ເປີດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ຢ່າງເປັນທາງການ

​ເຜີຍ​ແຜ່​ໂດຍ: admin|ຢ້ຽມ​ຊົມ: 12 ຄັ້ງ | ເວ​ລາ | 2026-03-17 09:57:11

ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ເປີດຂຶ້ນຢ່າງເປັນທາງການໃນວັນທີ 19 ຕຸລາ 2024, ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ, ໂດຍການເຂົ້າຮ່ວມເປັນກຽດຂອງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ

ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ເປີດຂຶ້ນຢ່າງເປັນທາງການໃນວັນທີ 19 ຕຸລານີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ, ໂດຍການເຂົ້າຮ່ວມເປັນກຽດຂອງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ, ມີທ່ານເລຂາທິການໃຫຍ່ໄອປາ, ເລຂາທິການໃຫຍ່ອາຊຽນ, ສົມເດັດ, ທ່ານປະທານສະພາ, ປະທານລັດຖະສະພາຈາກບັນດາປະເທດສະມາຊິກໄອປາ ແລະ ປະເທດສັງເກດການເຂົ້າຮ່ວມ.

ທ່ານ ໄຊສົມພອນ ພົມວິຫານ ກ່າວວ່າ: ກອງປະຊຸມຄັ້ງນີ້ໄດ້ກໍານົດ ຄຳຂວັນ: “ ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ແມ່ນສອດຄ່ອງກັບຄໍາຂວັນປະທານອາຊຽນ ຂອງ ສປປ ລາວ ຄື: “ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍສຸມໃສ່ການຈັດຕັ້ງປະຕິບັດວິໄສທັດປະຊາຄົມອາຊຽນໃນປີ 2025 ເພື່ອເຮັດໃຫ້ພາກພື້ນມີິການເຊື່ອມຈອດ ແລະ ເຂັ້ມແຂງ ທັງເປັນການຊຸກຍູ້ສົ່ງເສີມຄວາມພະຍາຍາມຂອງບັນດາປະເທດສະມາຊິກອາຊຽນ ໃນການບັນລຸເປົ້າໝາຍດ້ານການພັດທະນາພື້ນຖານໂຄງລ່າງ ແລະ ລະບຽບການຕ່າງໆທີ່ມີການເຊື່ອມຈອດທາງດ້ານການຂົນສົ່ງ, ໂທລະຄົມມະນາຄົມ, ພະລັງງານ ແລະ ອື່ນໆ ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ, ການຜະລິດ, ການບໍລິການ, ການທ່ອງທ່ຽວ ແລະ ການໄປມາຫາສູ່ກັນຂອງປະຊາຊົນອາຊຽນໃຫ້ຫຼາຍຂຶ້ນ, ການເຊື່ອມໂຍງທາງດ້ານເສດຖະກິດ ການຮັດແຄບຄວາມແຕກໂຕນທາງດ້ານການພັດທະນາ, ສ້າງເສດຖະກິດອາຊຽນໃຫ້ມີຄວາມເຂັ້ມແຂງ, ເປີດກວ້າງ, ປະຊາຄົມມີຄວາມສາມັກຄີປອງດອງ, ມີການພັດທະນາທີ່ເທົ່າທຽມກັນ ແລະ ການເສີມຂະຫຍາຍການພົວພັນຮ່ວມມືອາຊຽນກັບຄູ່ຮ່ວມມືພາຍນອກ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ພ້ອມກັນກ້າວໄປຂ້າງໜ້າ.

ຂ້າພະເຈົ້າຕີລາຄາສູງຕໍ່ການປະສານສົມທົບລະຫວ່າງໄອປາ ກັບອາຊຽນ ຊຶ່ງໄດ້ມີກົນໄກພົບປະເຮັດວຽກຮ່ວມກັນເປັນລະບົບ ແລະ ມີການປັບປຸງດີຂຶ້ນ ເປັນຕົ້ນການພົບປະລະຫວ່າງຜູ້ນຳອາຊຽນກັບຜູ້ນຳໄອປາ, ການເຂົ້າຮ່ວມກອງປະຊຸມສະມັດຊາໃຫຍ່ໄອປາ ຂອງເລຂາທິການໃຫຍ່ອາຊຽນ, ການເຂົ້າຮ່ວມກອງປະຊຸມ ແລະ ກິດຈະກຳຕ່າງໆຂອງກັນ ແລະ ກັນ ກໍຄືການແລກປ່ຽນຂໍ້ມູນຂ່າວສານນຳກັນ. ໃນຂະບວນການສ້າງປະຊາຄົມອາຊຽນໃຫ້ເຂັ້ມແຂງ ກໍຄືຶການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຕໍ່ໜ້າ, ໄອປາ ແລະ ອາຊຽນຍິ່ງຈະຕ້ອງເພີ່ມທະວີການຮ່ວມມືຮັດແໜ້ນການເປັນຄູ່ຮ່ວມທີ່ສະໜັບສະໜູນການປະຕິບັດໜ້າທີ່ເຊິ່ງກັນ ແລະ ກັນ ຕາມພາລະບົດບາດຂອງຕົນ ເພື່ອເສີມສ້າງສັນຕິພາບ, ສະຖຽນລະພາບ ແລະ ການພັດທະນາແບບຢືນຍົງ ເພື່ອນຳເອົາຄວາມສົມບູນພູນສຸກມາສູ່ປະຊາຊົນໃນບັນດາປະເທດສະມາຊິກອາຊຽນຢ່າງແທ້ຈິງ.

ໃນໄລຍະດໍາເນີນກອງປະຊຸມ ຈະມີກອງປະຊຸມບັນດາກຳມາທິການປະຈຳຕ່າງໆ ຊຶ່ງຈະໄດ້ລົງເລິກຄົ້ນຄວ້າ ປຶກສາຫາລືບັນດາເນື້ອໃນ ແລະ ຮ່າງມະຕິໃນຂົງເຂດການເມືອງ, ເສດຖະກິດ, ສັງຄົມ, ແມ່ຍິງ, ຊາວໜຸ່ມ ແລະ ວຽກງານພາຍໃນຂອງໄອປາ. ນອກຈາກນີ້, ຍັງຈະມີກອງປະຊຸມລະຫວ່າງໄອປາ ກັບລັດຖະສະພາປະເທດສັງເກດການ ເພື່ອຊອກຫາຊ່ອງທາງໃນການຮ່ວມມືກັນ ແລະ ວິທີແກ້ໄຂບັນຫາ ແລະ ສິ່ງທ້າທາຍຕ່າງໆຮ່ວມກັນ, ສະໜັບສະໜູນບັນດາເປົ້າໝາຍອາຊຽນ ແນໃສ່ຮັບປະກັນການເຊື່ອມໂຍງ ແລະ ການເຕີບໂຕແບບກວມລວມ ພ້ອມກັນນີ້, ກອງປະຊຸມພວກເຮົາມີຄວາມຍິນດີທີ່ໄດ້ຕ້ອນຮັບຄູ່ຮ່ວມພັດທະນາໄອປາຈາກຫຼາຍອົງການຈັດຕັ້ງສາກົນ ຊຶ່ງເປັນໂອກາດອັນດີທີ່ຈະໄດ້ມີການແລກປ່ຽນຄຳຄິດເຫັນ ແລະ ປະສົບການກ່ຽວກັບການຍົກສູງຂີດຄວາມສາມາດໃນການປະຕິບັດໜ້າທີ່ຂອງໄອປາ ກໍຄືລັດຖະສະພາສະມາຊິກໄອປາໃຫ້ເຂັ້ມແຂງຂຶ້ນ ເພື່ອເຮັດໃຫ້ກອງປະຊຸມສະມັດຊາໃຫຍ່ໄອປາ ຄັ້ງທີ 45 ປະສົບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ໂອກາດນີ້, ທ່ານ ທອງລຸນ ສີສຸລິດ ປະທານປະເທດແຫ່ງ ສປປລາວ ໄດ້ກ່າວປາໄສຕໍ່ກອງປະຊຸມວ່າ: ກອງປະຊຸມໄອປາຄັ້ງທີ 45 ໃນຄັ້ງນີ້ດຳເນີນພາຍໃຕ້ຫົວຂໍ້ “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ເຊິ່ງເຫັນວ່າມີຄວາມສຳຄັນ ແລະ ສອດຄ່ອງກັບຄວາມພະຍາຍາມລວມຂອງອາຊຽນໃນການ ຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຄວາມພະຍາຍາມຂອງ ສປປ ລາວ ທີ່ຈະຫັນຈາກປະເທດທີ່ບໍ່ມີຊາຍເເດນຕິດກັບທະເລ ເປັນປະເທດເຊື່ອມໂຍງ-ເຊື່ອມຈອດ ໃນພາກພື້ນ ພ້ອມທັງສອດຄ່ອງກັບເປົ້າໝາຍການພັດທະນາແບບຍືນຍົງ 2030 ຂອງບັນດາປະຊາຊາດ ແນໃສ່ໃຫ້ພວກເຮົາທຸກຄົນກ້າວໄປພ້ອມກັນ, ກອງປະຊຸມຄັ້ງນີ້ຈະເປັນໂອກາດດີໃຫ້ພວກເຮົາສະແດງຄວາມຄິດເຫັນ, ວິໄສທັດ ແລະ ແລກປ່ຽນທັດສະນະຂອງຕົນຢ່າງກົງໄປກົງມາ ແລະ ສ້າງສັນເພື່ອແນໃສ່ຮັດແໜ້ນການຮ່ວມມື ແລະ ກຳນົດທິດທາງໃນຕໍ່ໜ້າສຳລັບວຽກງານ AIPA ເພື່ອສືບຕໍ່ປະກອບສ່ວນເຂົ້າໃນການສ້າງປະຊາຄົມອາຊຽນໃຫ້ມີການເຊື່ອມຈອດ ແລະ ເຂັ້ມແຂງກວ່າເກົ່າ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນຂອງບັນດາປະເທດສະມາຊິກອາຊຽນຢ່າງທົ່ວເຖິງ.

ຂ່າວ: ພູວັນ, ພາບ: ຕຸໄລເພັດ+ສຸກສະຫວັນ