບປຸງກົງຈັກ, ກົນໄກ ການບໍລິຫານ ຂອງລັດວິສາຫະກິດດັ່ງນີ້:

- ປັບປຸງສະພາບໍລິຫານ, ລັດວິສາຫະກິດຂະໜາດໃຫຍ່, ປະທານສະພາບໍລິຫານ (ຂັ້ນຮອງລັດຖະມົນຕີ) ຕ້ອງເປັນເລຂາຄະນະພັກ ແລະ ເຮັດວຽກປະຈໍາຢູ່ລັດວິສາຫະກິດ; ຄະນະສະພາບໍລິຫານ, ຄະນະອຳນວຍການ ຕ້ອງມີການເລືອກເຟັ້ນເອົາ ຜູ້ທີ່ມີຄວາມຮູ້ຄວາມສາມາດ ແລະ ເປັນມືອາຊີບ.

- ແບ່ງໜ້າທີ່, ຄວາມຮັບຜິດຊອບຢ່າງຈະແຈ້ງລະຫວ່າງຄະນະປະຕິຮູບລັດວິສາຫະກິດຂັ້ນສູນກາງກັບກະຊວງການເງິນແລະກະຊວງ, ອົງການແລະທ້ອງຖິ່ນທີ່ລັດວິສາຫະກິດຂຶ້ນກັບ, ພ້ອມທັງປັບປຸງແຜນດໍາເນີນທຸລະກິດ, ຕ້ອງມີປະສິດທິຜົນ, ມີກໍາໄລ ແລະ ບໍ່ໃຫ້ຫຼຸບທຶນເດັດຂາດ.

3. ກຳນົດເປົ້າໝາຍໃຫ້ມີຄວາມບັນລຸ:

- ເຮັດໃຫ້ລັດວິສາຫະກິດ ມີກໍາລັງແຮງ, ມີຄວາມສາມາດໃນການປະຕິບັດນະໂຍບາຍຂອງພັກ-ລັດ, ດັດສົມ-ແກ້ໄຂບັນຫາເຄັ່ງຮ້ອນດ້ານເສດຖະກິດທີ່ເກີດຂຶ້ນໄດ້, ບັນຫາທີ່ເປັນຄໍຫອຍ-ຍຸດທະສາດສໍາຄັນທີ່ພາກເອກະຊົນບໍ່ສາມາດເຮັດໄດ້.

- 5 ປີ ຕໍ່ໜ້າ ຕ້ອງແກ້ໄຂບັນຫາໜີ້ສິນ ໃນລັດວິສາຫະກິດ ໃຫ້ໄດ້, ແກ້ໄຂຄວາມໂປ່ງໃສ, ການບໍລິຫານທີ່ດີ ຂອງລັດວິສາຫະກິດ, ປັບປຸງກົງຈັກ-ບຸກຄະລາກອນ ຂອງລັດວິສາຫະກິດ ໃຫ້ປອດໃສ-ຂາວສະອາດ, ຕ້ອງຈິງໃຈ, ຊື່ສັດບໍລິສຸດ, ຕັ້ງໜ້າ ເປັນເຈົ້າການ ເຮັດທຸລະກິດໃຫ້ລັດ ຢ່າງແທ້ຈິງ.

- ພາຍຫຼັງສໍາເລັດ ກອງປະຊຸມໃຫຍ່ຄັ້ງທີ XII ຂອງພັກ, ໃຫ້ບັນດາທ່ານ ນໍາເອົາຍຸດທະສາດປະຕິຮູບ ແລະແຜນພັດທະນາລັດວິສາຫະກິດເຫຼົ່ານັ້ນ ໄປຜ່ານລັດຖະບານ ແລະ ຂໍທິດຊີ້ນໍາຈາກກົມການເມືອງສູນກາງພັກ, “ຕ້ອງເປັນແຜນປະຕິຮູບ ຫຼືຍຸດທະສາດ ທີ່ກ້າວໄປເຖິງການປະຕິວັດລັດວິສາຫະກິດ” ເຮັດໃຫ້ວິສາຫະກິດ ຂອງພວກເຮົາມີຄວາມເຂັ້ມແຂງ, ໜັກແໜ້ນ ແລະ ມີປະສິດທິຜົນ.

- ໃນຕອນທ້າຍ, ທ່ານ ທອງລຸນ ສີສຸລິດ ຍັງໄດ້ສະແດງຄວາມເປັນຫ່ວງເປັນໄຍ ແລະ ເນັ້ນໜັກຕື່ມອີກວ່າ : ຢືນຢູ່ຕໍ່ໜ້າ ຄວາມຮຽກຮ້ອງຕ້ອງການ ແລະ ເລັ່ງທວງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ແລະ ການຈັດຕັ້ງປະຕິບັດມະຕິ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ, ພວກເຮົາ ຍິ່ງຈະຕ້ອງໄດ້ຮີບຮ້ອນປະຕິຮູບ, ປັບປຸງ ແລະ ພັດທະນາລັັດວິສາຫະກິດ ຂອງພວກເຮົາ ໃຫ້ທັນກັບສະພາບການໃນເງື່ອນໄຂໃໝ່.

- ການປະຕິຮູບລັດວິສາຫະກິດ ຂອງປະເທດເຮົາ ບໍ່ສາມາດຈະຊັກຊ້າ ແລະ ຖອຍຫຼັງໄດ້, ລັດວິສາຫະກິດ ສືບຕໍ່ເຮັດພາລະບົດບາດ, ໜ້າທີ່ ຂອງຕົນຕໍ່ໄປ ແຕ່ຕ້ອງເຮັດດ້ວຍຄຸນນະພາບໃໝ່, ກົນໄກໃໝ່ ແລະ ມີຜົນງານໃໝ່ ເຮັດທຸລະກິດ ມີແຕ່ກໍາໄລ, ບໍ່ໃຫ້ຫຼຸບທຶນ, ຖ້າຜູ້ໃດເຮັດຫຼຸບທຶນ ຜູ້ນັ້ນກໍຕ້ອງມີຄວາມຮັບຜິດຊອບ ຕໍ່ໜ້າລະບຽບວິໄນ ແລະ ກົດໝາຍ ຢ່າງຫຼີກລຽງບໍ່ໄດ້.

- ມອບໃຫ້ຄະນະປະຕິຮູບລັດວິສາຫະກິດ ເປັນເສນາທິການ ໃຫ້ລັດຖະບານ ແລະ ກົມການເມືອງ ສືບຕໍ່ປະຕິບັດໜ້າທີ່ ຂອງຕົນດ້ວຍຄວາມຮັບຜິດຊອບການເມືອງ, ເອົາການເອົາງານ ແລະ ສ້າງຄວາມຕັດສິນໃຈສູງ ແຕ່ເທິງລົງລຸ່ມເພື່ອເຮັດໃຫ້ການປະຕິຮູບໄດ້ມີການຫັນປ່ຽນໃໝ່ທີ່ເປັນຮູບປະທຳ.

- ລັດຖະບານ, ບັນດາອົງການຈັດຕັ້ງໃນລະບົບການເມືອງ ແຕ່ສູນກາງລົງທ້ອງຖິ່ນ ມີໜ້າທີ່ສະໜັບສະໜູນ, ເຮັດໃຫ້ການປະຕິຮູບລັດວິສາຫະກິດ ມີຄວາມຄືບໜ້າ, ບໍ່ນີ້ງໃສ່ກັນ-ໂຍນຄວາມຮັບຜິດຊອບໃຫ້ກັນ, ບໍ່ໃຫ້ມີກົງຈັກການຈັດຕັ້ງ, ຂອດຂັ້ນທີ່ເປັນອຸປະສັກ, ກົດ

ໜ່ວງຖ່ວງດຶງ ການປະຕິຮູບລັດວິສາຫະກິດ (ຂ່າວ-ພາບ:ແສງຈັນ)