ນາຍົກລັດຖະມົນຕີ ແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 46

​ເຜີຍ​ແຜ່​ໂດຍ: admin|ຢ້ຽມ​ຊົມ: 9 ຄັ້ງ | ເວ​ລາ | 2026-03-17 15:41:27

ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 46 ໂດຍການເປັນປະທານຂອງ ມາເລເຊຍ ພາຍໃຕ້ຄຳຂວັນ “ການມີສ່ວນຮ່ວມຢ່າງທົ່ວເຖິງ ແລະ ຍືນຍົງ” ໃນວັນທີ 26 ພຶດສະພານີ້ ທີ່ ກົວລາລໍາເປີ ປະເທດມາເລເຊຍ; ພ້ອມນີ້, ກໍຍັງເຂົ້າຮ່ວມບັນດາກອງປະຊຸມສຸດຍອດທີ່ກ່ຽວຂ້ອງ ຄື: ກອງປະຊຸມພົບປະລະຫວ່າງຜູ້ນໍາອາຊຽນ ກັບ ບັນດາຜູ້ຕາງໜ້າຈາກສະມັດຊາລັດຖະສະພາລະຫວ່າງຊາດອາຊຽນ, ກອງປະຊຸມພົບປະລະຫວ່າງຜູ້ນໍາອາຊຽນ ກັບ ບັນດາຜູ້ຕາງໜ້າຊາວໜຸ່ມອາຊຽນ ແລະ ກອງປະຊຸມພົບປະ ລະຫວ່າງ ຜູ້ນໍາອາຊຽນ ກັບ ສະພາທີ່ປຶກສາທຸລະກິດອາຊຽນ.
ກອງປະຊຸມສຸດຍອດອາຊຽນ ຄັ້ງທີ 46 ແບບຄົບຄະນະ ໄດ້ແລກປ່ຽນຄໍາຄິດຄໍາເຫັນ ເພື່ອເສີມສ້າງປະຊາຄົມອາຊຽນໃຫ້ມີຄວາມເຂັ້ມແຂງ, ໄດ້ຮັບຊາບຄວາມຄືບໜ້າ ການຈັດຕັ້ງປະຕິບັດບັນດາບຸລິມະສິດ ການເປັນປະທານອາຊຽນຂອງ ມາເລເຊຍ ໃນປີ 2025 ແລະ ໄດ້ປຶກສາຫາລືທິດທາງການຮ່ວມມືຂອງອາຊຽນໃນອະນາຄົດ. ກອງປະຊຸມສຸດຍອດອາຊຽນຄັ້ງນີ້ ໄດ້ຈັດຂຶ້້ນໃນທ່າມກາງບັນຍາກາດ ທີ່ອາຊຽນພວມສະເຫຼີມສະຫຼອງການສ້າງຕັ້ງປະຊາຄົມອາຊຽນ ຄົບຮອບ 10 ປີ ແລະ ເປັນປີສຸດທ້າຍຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025. ກອງປະຊຸມໄດ້ຕີລາຄາສູງຕໍ່ຜົນສໍາເລັດ ທີ່ອາຊຽນຍາດມາໄດ້ໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດວິໄສທັດປະຊາຄົມອາຊຽນ 2015. ຜູ້ນຳອາຊຽນ ໄດ້ຮັບຮອງເອົາວິໄສທັດປະຊາຄົມອາຊຽນ 2045 ແລະ 4 ແຜນຍຸດທະສາດຄື: ແຜນຍຸດທະສາດປະຊາຄົມການເມືອງ-ຄວາມໝັ້ນຄົງອາຊຽນ, ແຜນຍຸດທະສາດປະຊາຄົມເສດຖະກິດອາຊຽນ, ແຜນຍຸດທະສາດປະຊາຄົມວັດທະນະທໍາ-ສັງຄົມອາຊຽນ ແລະ ແຜນຍຸດທະສາດການເຊື່ອມຈອດອາຊຽນ. ບັນດາເອກະສານດັ່ງກ່າວ, ເປັນທິດທາງໃນການຮ່ວມມື ຂອງອາຊຽນສໍາລັບ 20 ປີຂ້າງໜ້າ ເພື່ອສ້າງປະຊາຄົມອາຊຽນ ໃຫ້ມີຄວາມເຂັ້ມແຂງ, ມີນະວັດຕະກໍາ, ຄ່ອງແຄ້ວ ແລະ ປະຊາຊົນເປັນໃຈກາງ. ນອກນີ້, ກອງປະຊຸມ ໄດ້ປຶກສາຫາລືການພົວພັນຮ່ວມມືກັບພາຍນອກ ໂດຍໄດ້ເນັ້ນຢໍ້າຄວາມສຳຄັນໃນການຮັດແໜ້ນ ຄວາມເປັນແກນກາງຂອງອາຊຽນ ໃນການພົວພັນຮ່ວມມືກັບພາຍນອກ ໂດຍຜ່ານບັນດາກົນໄກທີ່ອາຊຽນເປັນຜູ້ນໍາພາ. ພ້ອມນີ້, ບັນດາຜູ້ນໍາອາຊຽນ ໄດ້ເຫັນດີ ຮັບຕີມໍແລັດສະເຕ ເຂົ້າເປັນສະມາຊິກສົມບູນຂອງອາຊຽນ ພາຍໃນ ປີ 2025 ນີ້.
ໃນກອງປະຊຸມສຸດຍອດອາຊຽນຄັ້ງນີ້, ທ່ານ ສອນໄຊ ສີພັນດອນ ໄດ້ສະແດງຄວາມຂອບໃຈ ບັນດາປະເທດສະມາຊິກອາຊຽນ ແລະ ຄູ່ຮ່ວມມືພາຍນອກຂອງອາຊຽນ ຕໍ່ການສະໜັບສະໜູນ ແລະ ຮ່ວມມື ສຳລັບການດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ແລະ ໄດ້ຢືນຢັນຄືນຄວາມໝາຍໝັ້ນຂອງ ສປປ ລາວ ໃນການສືບຕໍ່ຮ່ວມມືຢ່າງໃກ້ຊິດ ກັບບັນດາປະເທດສະມາຊິກອາຊຽນ ແລະ ຄູ່ຮ່ວມມືພາຍນອກ ເພື່ອຜົນສໍາເລັດຂອງອາຊຽນໃນປີ 2025 ພາຍໃຕ້ການເປັນປະທານຂອງ ມາເລເຊຍ ກໍຄືການຈັດຕັ້ງຜັນຂະຫຍາຍ ວິໄສທັດປະຊາຄົມອາຊຽນ 2045.
ກອງປະຊຸມສຸດຍອດອາຊຽນ ຄັ້ງທີ 46 ແບບວົງແຄບ ໄດ້ປຶກສາຫາລືກ່ຽວກັບການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນໍາອາຊຽນ ກ່ຽວກັບ ມຽນມາ ແລະ ໄດ້ແລກປ່ຽນຄໍາຄິດເຫັນ ກ່ຽວກັບ ສະພາບການພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.
ໃນກອງປະຊຸມພົບປະລະຫວ່າງຜູ້ນໍາອາຊຽນ ກັບ ບັນດາຜູ້ຕາງໜ້າຈາກສະມັດຊາລັດຖະສະພາລະຫວ່າງຊາດອາຊຽນ, ຜູ້ນໍາອາຊຽນ ໄດ້ສະແດງຄວາມຊົມເຊີຍ ສະມັດຊາລັດຖະສະພາລະຫວ່າງຊາດອາຊຽນ ທີ່ໄດ້ປະກອບສ່ວນເຂົ້າໃນຂະບວນການຮັດແໜ້ນປະຊາຄົມອາຊຽນ ໃຫ້ມີຄວາມເຂັ້ມແຂງໃນໄລຍະຜ່ານມາ ກໍຄືການເຮັດໜ້າທີ່ການທູດດ້ານລັດຖະສະພາຢ່າງຕັ້ງໜ້າ ແລະ ໄດ້ສະເໜີໃຫ້ສະມັດຊາລັດຖະສະພາລະຫວ່າງຊາດອາຊຽນ ສືບຕໍ່ສະໜັບສະໜູນຂະບວນການຮັດແໜ້ນປະຊາຄົມອາຊຽນ ໃຫ້ມີຄວາມເຂັ້ມແຂງໃນການຈັດຕັ້ງປະຕິບັດ ວິໄສທັດປະຊາຄົມອາຊຽນ 2045.
ໃນກອງປະຊຸມພົບປະ ລະຫວ່າງ ຜູ້ນໍາອາຊຽນ ກັບ ບັນດາຜູ້ຕາງໜ້າຊາວໜຸ່ມອາຊຽນ, ຜູ້ນໍາອາຊຽນ ໄດ້ຮັບຊາບການປະກອບສ່ວນຂອງຊາວໜຸ່ມໃນຂະບວນການສ້າງປະຊາຄົມອາຊຽນ ໃຫ້ເຂັ້ມແຂງ ແລະ ການຈັດຕັ້ງປະຕິບັດກິດຈະກຳ ຂອງຊາວໜຸ່ມອາຊຽນ ພາຍໃຕ້ຄຳຂວັນ “ຊາວໜຸ່ມເພື່ອອະນາຄົດທີ່ຍືນຍົງ: ສົ່ງເສີມການມີສ່ວນຮ່ວມຢ່າງທົ່ວເຖິງ ແລະ ຂັບເຄື່ອນການປ່ຽນແປງໃນອາຊຽນ”. ບັນດາຜູ້ນໍາອາຊຽນ ເຫັນວ່າ ເພື່ອເຮັດໃຫ້ຊາວໜຸ່ມກາຍເປັນຜູ້ສືບທອດທີ່ເຂັ້ມແຂງໃນອະນາຄົດ ແລະ ເປັນກໍາລັງແຮງທີ່ສໍາຄັນໃນການພັດທະນາເສດຖະກິດ-ສັງຄົມ, ອາຊຽນ ຕ້ອງເພີ່ມທະວີການຮ່ວມມື ເພື່ອສ້າງກາລະໂອກາດໃຫ້ຊາວໜຸ່ມສາມາດເຂົ້າເຖິງການສຶກສາທີ່ມີຄຸນນະພາບ, ພ້ອມທັງ ໄດ້ຊຸກຍູ້ໃຫ້ຊາວໜຸ່ມອາຊຽນ ເຂົ້າເຖິງເຕັກໂນໂລຊີທີ່ທັນສະໄໝ ແລະ ນໍາໃຊ້ເຕັກໂນໂລຊີດັ່ງກ່າວ ໃຫ້ເກີດປະໂຫຍດສູງສຸດ ແລະ ອື່ນໆ.
ສ່ວນໃນກອງປະຊຸມພົບປະລະຫວ່າງ ຜູ້ນຳອາຊຽນ ກັບ ສະພາທີ່ປຶກສາທຸລະກິດອາຊຽນ, ຜູ້ນໍາອາຊຽນ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງສະພາທີ່ປຶກສາທຸລະກິດອາຊຽນໃນໄລຍະຜ່ານມາ ອັນໄດ້ປະກອບສ່ວນເຂົ້້າໃນການຮັດແໜ້ນປະຊາຄົມເສດຖະກິດອາຊຽນ ແລະ ໄດ້ຊົມເຊີຍສະພາທີ່ປຶກສາທຸລະກິດອາຊຽນ ທີ່ໄດ້ກຳນົດບັນດາບຸລິມະສິດ ແລະ ກິດຈະກຳຕ່າງໆ ສຳລັບປີ 2025 ພາຍໃຕ້ຄຳຂວັນ “ການຮວມຕະຫຼາດເພື່ອຄວາມຈະເລີນຮຸ່ງເຮືອງຮ່ວມກັນ” ແລະ ໄດ້ຊຸກຍູ້ການຈັດຕັ້ງປະຕິບັດບຸລິມະສິດເຫຼົ່ານັ້ນໃຫ້ມີປະສິດທິພາບ.

(ແຫຼ່ງ: ປະ​ຊາ​ຊົນ, ຂ່າວ-ພາບ: ກະຊວງການຕ່າງປະເທດ)