ເປີດການນຳໃຊ້ສວນສາທາລະນະມິດຕະພາບ ລາວ-ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2026-03-18 05:17:14

ພິທີເປີດການນຳໃຊ້ສວນສາທາລະນະມິດຕະພາບລາວ-ຫວຽດນາມ ຢ່າງເປັນທາງການ ໄດ້ຈັດຂຶ້ນໃນວັນທີ 2 ທັນວາ 2025, ທີ່ ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ,ປະທານປະເທດ ແຫ່ງ ສປປ ລາວ,ສະຫາຍ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ມີບັນດາສະຫາຍກຳມະການກົມການເມືອງສູນກາງພັກ, ເລຂາທິການສູນກາງພັກ, ກຳມະການສູນກາງພັກປະຊາຊົນປະຕິວັດລາວ ແລະພັກກອມມູນິດ ຫວຽດນາມ,ບັນດາກະຊວງ, ອົງການຂອງລາວ ແລະ ຫວຽດນາມ ແລະ ຊາວໜຸ່ມເຍົາວະຊົນເຂົ້າຮ່ວມ.

ສະຫາຍຫງວຽນ ຈີ້ຢຸງ ຮອງນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ກ່າວວ່າ: ສວນສາທາລະນະມິດຕະພາບ ລາວ-ຫວຽດນາມ ບໍ່ພຽງແຕ່ໂຄງການພູມສັນຖານຮັບໃຊ້ຊຸມຊົນເທົ່ານັ້ນ, ແຕ່ຍັງເປັນສັນຍາລັກທີ່ມີຊີວິດຊີວາ ຂອງສາຍພົວພັນທີ່ຊື່ສັດ ແລະ ຫາຍາກ ລະຫວ່າງສອງຊາດ. ໂຄງການນີ້ສະແດງເຖິງຄວາມຕັ້ງໃຈ ແລະ ເອົາໃຈໃສ່ ຂອງສອງພັກ, ສອງ ລັດ ແລະ ປະຊາຊົນສອງຊາດ ໃນການປົກປັກຮັກສາ, ເສີມຂະຫຍາຍມໍລະດົກອັນລ້ຳຄ່າ ທີ່ ປະທານ ໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ໄດ້ເພີ່ມພູນຄູນສ້າງ.ແມ່ນຂອງຂວັນວັດທະນະທໍາ, ຈິດໃຈ ຂອງພັກ, ລັດ ແລະ ປະຊາຊົນຫວຽດນາມ ຝາກໃຫ້ພັກ, ລັດ ແລະ ປະຊາຊົນລາວ ອ້າຍນ້ອງ ເນື່ອງໃນໂອກາດສະເຫຼີມສະຫຼອງວັນສໍາຄັນອັນຍິ່ງໃຫຍ່, ໃນເມື່ອນຳໃຊ້ສວນສາທາລະນະຈະກາຍເປັນສະຖາບັນວັດທະນະທໍາ, ນິເວດວິທະຍາທີ່ທັນສະໄໝ, ເປັນບ່ອນປະຊາຊົນນະຄອນຫຼວງວຽງຈັນ ແລະ ຕ່າງປະເທດກໍ່ສາມາດເຂົ້າມາພັກຜ່ອນ, ຈັດກິດ ຈະກໍາຂອງຊຸມຊົນ, ພ້ອມນັ້ນຍັງແມ່ນພື້ນທີ່ສີແດງ ເພື່ອໃຫ້ລຸ້ນໜຸ່ມ ລາວ-ຫວຽດນາມ ຊອກຮູ້ ເຫດການປະຫວັດສາດທີ່ຕິດພັນຂອງສອງຊາດ. ດ້ວຍເຫດນີ້ຈຶ່ງສືບຕໍ່ເພີ່ມທະວີຄວາມຮັບຜິດຊອບ ແລະ ເສີມຂະຫຍາຍມູນເຊື້ອຄວາມສາມັກຄີ ຫວຽດນາມ-ລາວ,ໃນສະພາບແວດລ້ອມສາກົນ ແລະ ພາກພື້ນໄດ້ຜັນແປໄປຢ່າງສັບສົນ, ວຽກເສີມສ້າງ ຄວາມສາມັກຄີລາວ-ຫວຽດນາມ ແຫ່ງມີຄວາມໝາຍສໍາຄັນທາງດ້ານຍຸດທະສາດຫຼາຍຂຶ້ນ. ສວນສາທາລະນະມິດຕະພາບລາວ-ຫວຽດນາມ ປະກອບສ່ວນຊຸກຍູ້ການຮ່ວມມືຢ່າງແຂງແຮງຂຶ້ນ ອີກລະຫວ່າງສອງຊາດ ໃນຂົງເຂດການເມືອງ, ເສດຖະກິດ, ວັດທະນະທໍາ, ສຶກສາ, ທ່ອງທ່ຽວ ແລະ ການແລກປ່ຽນພົບປະປະຊາຊົນ, ດັ່ງນັ້ນ ຈຶ່ງນຳເອົາຄຸນຄ່າຕົວຈິງ ເພື່ອການພັດທະນາ ແບບຍືນຍົງຂອງແຕ່ລະປະເທດ ແລະ ຜົນປະໂຫຍດລວມຂອງພາກພື້ນ.

ສະຫາຍ ເພັດ ພົມພິພັກ ກຳມະການສູນກາງພັກ ຫົວໜ້າຫ້ອງວ່າການສູນກາງພັກ ໄດ້ກ່າວວ່າ: ໂດຍປະຕິບັດຕາມການຕົກລົງຂອງສອງພັກ, ສອງລັດຖະບານ ແລະ ກົມການເມືອງ ຂອງສອງປະເທດ ລາວ-ຫວຽດນາມ ກໍຄື ຜັນຂະຫຍາຍ ເນື້ອໃນຈິດໃຈຂອງ ຂໍ້ຕົກລົງວ່າ ດ້ວຍແຜນການຮ່ວມມືປະຈຳປີ 2025 ແລະ ບົດບັນທຶກກອງປະຊຸມ ຄັ້ງທີ 47 ຂອງ ຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໃນການສ້າງສວນສາທາລະນະມິດຕະພາບລາວ-ຫວຽດນາມ ຢູ່ ສປປ ລາວ, ພາຍຫຼັງທີ່ໄດ້ເປີດພິທີໂຄງການກໍ່ສ້າງສວນສາທາລະນະ ມິດຕະພາບລາວ-ຫວຽດນາມ ຢ່າງເປັນທາງການ ທາງຄະນະຄຸ້ມຄອງໂຄງການທັງສອງຝ່າຍ ກໍໄດ້ມີການປະສານສົມທົບກັນຢ່າງແໜ້ນແຟ້ນ ເຮັດໃຫ້ໂຄງການດັ່ງກ່າວ ໄດ້ເຊັນສັນຍາລິເລີ່ມ ໃນວັນທີ 31 ມີນາ 2025 ທີ່ນະຄອນຫຼວງ ວຽງຈັນ ລະຫວ່າງ ຫ້ອງວ່າການສູນກາງພັກ ໃນນາມຄະນະຄຸ້ມຄອງໂຄງການຝ່າຍລາວ ແລະ ກະຊວງວັດທະນະທຳ, ກິລາ ແລະ ທ່ອງທ່ຽວ ໃນນາມຄະນະຄຸ້ມຄອງໂຄງການຝ່າຍ ຫວຽດນາມ ເຊິ່ງມີມູນຄ່າທັງໝົດ 340,471,500,000 ດົ່ງ; ໃນນັ້ນ ທຶນສົມທົບຂອງ ລັດຖະບານ ສປປ ລາວ ແມ່ນ 9 ຕື້ກີບ (ທຽບເທົ່າ 10,471,500,000 ດົ່ງ) ແລະ ທຶນ ຊ່ວຍເຫຼືອລ້າຂອງລັດຖະບານ ສສ ຫວຽດນາມ ແມ່ນ 330 ຕື້ດົ່ງ. ມາຮອດປັດຈຸບັນ, ໂຄງການດັ່ງກ່າວ ໄດ້ດໍາເນີນໄປຕາມຈິດໃຈຊີ້ນໍາ ຂອງກົມການເມືອງສູນກາງພັກ ແລະ ຄະນະຊີ້ນໍາທັງສອງຝ່າຍ ຊຶ່ງງໄດ້ມີຄວາມຄືບໜ້າ ແລະ ມີຜົນສໍາເລັດທີ່ດີຫຼາຍດ້ານ ໂດຍສະເພາະບັນດາໜ້າວຽກຕ່າງໆ ແມ່ນໄດ້ສໍາເລັດ 99 ສ່ວນຮ້ອຍແລ້ວ.

ໂຄງການນີ້ ເປັນໂຄງການໜຶ່ງທີ່ມີຄວາມໝາຍສໍາຄັນທາງດ້ານປະຫວັດສາດ-ການເມືອງ ຢ່າງເລິກເຊິ່ງ ລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ ຊຶ່ງບໍ່ພຽງແຕ່ເປັນສັນຍາລັກແຫ່ງການພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງຊາດພວກເຮົາເທົ່ານັ້ນ, ແຕ່ສວນສາທາລະນະມິດຕະພາບລາວ-ຫວຽດນາມ ທີ່ສວຍສົດງົດງາມແຫ່ງນີ້ ໄດ້ກາຍເປັນບ່ອນ ທ່ອງທ່ຽວທາງດ້ານປະຫວັດສາດ, ວັດທະນະທຳທີ່ສໍາຄັນ ເປັນສະຖານທີ່ຈັດກິດຈະກຳຕ່າງໆ, ເປັນບ່ອນພັກຜ່ອນ, ອອກກໍາລັງກາຍ, ບ່ອນຫຼິ້ນຂອງເດັກນ້ອຍ-ເຍົາວະຊົນຄົນຮຸ່ນໜຸ່ມ ແລະ ເປັນບ່ອນສຶກສາຮໍ່າຮຽນຂອງຄົນຮຸ່ນສືບທອດ ໄດ້ເຂົ້າມາທັດສະນະສຶກສາຄົ້ນຄວ້າ ກ່ຽວກັບຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງຊາດ ລາວ-ຫວຽດນາມ.

ຂ່າວ-ພາບ:ບຸນຕອມ.