ມູນຄ່າສົ່ງອອກຜະລິດຕະພັນກະສິກຳ ໃນ 5 ເດືອນຕົ້ນປີນີ້ ບັນລຸ 977 ລ້ານໂດລາ ເສດຖະກິດຂອງປະເທດເຮົາ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ

​ເຜີຍ​ແຜ່​ໂດຍ: admin|ຢ້ຽມ​ຊົມ: 18 ຄັ້ງ | ເວ​ລາ | 2026-03-17 16:03:15 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2026-03-17 16:03:15

ລັດຖະບານໄດ້ເອົາໃຈໃສ່ຊຸກຍູ້ ສົ່ງເສີມການຜະລິດເປັນສິນຄ້າ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ເຊິ່ງການຜະລິດພືດສະບຽງອາຫານ ປະຕິບັດໄດ້ ໃນເນື້ອທີ່ 146,520 ເຮັກຕາ ລື່ນແຜນການ 7.23%ເມື່ອທຽບໃສ່ໄລຍະດຽວກັນຂອງປີຜ່ານມາ; ໃນຂະນະດຽວກັນ ກໍໄດ້ສໍາເລັດ ການເຈລະຈາສົ່ງອອກສິນຄ້າກະສິກຳໄປ ສປ ຈີນ ໄດ້ຫຼາຍລາຍການ. ສ່ວນການສົ່ງອອກຜະລິດຕະພັນກະສິກຳໃນ 5 ເດືອນຕົ້ນປີ 2025 ບັນລຸໄດ້ 977 ລ້ານໂດລາ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາໃນໄລຍະ 6 ເດືອນຕົ້ນປີ 2025 ແລະ ທິດທາງແຜນວຽກຈຸດສູມ 6 ເດືອນທ້າຍປີ 2025 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ ຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊູດທີ IX ໃນວັນທີ 9 ມິຖຸນານີ້ ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານ ສອນໄຊ ສີພັນດອນ ກ່າວວ່າ: ລັດຖະບານໄດ້ເອົາໃຈໃສ່ຊຸກຍູ້ສົ່ງເສີມການຜະລິດເຂົ້ານາແຊງ ຊຶ່ງສາມາດປະຕິບັດໄດ້ ໃນເນື້ອ ທີ່ 84,715 ເຮັກຕາ, ໄດ້ຮັບຜົນຜະລິດ 423,830 ໂຕນ, ເທົ່າກັບ 94% ຂອງແຜນການ (450,000 ໂຕນ), ທຽບໃສ່ປີຜ່ານມາ ຫຼຸດລົງ ປະມານ 3,000 ໂຕນ, ເນື່ອງຈາກວ່າ ປະຊາຊົນ ຫັນໄປປູກພືດຊະນິດອື່ນຫຼາຍຂຶ້ນ ເຊັ່ນ: ໝາກໂມ, ຖົ່ວເຫຼືອງ, ພືດຜັກ ແລະ ສາລີຫວານ ແລະ ອື່ນໆ.

ໃນຂະນະດຽວກັນ ກໍໄດ້ສົ່ງເສີມ ແລະ ຊຸກຍູ້ຢ່າງແຂງແຮງ ການຜະລິດສິນຄ້າກະສິກຳ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ໂດຍສະເພາະ ການຜະລິດພືດສະບຽງອາຫານ ປະຕິບັດໄດ້ ໃນເນື້ອທີ່ 146,520 ເຮັກຕາ ລື່ນແຜນການ 136,630 ເຮັກຕາ ຫຼື ລື່ນ 7.23% ທຽບໃສ່ໄລຍະດຽວກັນ ຂອງປີຜ່ານມາ; ໄດ້ສໍາເລັດ ການເຈລະຈາສົ່ງອອກສິນຄ້າກະສິກຳໄປ ສປ ຈີນ ໄດ້ຫຼາຍລາຍການ ເປັນຕົ້ນ: ການສົ່ງອອກ ປາຊວາຍ ໄດ້ ຈໍານວນ 442 ໂຕນ, ໝາກມ່ວງ ໄດ້ 90 ໂຕນ ແລະ ຄາດວ່າ ໃນປີ 2025 ນີ້ ບໍລິສັດຈະສົ່ງອອກໝາກມ່ວງ ທັງໝົດ ປະມານ 1,500 ໂຕນ; ໄດ້ສໍາເລັດການເຈລະຈາສົ່ງອອກສິນຄ້າ ກະສິກຳອື່ນໆ ໄປປະເທດຕ່າງໆ ໄດ້ ທັງໝົດ 74 ລາຍການ. ພ້ອມກັນນີ້, ພວມດໍາເນີນຂັ້ນຕອນການສົ່ງເຂົ້າສານໄປປະເທດບຣູໄນ, ເຈລະຈາ ສັນຍາສົ່ງອອກ ເຂົ້າສານ ໄປປະເທດບັງກະລາເທດ ຈໍານວນ 200,000 ໂຕນຕໍ່ປີ ແລະ ເຈລະຈາການສົ່ງອອກ ຊີ້ນແຊ່ແຂງ ແລະ ຜະລິດຕະພັນຊີ້ນ ໄປ ສປ ຈີນ ຕິດພັນກັບເລັ່ງກໍ່ສ້າງໂຮງງານຂ້າສັດທັນສະໄໝ, ສັງລວມ ແລ້ວມູນຄ່າສົ່ງອອກຜະລິດຕະພັນກະສິກຳ ໃນ 5 ເດືອນຕົ້ນປີ 2025 ບັນລຸໄດ້ 977 ລ້ານໂດລາ ເທົ່າກັບ 65% (ແຜນການຕາມສະພາຮັບຮອງ 1,500 ລ້ານໂດລາ).

ຂ່າວ: ຄຳປະສິດ

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຂຶ້ນລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໄລຍະ 6 ເດືອນຕົ້ນປີ 2025 ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2025 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີIXໃນຕອນເຊົ້າວັນທີ 9 ມິຖຸນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

 

ທ່ານ ນາຍົກລັດຖະມົນຕີ ໄດ້ກ່າວໃຫ້ຮູ້ວ່າ: ໃນຕົ້ນປີ 2025, ສະພາບການສາກົນ ແລະ ພາກພື້ນຜັນແປໄປຢ່າງໄວວາ, ສັບສົນ ແລະ ຄາດຄະເນໄດ້ຍາກ ໄດ້ສົ່ງຜົນກະທົບທັງທາງກົງ ແລະ ທາງອ້ອມ ໃນລະດັບທີ່ແຕກຕ່າງກັນ ຕໍ່ການພັດທະນາເສດຖະກິດ-ສັງຄົມແຫ່ງຊາດຂອງປະເທດເຮົາ; ສຳລັບປະເທດເຮົາ, ໃນໄລຍະ 5 ເດືອນຕົ້ນປີຜ່ານມາ, ນອກຈາກຖືກຜົນກະທົບຈາກປັດໄຈພາຍນອກ ໂດຍສະເພາະການຂຶ້ນພາສີຂອງສະຫະລັດອາເມຣິກາ 48% ຕໍ່ປະເທດເຮົາ ທີ່ກະທົບຕໍ່ການສົ່ງອອກສິນຄ້າແລ້ວ ຍັງຈະສົ່ງຜົນກະທົບຕໍ່ການລົງທຶນຕ່າງປະເທດ ທີ່ເຂົ້າມາປະເທດເຮົາ, ສຳລັບພາຍໃນປະເທດ ກໍຍັງສືບຕໍ່ປະສົບຄວາມຫຍຸ້ງຍາກ ທາງດ້ານເສດກຖະກິດ-ການເງິນ ເປັນຕົ້ນບັນຫາເງິນເຟີ້, ລາຄາສິນຄ້າທີ່ເພີ່ມຂຶ້ນ ແລະ ໜີ້ສິນຕ່າງປະເທດ, ແຕ່ພາຍໃຕ້ການນໍາພາ-ຊີ້ນໍາຢ່າງໃກ້ຊິດຂອງສູນກາງພັກ ກໍຄືການຕິດຕາມກວດກາ ແລະ ສະໜັບສະໜູນຢ່າງເປັນປົກກະຕິຂອງສະພາແຫ່ງຊາດ ແລະ ປະກອບສ່ວນເຂົ້າຮ່ວມຂອງທຸກພາກສ່ວນໃນສັງຄົມ, ລັດຖະບານ ແລະ ອົງການປົກຄອງທ້ອງຖິ່ນ ໄດ້ເປັນເຈົ້າການຈັດຕັ້ງປະຕິບັດທິດທາງ ວຽກງານທີ່ວາງອອກ ແລະ ສືບຕໍ່ສຸມໃສ່ແກ້ໄຂບັນຫາລວມຂອງຊາດ ຊຶ່ງໄດ້ເຮັດໃຫ້ເສດຖະກິດ-ສັງຄົມຂອງປະເທດເຮົາ ສືບຕໍ່ຂະຫຍາຍຕົວຢ່າງຕໍ່ເນື່ອງ.

ທ່ານ ສອນໄຊ ສີພັນດອນ ກ່າວວ່າ: ການຂະຫຍາຍຕົວທາງດ້ານເສດຖະກິດ ແມ່ນໄດ້ຮັບການປະເມີນເປັນໄຕມາດ, ໄຕມາດ 1 ປີ 2025 ເສດຖະກິດຂອງປະເທດເຮົາຂະຫຍາຍຕົວໃນລະດັບ 4.5%, ຄິດເປັນມູນຄ່າໃນປີ ເທົ່າກັບ 84,207 ຕື້ກີບ ເທົ່າກັບ 22.4% ຂອງແຜນການ (ມະຕິສະພາ: 375,968 ຕື້ກີບ);ໃນນີ້, ຂະແໜງກະສິກໍາ ຂະຫຍາຍຕົວ 3.1% ກວມເອົາ20.2% (ມະຕິສະພາ: ຂະຫຍາຍຕົວ 4.3% ກວມເອົາ 22.39%); ຂະແໜງອຸດສາຫະກຳ ຂະຫຍາຍຕົວ4.7%ກວມເອົາ30.9% (ມະຕິສະພາ: ຂະຫຍາຍຕົວ4.3%ກວມເອົາ30.36%);ຂະແໜງບໍລິການຂະຫຍາຍຕົວ4.7%ກວມເອົາ37.1% (ມະຕິສະພາ: ຂະຫຍາຍຕົວ5.5%ກວມເອົາ34.29%)ແລະພາສີ-ອາກອນຜະລິດຕະພັນສຸດທິຂະຫຍາຍຕົວ4.3%ກວມເອົາ11.7% (ມະຕິສະພາ: ຂະຫຍາຍຕົວ4.5%ກວມເອົາ13.0%).

ທ່ານ ສອນໄຊ ສີພັນດອນ ໄດ້ກ່າວຕື່ມວ່າ: ລັດຖະບານໄດ້ເອົາໃຈໃສ່ຈັດຕັ້ງປະຕິບັດແຜນງົບປະມານແຫ່ງລັດຕາມທິດບຸກທະລຸແລະເປັນເຈົ້າຕົນເອງສູງຂຶ້ນໂດຍນໍາໃຊ້ຫຼາຍມາດຕະການຄວບຄູ່ກັນໄປເຊັ່ນ: ການຫັນເປັນທັນສະໄໝ, ການກວດກາ, ຕ້ານແລະສະກັດກັ້ນການຮົ່ວໄຫຼຂອງລາຍຮັບງົບປະມານເປັນຕົ້ນການລັກລອບໜີພາສີ-ຫຼົບຫຼີກອາກອນ. ພ້ອມນັ້ນ,ກໍໄດ້ມອບຄວາມຮັບຜິດຊອບໃຫ້ທ້ອງຖິ່ນເປັນເຈົ້າຕົນເອງຫຼາຍຂຶ້ນຊຶ່ງຜ່ານການປະຕິບັດໃນໄລຍະ5ເດືອນສາມາດສັງລວມໄດ້ດັ່ງນີ້:ດ້ານລາຍຮັບງົບປະມານ,ຮອດວັນທີ6ມິຖຸນາ2025ສາມາດເກັບລາຍຮັບງົບປະມານໄດ້ທັງໝົດ33,565ຕື້ກີບເທົ່າກັບ49%ຂອງແຜນການປີ (ແຜນການປີ68,100ຕື້ກີບຫຼືເທົ່າກັບ8.95%ຂອງGDP (ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ29%ເປັນເງິນປະມານ7,607ຕື້ກີບ);ໃນນັ້ນ: ລາຍຮັບພາຍໃນປະຕິບັດໄດ້31,892ຕື້ກີບເທົ່າກັບ51%ຂອງແຜນການປີ (ສູນກາງປະຕິບັດໄດ້21,631ຕື້ກີບເທົ່າກັບ50%ຂອງແຜນການປີແລະທ້ອງຖິ່ນປະຕິບັດໄດ້10,261ຕື້ກີບເທົ່າກັບ53%ຂອງແຜນການປີ). ຄາດຄະເນ 6 ເດືອນຕົ້ນປີ 2025 ຈະສາມາດເກັບລາຍຮັບໄດ້ປະມານ37,100ຕື້ກີບເທົ່າກັບ54.42%ຂອງແຜນການປີ.

ດ້ານລາຍຈ່າຍງົບປະມານ: ປະຕິບັດໄດ້22,968ຕື້ກີບເທົ່າກັບ32%ຂອງແຜນການປີ (ແຜນການປີ71,850ຕື້ກີບ), ຄາດຄະເນ6 ເດືອນຕົ້ນປີ2025ຈະປະຕິບັດໄດ້ປະມານ36,380ຕື້ກີບເທົ່າກັບ50.63%ຂອງແຜນການປີ. ລາຍຈ່າຍສ່ວນໃຫຍ່ແມ່ນສຸມໃສ່ລາຍຈ່າຍບູລິມະສິດຂອງລັດຖະບານເຊັ່ນ:ການເບີກຈ່າຍເງິນເດືອນ,ເງິນອຸດໜູນຄ່າຄອງຊີບໃຫ້ພະນັກງງານ-ລັດຖະກອນ, ທະຫານ, ຕໍາຫຼວດ, ພະນັກງານບໍານານແລະຜູ້ເສຍອົງຄະລວມທັງການປະຕິບັດເງິນອຸດໜູນຕໍ່ຄູອາສາສະໝັກແລະເງິນເດືອນຂັ້ນຕໍ່າຂອງພະນັກງານ-ລັດຖະກອນ (2,200,000ກີບ/ຕົ້ນເດືອນ) ເລີ່ມປະຕິບັດແຕ່ເດືອນມັງກອນ2025ເປັນຕົ້ນມາ. ພ້ອມກັນນັ້ນ,ໄດ້ອະນຸມັດໃຫ້ແຂວງເລີ່ມນໍາໃຊ້ເງິນເກີນແຜນປີ2024 ເຂົ້າໃນວຽກງານຈໍາເປັນ, ວຽກງານຈຸດສຸມແລະແກ້ໄຂໜີ້ສິນຂອງແຂວງຈໍານວນທັງໝົດ4,257ຕື້ກີບໂດຍເລີ່ມປະຕິບັດນັບແຕ່ທ້າຍເດືອນມີນາ2025ເປັນຕົ້ນມາ.

ນອກຈາກນີ້, ທ່ານ ນາຍົກລັດຖະມົນຕີ ຍັງໃຫ້ຮູ້ກ່ຽວກັບການແກ້ໄຂໜີ້ສິນພາຍໃນແລະຕ່າງປະເທດ ຊຶ່ງໄດ້ສືບຕໍ່ແກ້ໄຂໜີ້ສິນພາຍໃນແລະຕ່າງປະເທດໃຫ້ສໍາເລັດຕາມສັນຍາໂດຍຮັບປະກັນບໍ່ໃຫ້ປະເທດເຮົາຕົກເປັນປະເທດທີ່ບໍ່ສາມາດຊໍາລະໜີ້ສິນໄດ້;ໃນນັ້ນສາມາດສະສາງໜີ້ສິນພາຍໃນໄດ້ທັງໝົດ2,301ຕື້ກວ່າກີບທຽບເທົ່າ13.54%ຂອງແຜນປີ;ສາມາດສະສາງໜີ້ສິນຕ່າງປະເທດໄດ້ທັງໝົດ533.58ລ້ານໂດລາທຽບເທົ່າ29.38% ຂອງແຜນປີ.

 

ຂະແໜງອຸດສາຫະກຳ ແມ່ນໜຶ່ງໃນຂະແໜງການທີ່ສຳຄັນ ທີ່ເປັນໜຶ່ງໃນປັດໄຈຕົ້ນຕໍ ຊຸກຍູ້ການຂະຫຍາຍຕົວຂອງເສດຖະກິດ ເພື່ອຊ່ວຍໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ ຊຶ່ງໃນ 5 ເດືອນຕົ້ນປີ 2025 ຂະແໜງການນີ້ມີຫຼາຍດ້ານການຂະຫຍາຍຕົວ ເປັນຕົ້ນດ້ານອຸດສາຫະກຳປຸ່ງແຕ່ງ ແລະ ຫັດຖະກໍາ ທີ່ຂະຫຍາຍຕົວ ເພີ່ມຂຶ້ນ 8.83%.

ບົດລາຍງານຂອງ ທ່ານສອນໄຊສີພັນດອນນາຍົກລັດຖະມົນຕີໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດແລະແຜນເງິນຕາໃນໄລຍະ6ເດືອນຕົ້ນປີ2025ແລະທິດທາງແຜນວຽກຈຸດສູມ6ເດືອນທ້າຍປີ2025 ຕິດພັນກັບການຈັດຕັ້ງປະຕິບັດ2 ວາລະແຫ່ງຊາດແລະການແກ້ໄຂບັນຫາເຄັ່ງຮ້ອນທາງດ້ານເສດຖະກິດຕໍ່ກອງປະຊຸມສະໄໝສາມັນເທື່ອທີ9 ຂອງສະພາແຫ່ງຊາດຊູດທີIX ໃນວັນທີ9ມິຖຸນາ ຜ່ານມາໂດຍການເປັນປະທານຂອງທ່ານໄຊສົມພອນພົມວິຫານປະທານສະພາແຫ່ງຊາດ; ໄດ້ໃຫ້ຮູ້ວ່າ: ດ້ານອຸດສາຫະກໍາປຸງແຕ່ງ ແລະ ຫັດຖະກໍາ ໃນ3ເດືອນຕົ້ນປີ2025ມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາ ປະຕິບັດໄດ້ 4,913.06 ຕື້ກີບ ເທົ່າກັບ 25.03%ຂອງແຜນການ, ເພີ່ມຂຶ້ນ 14.97%ເມື່ອທຽບໃສ່ໄລຍະດຽວ ກັນຂອງປີຜ່ານມາ, ໄລຍະ 5 ເດືອນຕົ້ນປີ ປະຕິບັດໄດ້ 7,686.23ຕື້ກີບ, ເທົ່າກັບ 42.61%ຂອງແຜນການ, ເພີ່ມຂຶ້ນ 8.83%ເມື່ອທຽບໃສ່ໄລຍະດຽວກັນຂອງປີຜ່ານມາ.

ໃນການຂະຫຍາຍຕົວດັ່ງກ່າວນີ້, ໂຄງປະກອບຂອງມູນຄ່າການຜະລິດອຸດສາຫະກໍາປຸງແຕ່ງທີ່ກວມສັດສ່ວນສູງກວ່າໝູ່ແມ່ນການຜະລິດສະບຽງອາຫານກວມເອົາ24.23%,ການຜະລິດເຄື່ອງດື່ມກວມ17.08%,ການຜະລິດເຄື່ອງນຸ່ງຫົ່ມກວມ12.44%,ການຜະລິດເຈ້ຍແລະຜະລິດຕະພັນເຈ້ຍກວມ7.84%,ການຜະລິດເຄື່ອງໃຊ້ໄຟຟ້າແລະເຄື່ອງເອເລັກໂຕຼນິກ (ຊິ້ນສ່ວນກ້ອງຖ່າຍຮູບ,ໝໍ້ຫຸງເຂົ້າ,ພັດລົມ,ສາຍໄຟຟ້າ,ດອກໄຟແລະອື່ນໆ) ກວມ5.74%,ການຜະລິດແຮ່ທາດອື່ນໆທີ່ບໍ່ແມ່ນໂລຫະ (ຊີມັງ, ຂົບຫີນ, ເສົາໄຟຟ້າ, ດິນຈີ່, ດິນບ໋ອກ, ກະເບື້ອງ, ແລະອື່ນໆ) ກວມ5.61%,ການຜະລິດຢາງແລະຜະລິດຕະພັນປລາສຕິກກວມ4.06%.ໃນໄລຍະ 6 ເດືອນຕົ້ນປີຄາດວ່າປະຕິບັດໄດ້10,010,95ຕື້ກີບເທົ່າກັບ51%ຂອງແຜນການ (ມະຕິສະພາ: 19,629.31ຕື້ກີບ) ເພີ່ມຂຶ້ນ8,51%ເມື່ອທຽບໃສ່ໄລຍະດຽວກັນຂອງປີຜ່ານມາ; ໃນນີ້: ໂຄງປະກອບຂອງມູນຄ່າການຜະລິດອຸດສາຫະກໍາປຸງແຕ່ງທີ່ມີອັດຕາສ່ວນສູງກວ່າໝູ່ແມ່ນການຜະລິດສະບຽງອາຫານກວມເອົາ24.24%,ການຜະລິດເຄື່ອງດື່ມກວມ17.07%,ການຜະລິດເຄື່ອງນຸ່ງຫົ່ມກວມ12.30%,ການຜະລິດເຈ້ຍແລະຜະລິດຕະພັນເຈ້ຍກວມ8.25%,ການຜະລິດເຄື່ອງໃຊ້ໄຟຟ້າແລະເຄື່ອງເອເລັກໂຕຼນິກກວມ5.79%,ການຜະລິດຜະລິດຕະພັນແຮ່ທາດອື່ນໆທີ່ບໍ່ແມ່ນໂລຫະ (ຊີມັງ, ຂົບຫີນ, ເສົາໄຟຟ້າ, ດິນຈີ່, ດິນບ໋ອກ, ກະເບື້ອງ, ແລະອື່ນໆ) ກວມ5.59%ແລະການຜະລິດຢາງແລະຜະລິດຕະພັນປລາສຕິກກວມ4.05%.

ນອກຈາກນັ້ນ, ລັດຖະບານ ຍັງໄດ້ສຸມໃສ່ວຽກງານຈໍານວນໜຶ່ງທີ່ຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໂດຍສະເພາະການຊຸກຍູ້ສົ່ງເສີມການຜະລິດເປັນສິນຄ້າເພື່ອທົດແທນການນໍາເຂົ້າຊຶ່ງມີຜົນສໍາເລັດທີ່ພົ້ນເດັ່ນຄື: ໄດ້ຊຸກຍູ້ສົ່ງເສີມການຜະລິດສິນຄ້າໜຶ່ງເມືອງໜຶ່ງຜະລິດຕະພັນ(ODOP) ນັບແຕ່ເດືອນມັງກອນ 2025 ຮອດປັດຈຸບັນແມ່ນສາມາດອອກອະນຸຍາດສິນຄ້າODOPໄດ້ຈໍານວນ 23ຫົວໜ່ວຍແລະ54 ຜະລິດຕະພັນ.

ການຜະລິດສິນຄ້າອຸດສາຫະກໍາເຄື່ອງກໍ່ສ້າງໃນໄລຍະ5ເດືອນຕົ້ນປີ2025:ການຜະລິດຊີມັງໄດ້3,426,823.50ໂຕນ,ສາມາດຕອບສະໜອງການຊົມໃຊ້ພາຍໃນໄດ້ຢ່າງພຽງພໍແລະສາມາດສົ່ງອອກໄປ465,497ໂຕນ,ແຕ່ເຖິງຢ່າງໃດກໍຕາມກໍຍັງມີການນໍາເຂົ້າ217,968.75 ໂຕນຊຶ່ງຈໍານວນໜື່ງແມ່ນການນໍາເຂົ້າເພື່ອຮັບໃຊ້ໂຄງການບໍ່ສາມາດຜະລິດໄດ້ຕາມຄຸນນະພາບແລະມາດຕະຖານທີ່ກໍານົດ; ການຜະລິດເຫຼັກເສັ້ນແລະເຫຼັກຮູບປະພັນໄດ້194,777.01ໂຕນ, ສາມາດຕອບສະໜອງການຄວາມຕ້ອງການຢູ່ຕະຫຼາດພາຍໃນໄດ້51.61%,ສົ່ງອອກ30,959.31ໂຕນແລະມີການນໍາເຂົ້າ213,612.13ໂຕນຊຶ່ງສ່ວນໃຫຍ່ແມ່ນການນາເຂົ້າເພື່ອຮັບໃຊ້ໂຄງການແລະເຫຼັກຮູບປະພັນບາງປະເພດທີ່ບໍ່ສາມາດຜະລິດໄດ້ຢູ່ພາຍໃນເຊັ່ນ: ໂຄງການພະລັງງານລົມ, ເຂື່ອນໄຟຟ້າ,ການກໍ່ສ້າງໃນເຂດພື້ນທີ່ຂຸດຄົ້ນແຮ່ທາດໂປຕາສແລະອື່ນໆເປັນຕົ້ນ;ການຜະລິດທໍ່ຢາງໄດ້6,967.50ໂຕນ,ສາມາດຕອບສະໜອງການຄວາມຕ້ອງການຢູ່ຕະຫຼາດພາຍໃນໄດ້30.73%,ຊຶ່ງບໍ່ມີການສົ່ງອອກ, ແຕ່ມີການນໍາເຂົ້າ15,707.96ໂຕນ;ການຜະລິດນໍ້າສີໄດ້8,060.50ໂຕນ,ສາມາດຕອບສະໜອງຄວາມຕ້ອງການຢູ່ຕະຫຼາດພາຍໃນໄດ້88.24%,ມີການສົ່ງອອກ1,683.10ໂຕນ,ແຕ່ມີການນໍາເຂົ້າ2,757.05ໂຕນ.

ຖືເອົາການແກ້ໄຂບັນຫາເຄັ່ງຮ້ອນ ເປັນວຽກບູລິມະສິດໃນວຽກຈຸດສຸມ ແຕ່ນີ້ຮອດໝົດປີ 2025

ລັດຖະບານ ເຫັນວ່າ ບັນຫາເຄັ່ງຮ້ອນ ທາງດ້ານເສດຖະກິດ, ການເງິນ, ເງິນເຟີ້, ອັດຕາແລກປ່ຽນ, ລາຄາໄຟຟ້າ ແລະ ລາຄາສິນຄ້າເພີ່ມສູງຂຶ້ນ ກະທົບຕໍ່ການດຳລົງຊີວິດຂອງພະນັກງານ-ລັດຖະກອນ, ທະຫານ-ຕໍາຫຼວດ, ປະຊາຊົນບັນດາເຜົ່າ ຊຶ່ງແຕ່ນີ້ຮອດໝົດປີ 2025 ລັດຖະບານກໍໄດ້ຖືເອົາການແກ້ໄຂບັນຫາດັ່ງກ່າວ ເປັນວຽກບູລິມະສິດໃນວຽກຈຸດສຸມ ເພື່ອຈະແກ້ໄຂບັນຫາເຄັ່ງຮ້ອນນັ້ນ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຂຶ້ນມີຄໍາເຫັນເພີ່ມຕື່ມ ເພື່ອອະທິບາຍຊີ້ແຈງ ໃນຫຼາຍຄໍາຊັກຖາມຂອງສະພາແຫ່ງຊາດ ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ໃນວັນທີ 11 ມິຖຸນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ; ໃນໂອກາດນີ້, ທ່ານ ສອນໄຊ ສີພັນດອນ ໄດ້ກ່າວວ່າ: ລັດຖະບານຖືເອົາການແກ້ໄຂເງິນເຟີ້, ອັດຕາແລກປ່ຽນ, ລາຄາສິນຄ້າແລະແກ້ໄຂໜີ້ສິນເປັນວຽກບູລິມະສິດໃນວຽກຈຸດສຸມແຕ່ນີ້ຮອດໝົດປີ2025, ວຽກຈຸດສຸມແລະມາດຕະການລະອຽດຄະນະ19/ກມສພໄດ້ລາຍງານຕໍ່ກົມການເມືອງສູນກາງພັກຮັບຮອງແລະຊີ້ນໍາລະອຽດແລ້ວແລະແຕ່ລະເດືອນຄະນະສະເພາະກິດ19/ກມສພໄດ້ຈັດປະຊຸມຕີລາຄາການຈັດຕັ້ງປະຕິບັດແລະລາຍງານຂໍທິດຊີ້ນໍາຈາກກົມການເມືອງສູນກາງພັກເປັນປົກກະຕິ.

ທ່ານ ນາຍົກລັດຖະມົນຕີ ໄດ້ຍົກບາງວຽກຈຸດສຸມ, ບາງມາດຕະການແລະວິທີການປະຕິບັດຈໍານວນໜຶ່ງກ່ຽວກັບທິດທາງໃນການແກ້ໄຂບັນຫາເຄັ່ງຮ້ອນ ຄືກ່ອນອື່ນແມ່ນຕ້ອງໄດ້ສືບຕໍ່ສຸມໃສ່ແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາຕ່າງປະເທດໃຫ້ມີຄວາມສະຖຽນແລະສູ້ຊົນໝົດປີ2025ໃຫ້ຕົວເລກເງິນເຟີ້ຫຼຸດລົງເປັນ 1ຕົວເລກ (ອັນນີ້ກໍຍັງເປັນສິ່ງທ້າທາຍສົມຄວນ);ພ້ອມນີ້, ລັດຖະບານກໍຍູ້ແຮງການຜະລິດພາຍໃນເພື່ອຊົມໃຊ້ພາຍໃນແລະສົ່ງອອກໃຫ້ແຂງແຮງເພື່ອຫຼຸດຜ່ອນການນໍາເຂົ້າສິນຄ້າແລະການໄຫຼອອກເງິນຕາຕ່າງປະເທດ;ນໍາໃຊ້ມາດຕະການຕ່າງໆເພື່ອເພີ່ມຄັງສໍາຮອງເງິນຕາຕ່າງປະເທດໃຫ້ຫຼາຍຂຶ້ນເພື່ອຫຼຸດຜ່ອນຄວາມກົດດັນທາງດ້ານອັດຕາແລກປ່ຽນແລະອັດຕາເງິນເຟີ້ແລະຄັງສະສົມແຫ່ງຊາດໃຫ້ເພີ່ມຂຶ້ນຕື່ມ;ເອົາໃຈໃສ່ຄຸ້ມຄອງລາຄາສິນຄ້າໃນທ້ອງຕະຫຼາດໃຫ້ຫຼຸດລົງກວ່າເກົ່າ, ຫຼຸດຄວາມແຕກໂຕນທີ່ບໍ່ສົມເຫດສົມຜົນລະຫວ່າງລາຄາຊື້ແລະລາຄາຂາຍຂອງພໍ່ຄ້າຄົນກາງ; ພ້ອມກັນນັ້ນ, ຈະໄດ້ທົບທວນຄືນລາຄາໄຟຟ້າສໍາລັບກຸ່ມເປົ້າໝາຍຄົວເຮືອນທີ່ມີລາຍຮັບຕໍ່າແນໃສ່ແກ້ໄຂບັນຫາຄ່າຄອງຊີບຂອງປະຊາຊົນແລະພະນັກງານ-ລັດຖະກອນ, ທະຫານ, ຕໍາຫຼວດໃຫ້ດີຂຶ້ນ.

ນອກນີ້, ລັດຖະບານ ຈະສຸມໃສ່ເກັບລາຍຮັບງົບປະມານຕາມຖານລາຍຮັບທີ່ມີແລ້ວໃຫ້ຄົບຖ້ວນດ້ວຍການຍູ້ແຮງການຫັນເປັນທັນສະໄໝ ໂດຍສະເພາະການເກັບລາຍຮັບພາສີ-ອາກອນຢູ່ດ່ານສາກົນ, ການເກັບລາຍຮັບຄ່າທໍານຽມແລະຄ່າບໍລິການ, ລາຍຮັບຈາກທີ່ດິນ...ຄຽງຄູ່ກັນນັ້ນກໍຈະໄດ້ເອົາໃຈໃສ່ຄຸ້ມຄອງລາຍຈ່າຍງົບປະມານແຫ່ງລັດຢ່າງເຂັ້ມງວດແລະບົນຈິດໃຈປະຢັດ; ສຸມໃສ່ແກ້ໄຂໜີ້ສິນຕ່າງປະເທດໃຫ້ຊໍາລະໄປຕາມສັນຍາແລະເຈລະຈາກັບບັນດາປະເທດເຈົ້າໜີ້ຈໍານວນໜຶ່ງເພື່ອດັດປັບໂຄງສ້າງໜີ້ຊຶ່ງສັງລວມແລ້ວລັດຖະບານຕ້ອງຮັບປະກັນບໍ່ໃຫ້ປະເທດເຮົາຕົກເປັນປະເທດທີ່ບໍ່ສາມາດຊໍາລະໜີ້ໄດ້;ພ້ອມກັນນັ້ນ,ກໍສຸມໃສ່ແກ້ໄຂໜີ້ສິນໂຄງການລົງທຶນຂອງລັດຊຶ່ງນອກຈາກໃຫ້ບູລິມະສິດໃນການຈັດສັນແຫຼ່ງທຶນປົກກະຕິແລ້ວລັດຖະບານຍັງສຸມງົບປະມານບ້ວງເງິນເກີນແຜນຂອງສູນກາງແລະທ້ອງຖິ່ນເພື່ອມາແກ້ໄຂໜີ້ສິນແບບມີສ່ວນຫຼຸດຕື່ມອີກໂດຍຈະເອົາງົບບ້ວງເກີນແຜນປີ2024ພູດຂອງສູນກາງສ່ວນໜຶ່ງ (500-800ຕື້ກີບ).

ທ່ານ ສອນໄຊ ສີພັນດອນ ຍັງກ່າວຕື່ມວ່າ: ລັດຖະບານຍັງຈະສຸມໃສ່ແກ້ໄຂບັນຫາລົດເຖື່ອນ, ການລັກລອບຂຸດຄົ້ນແຮ່ທາດ, ການລັກລອບຕັດໄມ້ແລະຂຸດຄົ້ນຊັບພະຍາກອນແຮ່ທາດທີ່ບໍ່ຖືກຕ້ອງໂດຍໄດ້ມອບໃຫ້ ທ່ານຮອງນາຍົກລັດຖະມົນຕີຜູ້ຊີ້ນໍາວຽກງານຂົງເຂດເສດຖະກິດແລະການພົວພັນຮ່ວມມືກັບຕ່າງປະເທດເປັນຫົວໜ້າຄະນະ (ຄະນະ47/ນຍ)ຊຶ່ງຄະນະດັ່ງກ່າວພວມສຸມໃສ່ແກ້ໄຂເປັນແຕ່ລະກໍລະນີ.

(ຂ່າວ: ສຸກສະຫວັນ, ພາບ: ອ່າຍຄໍາ)

ລັດຖະບານສຸມໃສ່ 5 ວຽກຈຸດສຸມໃນການຈັດຕັ້ງປະຕິບັດວາລະແຫ່ງຊາດ

ລັດຖະບານ ໄດ້ສຸມໃສ່ຈັດ​ຕັ້ງປະຕິບັດວາລະແຫ່ງຊາດຕາມ 5 ວຽກຈຸດສຸມທີ່ສະພາແຫ່ງຊາດໄດ້ຮັບຮອງ. ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ໃນວັນທີ 11 ມິຖຸນານີ້ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.ທ່ານ ສອນໄຊ ສີພັນດອນ ນາຍົກລັດຖະມົນຕີໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ (ສສຊ).

ທ່ານ ສອນໄຊ ສີພັນດອນ ກ່າວວ່າ: ລັດຖະບານໄດ້ສຸມໃສ່ປະຕິບັດວາລະແຫ່ງຊາດຕາມ 5 ວຽກຈຸດສຸມທີ່ສະພາແຫ່ງຊາດໄດ້ຮັບຮອງຄື: ຈຸດສຸມທີ 1) ການສົ່ງເສີມການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ; ຈຸດສຸມທີ 2) ການສ້າງຄວາມເຂັ້ມແຂງທາງດ້ານການເກັບລາຍຮັບເຂົ້າງົບປະມານ; ຈຸດສຸມທີ3) ຍົກສູງປະສິດທິຜົນການຄຸ້ມຄອງລາຍຈ່າຍງົບປະມານຂອງລັດ; ຈຸດສຸມທີ 4) ການຮັກສາສະຖຽນລະພາບເງິນຕາ; ຈຸດສຸມທີ 5) ຍົກສູງປະສິດທະພາບຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ.

ຜ່ານການຈັດຕັ້ງປະຕິບັດ 5 ຈຸດສຸມດັ່ງກ່າວໄດ້ມີຜົນສໍາເລັດຫຼາຍດ້ານເຊັ່ນ: ມູນຄ່າການສົ່ງອອກສິນຄ້າທັງໝົດໃນ 5 ເດືອນຕົ້ນປີ 2025 ປະຕິບັດໄດ້ 5,313 ລ້ານໂດລາຫຼື ເທົ່າກັບ 53.70% ຂອງແຜນການປີເພີ່ມຂຶ້ນ 29.70% ທຽບໃສ່ໄລຍະດຽວຂອງປີຜ່ານມາ. ໃນນັ້ນ, ສາມາດສົ່ງອອກຜະລິດຕະພັນກະສິກຳໃນ 5 ເດືອນຕົ້ນປີ 2025 ບັນລຸໄດ້ 977 ລ້ານໂດລາເທົ່າກັບ 65% ຂອງແຜນການປີ (ຈຸດສຸມທີ 1);ການເກັບລາຍຮັບໄດ້ເກີນແຜນເປັນປີທີ 4 ຕິດຕໍ່ກັນສາມາດມີເງິນຊໍາລະໜີ້ສິນຕ່າງປະເທດໄດ້ຕາມສັນຍາ ແລະ ລາຍຮັບພາຍໃນສາມາດກຸ້ມລາຍຈ່າຍບໍລິຫານປົກກະຕິ ສາມາດເພີ່ມເງິນອຸດໜູນໃຫ້ພະນັກງານ-ລັດຖະກອນ, ທະຫານ, ຕຳຫຼວດຕໍ່າສຸດໄດ້ 2,200,000ກີບຕໍ່ຄົນຕໍ່ເດືອນ (ຈຸດສຸມທີ 2);ໄດ້ປັບປຸງກົນໄກການຄຸ້ມຄອງລາຍຈ່າຍງົບປະມານຮັດກຸມກວ່າເກົ່າໂດຍສະເພາະການໂອນລາຍຮັບງົບປະມານຂອງຫົວໜ່ວຍງົບປະມານຕ່າງໆເຂົ້າບັນຊີລວມສູນຄັງເງິນແຫ່ງຊາດຢູ່ ທະນາຄານແຫ່ງ ສປປ ລາວ ຈໍານວນເງິນທຽບເປັນເງິນກີບທັງໝົດ 26,822 ຕື້ກີບ ເພີ່ມຂຶ້ນ 6,996 ຕື້ກີບ ຫຼື 35.29% ທຽບໃສ່ປີຜ່ານມາ (ເມື່ອກ່ອນຫົວໜ່ວຍງົບປະມານຕ່າງໆເປີດຢູ່ທະນາຄານທຸລະກິດ) ຫັນການຊຳລະສະສາງງົບປະມານຂອງລັດຜ່ານທະນາຄານຫຼາຍຂຶ້ນເປັນແຕ່ລະປີ (ຈຸດສຸມທີ 3);ສາມາດຄວບຄຸມອັດຕາແລກປ່ຽນໃຫ້ມີຄວາມສະຖຽນກວ່າເກົ່າ. ອັດຕາແລກປ່ຽນໃນລະບົບທະນາຄານ ແລະ ນອກລະບົບຍັບໃກ້ເຂົ້າຫາກັນເມື່ອທຽບໃສ່ເມື່ອກ່ອນສາມາດແກ້ໄຂບັນຫາການລັກລອບແລກປ່ຽນເພື່ອເກງກຳໄລ, ຄວບຄຸມອັດຕາເງິນເຟີ້ຫຼຸດລົງເປັນແຕ່ລະເດືອນ (ເງິນເຟີ້ເດືອນມັງກອນ 2025 ຢູ່ໃນລະດັບ 15.5% ເດືອນກຸມພາ 12.7% ເດືອນມີນາ 11.2% ແລະ ໃນເດືອນເມສາ 2025 ຢູ່ໃນລະດັບ 11.1% ໃນເດືອນພຶດສະພາຢູ່ໃນລະດັບ 8.3%) ສັງລວມແລ້ວອັດຕາເງິນເຟີ້ສະເລ່ຍ 5 ເດືອນຕົ້ນປີຢູ່ໃນລະດັບ 11.76% (ຫຼຸດລົງຫຼາຍຖ້າທຽບໃສ່ໄລຍະດຽວກັນຂອງປີ 2024 ຢູ່ໃນລະດັບ 24.77%).ຄາດວ່າໝົດປີອັດຕາເງິນເຟີ້ຈະຢູ່ໃນລະດັບບໍ່ເກີນ 1 ຕົວເລກຕາມຄາດໝາຍທີ່ວາລະແຫ່ງຊາດກໍານົດແມ່ນບໍ່ເກີນ 9% (ຈຸດສຸມທີ 4).

ແນວໃດກໍຕາມ ລັດຖະບານກໍເຫັນວ່າຍັງມີວຽກຈຸດສຸມຈຳນວນໜຶ່ງທີ່ປະຕິບັດບໍ່ທັນໄດ້ດີເປັນຕົ້ນ ການຜະລິດເພື່ອທົດແທນການນໍາເຂົ້າຍັງບໍ່ທັນແຂງແຮງໂດຍສະເພາະການຜະລິດປຸຍ, ແນວພັນພືດ, ສັດ ຍັງບໍ່ທັນພຽງພໍການຈຳກັດການນໍາເຂົ້າສິນຄ້າຟຸມເຟືອຍ ແລະ ສິນຄ້າທີ່ພາຍໃນຜະລິດໄດ້ແລ້ວຍັງເຮັດບໍ່ໄດ້ດີໂດຍສະເພາະຜະລິດຕະພັນເຄື່ອງດື່ມທີ່ມີທາດເຫຼົ້າ, ເບຍ, ນໍ້າດື່ມ, ຊີ້ນ,ພືດຜັກຕ່າງໆ ຍັງນໍາເຂົ້າມາຕາມດ່ານທ້ອງຖິ່ນ, ດ່ານປະເພນີ ແລະ ຈຸດຂ້າມລອຍ, ລາຄາສິນຄ້າຕົວຈິງໃນທ້ອງຕະຫຼາດຍັງບໍ່ທັນຫຼຸດລົງຕາມອັດຕາເງິນເຟີ້. ສະນັ້ນ, ແຕ່ນີ້ຮອດໝົດປີ 2025 ລັດຖະບານຈະໄດ້ສຸມໃສ່ປະຕິບັດມາດຕະການຕ່າງໆເພື່ອແກ້ໄຂບັນດາຂໍ້ຄົງຄ້າງດັ່ງກ່າວ ແລະ ສືບຕໍ່ແກ້ໄຂຕາມວຽກຈຸດສຸມທີ່ໄດ້ກຳນົດໃນມະຕິ 111/ສພຊ ລົງວັນທີ 21 ພະຈິກ 2023.

(ຂ່າວ: ວັນເພັງ)

6 ເດືອນຕົ້ນປີນີ້ ສາມາດສ້າງຄອບຄົວພົ້ນທຸກໄດ້ 31,232 ຄອບຄົວ ໃນທົ່ວປະເທດ

6 ເດືອນຕົ້ນປີ 2025 ຜ່ານມາ ລັດຖະບານ ໄດ້ເອົາໃຈໃສ່ແກ້ໄຂສະພາບຂາດແຄນແຮງງານ ໂດຍສາມາດພັດທະນາສີມືແຮງງານເພື່ອນໍາເຂົ້າສູ່ຕຳແໜ່ງງານ, ຈັດຫາວຽກເຮັດງານທໍາຢູ່ພາຍໃນ ແລະ ຕ່າງປະເທດ ໄດ້ລື່ນແຜນການປີ 80.15%. ໃນນັ້ນ, ຍັງສາມາດສ້າງຄອບຄົວພົ້ນທຸກໄດ້ 31,232 ຄອບຄົວ ກວມ 89.23% ໃນທົ່ວປະເທດ.

ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໄລຍະ 6 ເດືອນ ຕົ້ນປີ 2025 ແລະ ທິດທາງແຜນວຽກຈຸດສຸມ 6 ເດືອນທ້າຍ ປີ 2025 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ການແກ້ໄຂບັນຫາເຄັ່ງຮ້ອນທາງດ້ານເສະຖະກິດ ຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ເມື່ອບໍ່ດົນຜ່ານມາ ທີ່ຫໍສະພາແຫ່ງຊາດ.

ທ່ານ ສອນໄຊ ສີພັນດອນ ໄດ້ໃຫ້ຮູ້ວ່າ: ສໍາລັບວຽກງານຂົງເຂດວັດທະນະທໍາ-ສັງຄົມ ໄດ້ເອົາໃຈໃສ່ແກ້ໄຂສະພາບຂາດແຄນແຮງງານ ໂດຍສາມາດພັດທະນາສີມືແຮງງານເພື່ອນໍາເຂົ້າສູ່ຕຳ ແໜ່ງງານໃໝ່ໄດ້ 97,793 ຄົນ ເປັນຍິງ 47,141 ຄົນ; ຈັດຫາວຽກເຮັດງານທໍາຢູ່ພາຍໃນ ແລະ ຕ່າງປະເທດ ໄດ້ 83,765 ຄົນ ເປັນຍິງ 44,772 ຄົນ ລື່ນແຜນການ ປີ 80.15% (ແຜນການ: 46,497 ຄົນ). ໃນນີ້, ຈັດຫາງານພາຍໃນ ໄດ້ 7,637 ຄົນ ແລະ ຈັດສົ່ງໄປອອກແຮງງານຢູ່ຕ່າງປະເທດ 76,128 ຄົນ; ໄດ້ສຸມໃສ່ຂະຫຍາຍອັດຕາການປົກຄຸມປະກັນສັງຄົມ ທັງພາກລັດ, ວິສາຫະກິດ ແລະ ຜູ້ສະໝັກໃຈ ໂດຍການຂຶ້ນທະບຽນໃໝ່ ໄດ້ທັງໝົດ 14,188 ຄົນ, ເທົ່າກັບ 24.25% ຂອງແຜນການປີ (ມະຕິສະພາແຫ່ງຊາດ 58,500 ຄົນ); ໄດ້ປັບປຸງວິທີການບໍລິຫານຄຸ້ມຄອງກອງທຶນໃຫ້ມີຄວາມຮັດກຸມ, ວ່ອງໄວ, ໂປ່ງໃສ, ສາມາດກວດສອບໄດ້ ແລະ ພັດທະນາລະບົບຖານຂໍ້ມູນສາມາດເຊື່ອມຕໍ່ລະຫວ່າງສູນກາງ ແລະ ທ້ອງຖິ່ນ ແລະ ເຊື່ອມຕໍ່ກັບພາກສ່ວນທາງນອກຕາມທິດຫັນເປັນທັນສະໄໝ; ໄດ້ສຸມໃສ່ຄົ້ນຄວ້າການໂຮມກອງທຶນປະກັນສຸຂະພາບເຂົ້າກັບກອງທຶນປະກັນສັງຄົມ ເປັນອັນດຽວກັນຕາມມະຕິຂອງສະພາແຫ່ງຊາດ; ໄດ້ເອົາໃຈໃສ່ມາດຕະການປ້ອງກັນ ແລະ ແກ້ໄຂໄພພິບັດ ໂດຍໄດ້ຊ່ວຍເຫຼືອສົງເຄາະໃຫ້ຜູ້ທີ່ໄດ້ຮັບຜົນກະທົບ ແລະ ປັບປຸງຟື້ນຟູພື້ນຖານໂຄງລ່າງຈຳນວນໜຶ່ງ ຢູ່ບັນດາແຂວງ ແລະ ນະຄອນຫຼວງວຽງຈັນ ທີ່ໄດ້ຮັບຜົນກະທົບຈາກໄພພິບັດໃນໄລຍະຜ່ານມາໄດ້ຢ່າງທັນການ; ໄດ້ອະນຸມັດງົບປະມານໂຄງການຟື້ນຟູສຸກເສີນ ຜົນກະທົບໄພພິບັດ ຈຳນວນ 76 ໂຄງການ ມູນຄ່າ 174.93 ກວ່າຕື້ກີບ; ໄດ້ປະຕິບັດນະໂຍບາຍສະແດງຄວາມກະຕັນຍູຮູ້ບຸນຄຸນຕໍ່ຜູ້ມີຜົນງານ, ຄຸນງາມຄວາມດີ ໃນພາລະກິດການປະຕິວັດຊາດ ປະຊາທິປະໄຕ, ໃນງວດ 1/2025 ປະຕິບັດໄດ້ 354 ທ່ານ ເປັນຍິງ 30 ທ່ານ ເປັນເງິນທັງໝົດ 6.99 ຕື້ກວ່າກີບ; ໄດ້ສຸມໃສ່ຈັດຕັ້ງປະຕິບັດ ວຽກງານເກັບກູ້ລະເບີດບໍ່ທັນແຕກ ໂດຍສຸມໃສ່ການກວດກູ້ລະເບີດບໍ່ທັນແຕກອອກຈາກພື້ນທີ່ທຳການຜະລິດ ແລະ ເຂດຊຸມຊົນໃນເນື້ອທີ່ 929 ເຮັກຕາ ເທົ່າກັບ 29.31% ຂອງແຜນການ (ແຜນການປີ 3,170 ເຮັກຕາ) ແລະ ສາມາດທໍາລາຍຖິ້ມລະເບີດຈໍານວນ 9,944 ໜ່ວຍ.

ຄຽງຄູ່ກັນນັ້ນ, ໄດ້ສຸມໃສ່ປັບປຸງ ແລະ ກໍ່ສ້າງບັນດາໂຄງລ່າງຮັບໃຊ້ການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນ ຢູ່ເຂດຊົນນະບົດ, ເຂດຫ່າງໄກສອກຫຼີກ, ເຂດລຽບຕາມຊາຍແດນ ແລະ ເຂດຈຸດສຸມພັດທະນາຊົນນະບົດໃໝ່ ໃນຂອບເຂດທົ່ວປະເທດ ໂດຍໄດ້ຈັດສັນງົບປະມານຂອງລັດໃຫ້ເປັນບຸລິມະສິດ, ພ້ອມທັງລະດົມການຊ່ວຍເຫຼືອຈາກຕ່າງປະເທດ ແລະ ປຸກລະດົມທົ່ວສັງຄົມ ມີສ່ວນຮ່ວມໃນວຽກງານດັ່ງກ່າວຫຼາຍຂຶ້ນ. ຜ່ານການປະຕິບັດຕົວຈິງ ສາມາດສ້າງຄອບຄົວພົ້ນທຸກໄດ້ 31,232 ຄອບຄົວ ກວມ 89.23% ຂອງຄາດໝາຍທີ່ກຳນົດໄວ້ (ຄາດໝາຍສູ້ຊົນ 35,000 ຄອບຄົວ); ສ້າງບ້ານພົ້ນທຸກໄດ້ 271 ບ້ານ ກວມ 54.20% ຂອງຄາດໝາຍທີ່ກຳນົດໄວ້ (ຄາດໝາຍສູ້ຊົນ 500 ບ້ານ); ສ້າງເມືອງພົ້ນທຸກໄດ້ 8 ເມືອງ ກວມ 53.33% ຂອງຄາດໝາຍທີ່ກໍານົດໄວ້ (ຄາດໝາຍສູ້ຊົນ 15 ເມືອງ); ສ້າງຄອບຄົວພັດທະນາ ໄດ້ 46,099 ຄອບຄົວ ກວມ 139.69% ປະຕິບັດໄດ້ລື່ນຄາດໝາຍ (ຄາດໝາຍສູ້ຊົນ 33,000 ຄອບຄົວ); ສ້າງບ້ານພັດທະນາ ໄດ້ 390 ບ້ານ ກວມ 78% ຂອງຄາດໝາຍທີ່ກຳນົດໄວ້ (ຄາດໝາຍສູ້ຊົນ 500 ບ້ານ); ສ້າງບ້ານໃຫຍ່ເປັນຕົວເມືອງໃນຊົນນະບົດ ໄດ້ 22 ຈຸດ; ຈັດສັນທີ່ຢູ່ອາໄສໃຫ້ປະຊາຊົນໄດ້ 497 ຄອບຄົວ ກວມ 114.78% ຂອງຄາດໝາຍສູ້ຊົນທີ່ກຳນົດໄວ້ (ຄາດໝາຍສູ້ຊົນ 433 ຄອບຄົວ); ຈັດສັນທີ່ດິນທຳການຜະລິດໃຫ້ປະຊາຊົນໄດ້ 849 ຄອບຄົວ ກວມ 73.44% ຂອງຄາດໝາຍສູ້ຊົນທີ່ກຳນົດໄວ້ (ຄາດ ໝາຍສູ້ຊົນ 1,156 ຄອບຄົວ).

(ຂ່າວ: ວັນເພັງ, ພາບ: ຕຸໄລເພັດ)