ສະຫາຍ ປອ ບຸນທອງ ຈິດມະນີ,​ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ ໂອ້​ລົມ​ຕໍ່ ກອງ​ປະ​ຊຸມ​ໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX

​ເຜີຍ​ແຜ່​ໂດຍ: admin|ຢ້ຽມ​ຊົມ: 17 ຄັ້ງ | ເວ​ລາ | 2025-09-20 16:01:41

​ໃນ​ໂອ​ກາດກອງປະຊຸມໃຫຍ່ ຜູ້ແທນແມ່ຍິງລາວທົ່ວປະເທດ ຄັ້ງທີ IX ສະຫາຍ ປອ ບຸນທອງ ຈິດມະນີ,​ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ທີ່ໄດ້ໃຫ້ກຽດເຂົ້າຮ່ວມ ແລະ ມີຄໍາເຫັນໂອ້ລົມຕໍ່ກອງປະຊຸມໃຫຍ່, ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງກອງປະຊຸມ, ພ້ອມທັງເນັ້ນໃຫ້ຄະນະບໍລິຫານງານສູນກາງສະຫະພັນແມ່ຍິງລາວ ຊຸດໃໝ່ ຕ້ອງເປັນເຈົ້າການນໍາພາ-ຊີ້ນໍາ ຜັນຂະຫຍາຍເນື້ອໃນຈິດໃຈ ຂອງກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ເປັນໂຄງການ ແລະ ຫັນເປັນນິຕິກໍາລະອຽດ ຂອງສະຫະພັນແມ່ຍິງລາວແຕ່ລະຂັ້ນ, ເຊື່ອມສານເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນພັດທະນາຂອງຂະແໜງການ ແລະ ທ້ອງຖິ່ນຕົນ ເພື່ອຈັດຕັ້ງປະຕິບັດໃຫ້ເກີດຜົນເປັນຈິງ; ພ້ອມກັນຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານສູນກາງສະຫະພັນແມ່ຍິງລາວ, ສະຫະພັນແມ່ຍິງກະຊວງ-ອົງການ ແລະ ທ້ອງຖິ່ນ-ຮາກຖານ ຕະຫຼອດເຖິງສະມາຊິກພັກ, ພະນັກງານ, ສະມາຊິກສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າໃຫ້ເລິກເຊິ່ງ ແລະ ທົ່ວເຖິງ ເພື່ອສ້າງຄວາມຮັບຮູ້-ເຂົ້າໃຈ ເປັນເອກະພາບກັນ, ມີຄວາມຕື່ນຕົວເປັນເຈົ້າການເຂົ້າຮ່ວມຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງນີ້ ເຂົ້າສູ່ຊີວິດຕົວຈິງ ໃຫ້ເປັນຂະບວນການທີ່ແຂງແຮງ ແລະ ເປັນຮູບປະທໍາຢ່າງແທ້ຈິງ; ສະຫະພັນແມ່ຍິງແຕ່ລະຂັ້ນ ຕ້ອງເອົາໃຈໃສ່ປັບປຸງການຈັດຕັ້ງຂອງຕົນ ໃຫ້ມີຄວາມໜັກແໜ້ນ, ເຂັ້ມແຂງໃນທຸກດ້ານ, ເອົາໃຈໃສ່ປັບປຸງແບບແຜນນໍາພາ, ວິທີເຮັດວຽກໃຫ້ແທດຕົວຈິງ, ຕິດແທດກັບຮາກຖານ, ເຮັດວຽກມີແຜນການ, ແຜນງານ, ມີໂຄງການລະອຽດຈະແຈ້ງ, ມີການຊີ້ນໍາ, ຊຸກຍູ້, ຕິດຕາມ, ກວດກາ, ປະເມີນຜົນ, ສະຫຼຸບຖອນຖອນບົດຮຽນ ໃນແຕ່ລະໄລຍະໃຫ້ຖືກຕ້ອງສ່ອງແສງຄວາມເປັນຈິງ ຢ່າງພາວະວິໄສ; ໃຫ້ຕັ້ງໜ້າແກ້ໄຂປະກົດການຫຍໍ້ທໍ້ຕ່າງໆ ໃນຖັນແຖວເອື້ອຍນ້ອງແມ່ຍິງ ເປັນຕົ້ນ ການເຊື່ອຖືງົມງວາຍ, ການຖືກກົດໜ່ວງຈາກຮີດຄອງປະເພນີທີ່ຫຼ້າຫຼັງ ແລະ ປະກົດການຫຍໍ້ທໍ້ຕ່າງໆໃນສັງຄົມ, ການພົວພັນກັບການຄ້າຂາຍ, ການເສບສິ່ງເສບຕິດ, ການຄ້າຂາຍເຖື່ອນ, ການຄ້າມະນຸດ, ການຄ້າປະເວນີ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ການໄປອອກແຮງງານ ທີ່ບໍ່ຖືກຕ້ອງຕາມກົດໝາຍ ຢູ່ຕ່າງປະເທດ. ພ້ອມນີ້, ບັນດາສະຫາຍຄະນະນໍາ ຂອງສູນກາງສະຫະພັນແມ່ຍິງລາວ ຊຸດໃໝ່ ຕ້ອງເປັນເຈົ້າການເພີ່ມທະວີການພົວພັນຮ່ວມມື ກັບອົງການຈັດຕັ້ງແມ່ຍິງ ປະເທດເພື່ອນມິດຍຸດທະສາດ, ບັນດາປະເທດເພື່ອນມິດໃນໂລກ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາ ຢ່າງມີຈຸດສຸມ ແລະ ມີການເລືອກເຟັ້ນ ເພື່ອຍາດແຍ່ງເອົາທຶນຮອນ, ຄວາມຮູ້, ບົດຮຽນ, ປະສົບການ ໃຫ້ເປັນກໍາລັງແຮງສັງຮວມ ເຂົ້າໃນການປັບປຸງ, ຍົກລະດັບ ແລະ ພັດທະນາແມ່ຍິງລາວ ໃຫ້ກ້າວຂຶ້ນຢ່າງບໍ່ຢຸດຢັ້ງ.

ແຫຼ່ງ: ​ສູນ​ກາງສະ​ຫະ​ພັນ​ແມ່​ຍິງ​ລາວ