ສປປ ລາວ ແລະ ສປປ ເກົາຫຼີ ສືບຕໍ່ເພີ່ມທະວີຮັດແໜ້ນການພົວພັນຮ່ວມມື

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2026-03-17 18:00:38

ໂດຍຕອບສະໜອງຕາມການເຊື້ອເຊີນຂອງ ສະຫາຍ ກິມ ເຈິງ ອຸນ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ,​ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ນໍາພາຄະນະຜູ້ແທນຂັ້ນສູງ ຂອງ ພັກ ແລະ ລັດ ແຫ່ງ ສປປ ລາວ ເດີນທາງໄປຢ້ຽມຢາມລັດຖະກິດ ຢູ່ ສປປ ເກົາຫຼີ ໃນລະຫວ່າງວັນທີ 7-8 ຕຸລາ 2025 ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ສປປ ເກົາຫຼີ ໃຫ້ນັບມື້ນັບແໜ້ນແຟ້ນ ແລະ ຂະຫຍາຍຕົວຍິ່ງໆຂຶ້ນ.

ການຢ້ຽມຢາມລັດຖະກິດ ຢູ່ ສປປ ເກົາຫຼີ ຂອງ ສະຫາຍ ທອງລຸນ ສີສຸລິດ ໄດ້ມີຂຶ້ນໃນທ່າມກາງທີ່ສອງປະເທດ ສປປ ລາວ ແລະ ສປປ ເກົາຫຼີ ພວມສະເຫຼີມສະຫຼອງ ແລະ ຂໍ່ານັບຮັບຕ້ອນວັນຄົບຮອບ 60 ປີ ແຫ່ງການພົບປະສຸດຍອດຄັ້ງທໍາອິດ ທີ່ ນະຄອນຫຼວງພຽງຢາງ ຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫຍ່ ແລະ ອຳມະຕະຂອງປະຊາຊົນເກົາຫຼີ ໃນວັນທີ 28 ຕຸລາ 2025 ແລະ ຂໍ່ານັບຊົມເຊີຍວັນສ້າງຕັ້ງພັກແຮງງານເກົາຫຼີ ຄົບຮອບ 80 ປີ ໃນວັນທີ 10 ຕຸລາ 2025 ທີ່ຈະມາເຖິງນີ້, ພ້ອມທັງໄດ້ເປັນການສະເຫຼີມສະຫຼອງສາຍພົວພັນທາງການທູດ ລະຫວ່າງ ສປປ ລາວ ແລະ ສປປ ເກົາຫຼີ ຄົບຮອບ 50 ປີ.

ໃນຕອນບ່າຍຂອງວັນທີ 7 ຕຸລາ 2025 ທີ່ ຫໍປະຊຸມສະໜາມກິລານະຄອນຫຼວງພຽງຢາງ ໄດ້ມີພິທີຕ້ອນຮັບທາງການຢ່າງຍິ່ງໃຫຍ່ ແລະ ສົມກຽດ ໃຫ້ແກ່ ຄະນະຜູ້ແທນຂັ້ນສູງຂອງ ພັກ ແລະ ລັດ ແຫ່ງ ສປປ ລາວ ນໍາໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສປປ ລາວ ໂດຍໄດ້ມີການກວດແຖວກອງກຽດຕິຍົດ ແລະ ຍິງປືນໃຫຍ່ 21 ນັດ. ໃນພິທີຕ້ອນຮັບຢ່າງເປັນທາງການ ໄດ້ມີສະມາຊິກພັກ, ພະນັກງານ, ກໍາລັງປະກອບອາວຸດ, ນ້ອງນ້ອຍເຍົາວະຊົນ ແລະ ປະຊາຊົນນະຄອນຫຼວງພຽງຢາງ ຫຼາຍກວ່າ 1,000 ຄົນ ໃຫ້ການຕ້ອນຮັບຢ່າງຟົດຟື້ນ ແລະ ສົມກຽດ. ຫຼັງຈາກນັ້ນ, ທີ່ ສໍານັກງານຫ້ອງວ່າການສູນກາງພັກແຮງງານເກົາຫຼີ ໄດ້ມີການພົບປະ ລະຫວ່າງສອງເລຂາທິການໃຫຍ່ ພັກປະຊາຊົນປະຕິວັດລາວ ແລະ ພັກແຮງງານເກົາຫຼີ ຊຶ່ງ ສະຫາຍ ກິມ ເຈິງ ອຸນ ໄດ້ຕີລາຄາສູງຕໍ່ການຢ້ຽມຢາມຄັ້ງນີ້ຂອງ ສະຫາຍ ທອງລຸນ ສີສຸລິດ ພ້ອມດ້ວຍຄະນະ ຊຶ່ງໄດ້ເປັນຂີດໝາຍທີ່ສໍາຄັນຍິ່ງອີກຄັ້ງໜຶ່ງທາງປະຫວັດສາດສໍາລັບການພົວພັນຮ່ວມມືລະຫວ່າງສອງພັກ, ສອງລັດ ໃນການຊຸກຍູ້ສົ່ງເສີມ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ເກົາຫຼີ ແລະ ສປປ ລາວ ໃຫ້ພັດທະນາຂຶ້ນສູ່ບາດກ້າວໃໝ່ ໃນຊຸມປີຕໍ່ໜ້າ. ສະຫາຍ ກິມ ເຈິງ ອຸນ ໄດ້ອວຍພອນໃຫ້ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝທີ XI ຂອງ ພັກປະຊາຊົນປະຕິວັດລາວ ໄລຍະທ້າຍສະໄໝ ແລະ ການດໍາເນີນກອງປະຊຸມໃຫຍ່ຜູ້ແທນທົ່ວປະເທດຂອງພັກປະຊາຊົນປະຕິວັດລາວ ສະ ໄໝທີ XII ໃນຕົ້ນປີ 2026 ທີ່ຈະມາເຖິງນີ້ປະສົບຜົນສໍາເລັດຕາມຄາດໝາຍທີ່ວາງໄວ້.

ສະຫາຍ ທອງລຸນ ສີສຸລິດ ໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບອັນອົບອຸ່ນ, ສະໜິດສະໜົມ ຖານສະຫາຍອ້າຍນ້ອງຂອງ ສະຫາຍ ກິມ ເຈິງ ອຸນ, ກໍຄື ພັກ, ລັດ ແລະ ປະຊາຊົນເກົາຫຼີອ້າຍນ້ອງ ອັນໄດ້ສະແດງເຖິງໄມຕີຈິດ ແລະ ມິດຕະພາບອັນດູດດື່ມທີ່ເປັນມູນເຊື້ອອັນດີງາມ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ ແລະ ສປປ ເກົາຫຼີ, ພ້ອມທັງໄດ້ສະແດງຄວາມຊົມເຊີຍ ການສ້າງຕັ້ງພັກແຮງງານເກົາຫຼີ ທີ່ຈະໝູນວຽນຄົບຮອບ 80 ປີ ໃນວັນທີ 10 ຕຸລາ 2025 ນີ້ ແລະ ສະແດງຄວາມຂອບໃຈ ຕໍ່ພັກ, ລັດ ແລະ ປະຊາຊົນເກົາຫຼີ ອ້າຍນ້ອງ ທີ່ໄດ້ໃຫ້ການສະໜັບສະໜູນແກ່ພາລະກິດການປົດປ່ອຍຊາດໃນເມື່ອກ່ອນ ກໍຄືການປົກປັກຮັກສາ ແລະ ສ້າງສາພັດທະນາ ສປປ ລາວ ໃນປັດຈຸບັນ. ສະຫາຍ ທອງລຸນ ສີສຸລິດ ຍັງໄດ້ອວຍພອນໃຫ້ ພັກແຮງງານເກົາຫຼີ ທີ່ມີ ສະຫາຍ ກິມ ເຈິງ ອຸນ ເປັນຜູ້ນໍາສູງສຸດນັ້ນ, ຈົ່ງມີຜົນສຳເລັດໃໝ່ ໃຫຍ່ຫຼວງກວ່າເກົ່າ ແລະ ຈັດຕັ້ງຜັນຂະຫຍາຍບັນດາມະຕິກອງປະຊຸມໃຫຍ່ ຄັ້ງທີ VIII ແລະ ກະກຽມກອງປະຊຸມໃຫຍ່ ຄັ້ງທີ IX ຂອງ ພັກແຮງງານເກົາຫຼີ ໄດ້ຢ່າງມີໄຊ.

ສອງຝ່າຍ ໄດ້ແລກປ່ຽນຄໍາຄິດເຫັນຢ່າງກົງໄປກົງມາ ດ້ວຍບັນຍາກາດແຫ່ງໄມຕີຈິດມິດຕະພາບ ເພື່ອພ້ອມກັນສືບຕໍ່ເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອມາແຕ່ດົນນານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ສປປ ລາວ ແລະ ສປປ ເກົາຫຼີ, ສືບຕໍ່ແລກປ່ຽນການຢ້ຽມຢາມຊຶ່ງກັນ ແລະ ກັນຂອງການນໍາຂັ້ນສູງ ແລະ ຂັ້ນຕ່າງໆຂອງສອງຝ່າຍ ໃຫ້ເປັນປົກກະຕິ, ຊຸກຍູ້ສົ່ງເສີມການພົວພັນຮ່ວມມືສອງຝ່າຍ ໃນຂົງເຂດວັດທະນະທຳ-ສັງຄົມ, ການສຶກສາ, ການຮ່ວມມືທາງດ້ານການກໍ່ສ້າງພັກ ແລະ ດ້ານອື່ນໆນໍາກັນ ໃນຫຼາຍຮູບແບບທີ່ເໝາະສົມ. ສອງຝ່າຍ ຍັງໄດ້ແລກປ່ຽນຄໍາຄິດເຫັນກ່ຽວກັບບັນຫາພາກພື້ນ ແລະ ສາກົນຈໍານວນໜຶ່ງທີ່ສອງຝ່າຍມີຄວາມສົນໃຈຮ່ວມກັນ.

ໃນຕອນຄໍ່າຂອງວັນດຽວກັນ ສະຫາຍ ກິມ ເຈິງ ອຸນ ຍັງໄດ້ເປັນເຈົ້າພາບຈັດງານລ້ຽງຮັບຮອງ ເປັນກຽດໃຫ້ແກ່ ສະຫາຍ ທອງລຸນ ສີສຸລິດ ພ້ອມດ້ວຍຄະນະ. ພ້ອມນີ້, ໃນໂອກາດຢ້ຽມຢາມລັດຖະກິດ ຢູ່ ສປປ ເກົາຫຼີ ຄັ້ງນີ້, ຄະນະຜູ້ແທນຂັ້ນສູງຂອງ ພັກ ແລະ ລັດ ແຫ່ງ ສປປ ລາວ ຍັງມີແຜນທີ່ຈະຢ້ຽມຢາມ ວັງພະອາທິດ ກຶມສຸສານ, ໂຮງຮຽນທິດສະດີກໍ່ສ້າງພະນັກງານສູນກາງພັກແຮງງານເກົາຫຼີ, ຫ້ອງວາງສະແດງອາວຸດຍຸດໂທປະກອນປ້ອງກັນປະເທດ ແລະ ສູນວິຈິດຕະກໍາ ມານຊູແດ ອີກດ້ວຍ.

ໃນວັນທີ 8 ຕຸລາ 2025, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ໄດ້ສືບຕໍ່ເຄື່ອນໄຫວຢ້ຽມຢາມລັດຖະກິດ ຢູ່ ສປປ ເກົາຫຼີ ເປັນມື້ທີ 2, ໂດຍໄດ້ນໍາພາຄະນະຜູ້ແທນຂັ້ນສູງຂອງ ພັກ ແລະ ລັດ ແຫ່ງ ສປປ ລາວ ເຂົ້າວາງກະຕ່າດອກໄມ້ ຢູ່ ວັງພະອາທິດ ກຶມສຸສານ, ເພື່ອໄຫວ້ອາໄລ ແລະ ຈາລຶກເຖິງຄຸນງາມຄວາມດີ ຂອງ ສະຫາຍ ປະທານ ກິມ ອິນ ຊຸງ ແລະ ສະຫາຍ ປະທານ ກິມ ເຈິງ ອິນ ໃນພາລະກິດນໍາພາປະຊາຊົນເກົາຫຼີ ຕໍ່ສູ້ກູ້ຊາດ, ສ້າງສາ ແລະ ພັດທະນາປະເທດຊາດ ສປປ ເກົາຫຼີ ໃຫ້ເຂັ້ມແຂງ ແລະ ຈະເລີນກ້າວໜ້າ ໃນປັດຈຸບັນ.

ສະຫາຍ ປະທານ ກິມ ອິນ ຊຸງ ແມ່ນຜູ້ນໍາທີ່ຍິ່ງໃຫຍ່, ອາມະຕະ ແລະ ຖືກຈາລຶກໄວ້ໃນຄວາມຊົງຈໍາຂອງປະຊາຊົນເກົາຫຼີອ້າຍນ້ອງຮຸ່ນຫຼັງຕໍ່ມາ ໃນຖານະເປັນບິດາຜູ້ກໍ່ຕັ້ງສັງຄົມນິຍົມເກົາຫຼີ, ຜູ້ບຸກເບີກພາລະກິດຄວາມເປັນເອກະລາດ ແລະ ໃຫ້ແສງສະຫວ່າງຊີ້ນໍາຂອງແນວຄິດຈຸເຊ. ພາຍໃຕ້ການນໍາພາຂອງ ສະຫາຍ ກິມ ເຈິງອຸນ ເລຂາທິໃຫຍ່ຂອງພັກເເຮງງານເກົາຫຼີປະທານກິດຈະການເເຫ່ງລັດ ແຫ່ງ ສປປ ເກົາຫຼີ ໃນປັດຈຸບັນ, ສປປ ເກົາຫຼີ ນັບມື້ໄດ້ຮັບການພັດທະນາໃຫ້ຈະເລີນກ້າວໜ້າ ແລະ ເຂັ້ມແຂງໃນທຸກໆດ້ານ.

ພ້ອມນີ້, ສະຫາຍ ທອງລຸນ ສີສຸລິດ ແລະ ຄະນະ ໄດ້ສືບຕໍ່ຢ້ຽມຢາມ ແລະ ທັດສະນະສຶກສາ ຢູ່ໂຮງຮຽນທິດສະດີກໍ່ສ້າງພະນັກງານສູນກາງພັກແຮງງານເກົາຫຼີ, ຫ້ອງວາງສະແດງອາວຸດຍຸດໂທປະກອນປ້ອງກັນປະເທດ ແລະ ສູນວິຈິດຕະກໍາ ມານຊູແດ ອີກດ້ວຍ.

ໃນໂອກາດຢ້ຽມຢາມໂຮງຮຽນທິດສະດີກໍ່ສ້າງພະນັກງານສູນກາງພັກແຮງງານເກົາຫຼີ, ສະຫາຍ ທອງລຸນ ສີສຸລິດ ແລະ ຄະນະ ໄດ້ຮັບຟັງການລາຍງານກ່ຽວກັບຜົນສໍາເລັດອັນໃຫຍ່ຫຼວງໃນການກໍ່ສ້າງພັກ ແລະ ພະນັກງານການນໍາຂອງພັກແຮງງານເກົາຫຼີ ໃຫ້ມີຄວາມເຂັ້ມແຂງຮອບດ້ານ ປະກອບສ່ວນເຂົ້າໃນການພັດທະນາ ແລະ ສ້າງສາປະເທດ ສປປ ເກົາຫຼີ ໃຫ້ມີຄວາມຈະເລີນຮຸ່ງເຮືອງ ຕາມເສັ້ນທາງສັງຄົມນິຍົມ ໂດຍມີ ສະຫາຍ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫຍ່ ແລະ ອໍາມະຕະ ແລະ ປະຊາຊົນເກົາຫຼີ ເປັນຜູ້ກໍ່ຕັ້ງຂຶ້ນໃນປີ 1946 ແລະ ພາຍໃຕ້ການນໍາພາອັນສະຫຼາດສ່ອງໃສ ຂອງ ສະຫາຍ ກິມ ເຈິງ ອຸນ ຜູ້ນໍາສູງສຸດຂອງ ສປປ ເກົາຫຼີ ຈົນເຖິງປັດຈຸບັນ.

ນອກຈາກນັ້ນ, ໃນໂອກາດຢ້ຽມຊົມຫ້ອງວາງສະແດງອາວຸດຍຸດໂທປະກອນປ້ອງກັນປະເທດ ແລະ ສູນວິຈິດຕະກໍາມານຊູແດ, ຄະນະໄດ້ຢ້ຽມຊົມອາວຸດຍຸດໂທປະກອນທີ່ນໍາໃຊ້ເຕັກນິກວິທະຍາສາດທີ່ທັນສະໄໝເຂົ້າໃນການພັດທະນາ ແລະ ຜະລິດອາວຸດຍຸດໂທປະກອນທີ່ມີອານຸພາບສູງ ເພື່ອປົກປ້ອງປິຕິພູມອັນແສນຮັກ ແລະ ຫວງແຫນຂອງປະຊາຊົນເກົາຫຼີອ້າຍນ້ອງ ກໍຄືການສ້າງສະພາບແວດລ້ອມທີ່ເອື້ອອໍານວຍ ໃຫ້ແກ່ການສືບຕໍ່ພາລະກິດສ້າງສາ ແລະ ພັດທະນາປະເທດ ສປປ ເກົາຫຼີ ໃຫ້ເຂັ້ມແຂງ ແລະ ຮຸ່ງເຮືອງຍິ່ງໆຂຶ້ນ.

ພ້ອມນີ້, ຄະນະໄດ້ສືບຕໍ່ຢ້ຽມຊົມຜົນງານທາງດ້ານສິລະປະ ແລະ ຫັດຖະກໍາທີ່ມີຄວາມປານີດ, ວິຈິດງົດງາມ ແລະ ມີຄວາມເປັນເອກະລັກສະເພາະຕົວ ຂອງ ສູນວິຈິດຕະກຳ ມານຊູແດ ຊຶ່ງສະທ້ອນໃຫ້ເຫັນເຖິງຄວາມເອກອ້າງທະນົງໃຈຕໍ່ຄວາມຈະເລີນຮຸ່ງເຮືອງສີວິໄລທາງດ້ານວັດທະນະທໍາຂອງ ສປປ ເກົາຫຼີ ທີ່ຖືກຖ່າຍທອດອອກມາຢ່າງສວຍສົດງົດງາມ ແລະ ໄດ້ສ້າງຄວາມປະທັບໃຈໃຫ້ແກ່ຜູ້ທີ່ໄດ້ມີໂອກາດຢ້ຽມຊົມ.

 

(ແຫຼ່ງ: ປະ​ຊ​ຊົນ, ຂ່າວ: ກຕທ)