ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX

​ເຜີຍ​ແຜ່​ໂດຍ: admin|ຢ້ຽມ​ຊົມ: 18 ຄັ້ງ | ເວ​ລາ | 2025-09-20 15:43:02

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ເປີດຂຶ້ນຢ່າງເປັນທາງການໃນວັນທີ 9 ກັນຍານີ້ ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານນາງ ອາລີ ວົງໜໍ່ບຸນທໍາ ກໍາມະການສູນກາງພັກ ປະ ທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ) ເປັນກຽດເຂົ້າຮ່ວມຂອງທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ, ທ່ານນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ມີບັນດາການນໍາພັກ-ລັດ ພ້ອມດ້ວຍແຂກຖືກເຊີນກ່ຽວຂ້ອງເຂົ້າຮ່ວມ.

ທ່ານນາງ ອາລີ ວົງໜໍ່ບຸນທໍາ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ຈະໄດ້ຮັບຟັງ ແລະ ຮັບ ຮອງເອົາການສະຫຼຸບຕີລາຄາ ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VIII ໃນໄລຍະ 2021-2025. ພ້ອມນັ້ນ, ຍັງໄດ້ປະກອບຄໍາເຫັນ ແລະ ຮັບຮອງເອົາແຜນພັດທະນາແມ່ຍິງລາວ 5 ປີ ໄລຍະ 2026-2030 ໃຫ້ສອດຄ່ອງກັບໜ້າທີ່ການເມືອງຂອງພັກ ກໍຄືຂອງສະຫະພັນແມ່ຍິງໃນໄລຍະໃໝ່, ແນໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X, 3 ແຜນດໍາເນີນງານແຫ່ງຊາດກ່ຽວກັບຄວາມສະເໝີພາບຍິງ-ຊາຍ, ແມ່ ແລະ ເດັກ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ; ພ້ອມນີ້, ຜູ້ແທນກອງປະຊຸມຍັງໄດ້ຮັບຮອງເອົາກົດລະບຽບສະບັບປັບປຸງຂອງສະຫະພັນແມ່ຍິງລາວ ສະໄໝທີ IX, ເນື້ອໃນຄໍາຂວັນ, ຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ແລະ ບົດສໍາຫຼວດການນຳພາລວມຂອງຄະນະບໍລິຫານງານ ສສຍລ ສະໄໝທີ VIII. ກອງປະຊຸມຍັງໄດ້ຮັບຟັງການປະກອບຄໍາເຫັນຂອງການນຳຈາກຄະນະໂຄສະນາອົບຮົມສູນກາງພັກ, ອົງການພາຄີ, ແຂວງ, ຕາງໜ້າຄະນະສະຫະພັນແມ່ຍິງແຂວງ ແລະ ຕົວແບບການພັດທະນາຈໍານວນໜຶ່ງ. ພ້ອມທັງຮັບຮອງເອົາມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX. ກອງປະຊຸມໃຫຍ່ຄັ້ງນີ້ສຸດທີ່ມີຄວາມສໍາຄັນ ສໍາລັບສະຫະພັນແມ່ຍິງລາວໃນການສ້າງຄວາມເຂັ້ມແຂງໃຫ້ການ ຈັດຕັ້ງ, ການກໍານົດເປົ້າໝາຍໃນການສຶກສາອົບຮົມສະມາຊິກສະຫະພັນແມ່ຍິງໃຫ້ມີຄຸນສົມບັດສິນທໍາປະຕິວັດ, ມີຄວາມສີວິໄລທາງດ້ານຈິດໃຈ, ເປັນພົນລະເມືອງດີ, ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີຄວາມເອື້ອເຟື້ອເຜື່ອແຜ່, ອະນຸລັກ, ປົກປັກຮັກສາຮີດຄອງປະເພນີອັນດີງາມຂອງຊາດ ຂອງແມ່ຍິງລາວບັນດາເຜົ່າ ສ້າງໃຫ້ແມ່ຍິງລາວມີວິທະຍາສາດທັນສະໄໝ ເປັນແມ່ຍິງລາວໃໝ່ ແລະ ພັດທະນາແມ່ຍິງລາວບັນດາເຜົ່າໃຫ້ໄດ້ຮັບການພັດທະນາຮອບດ້ານ, ມີຄວາມກ້າວໜ້າ, ມີຄວາມສະເໝີພາບຍິງ-ຊາຍ ສາມາດເຮັດໜ້າທີ່ເປັນຕົວແທນປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ ແລະ ເດັກໃນຄອບຄົວ ແລະ ສັງຄົມ.

ທ່ານນາງ ສິລິກິດ ບຸບຜາ ຮອງປະທານຄະນະບໍລິຫານງານ ສສຍລ ໄດ້ຂຶ້ນຜ່ານບົດລາຍງານການເມືອງ ຍົກໃຫ້ເຫັນຜົນງານພົ້ນເດັ່ນຫຼາຍດ້ານ ໃນການເຄື່ອນໄຫວວຽກງານໄລຍະ 5 ປີຜ່ານມາ, ສາເຫດຕົ້ນຕໍທີ່ພາໃຫ້ມີຈຸດອ່ອນ-ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້ ແລະ ທິດທາງລວມ, ຄາດໝາຍສູ້ຊົນໃນ 5 ປີຕໍ່ໜ້າ (2026-2030). ຮັບຟັງແຜນພັດທະນາແມ່ຍິງລາວໄລຍະ 5 ປີ (2026-2030).

ຂ່າວ-ພາບ: ບຸນອູ້ມ

 

ຜົນສໍາເລັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX.

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ໄດ້ປິດລົງດ້ວຍຜົນສໍາເລັດອັນຈົບງາມ ໃນວັນທີ 10 ກັນຍາ 2025 ໂດຍເປັນກຽດເຂົ້າຮ່ວມຂອງ ສະຫາຍ ປອ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ສະຫາຍນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ; ໂດຍການເປັນປະທານຂອງ ສະຫາຍ ນາງ ອາລີ ວົງໜໍ່ບຸນທໍາ ກໍາມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ); ມີບັນດາການນໍາພັກ-ລັດ, ພະນັກງານອາວຸໂສ-ບໍານານ, ບັນດາສະຫາຍຜູ້ແທນສົມບູນ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ໃນວາລະກອງປະຊຸມ ບັນດາທ່ານຜູ້ແທນ ໄດ້ເປັນເຈົ້າການສຸມທຸກກໍາລັງສະຕິປັນຍາ, ເສີມຂະຫຍາຍສິດປະຊາທິປະໄຕ ເຂົ້າໃນການຄົ້ນຄວ້າປຶກສາຫາລື ກ້າວໄປເຖິງຄວາມເປັນເອກະພາບ ໃນລະດັບສູງຕໍ່ການຮັບຮອງເອົາທຸກບັນຫາ ເປັນຕົ້ນ: ການສະຫຼຸບຕີລາຄາ, ຖອດຖອນບົດຮຽນກ່ຽວກັບການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII, ການຈັດຕັ້ງປະຕິບັດແຜນພັດທະນາແມ່ຍິງແຫ່ງຊາດ 10 ແຜນງານ 65 ໂຄງການ ໃນໄລຍະ 2021-2025 ຜ່ານມາ.

ຮັບຮອງເອົາບົດລາຍງານການເມືອງທັງສອງພາກ ພ້ອມທັງກໍານົດທິດທາງ, ຄາດຄະເນສູ້ຊົນ 5 ປີ (2026-2030) ເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ, ຮັບຮອງເອົາວິໃສທັດ ຮອດປີ 2035 ແລະ ແຜນພັດທະນາແມ່ຍິງລາວ ຊຶ່ງກວມເອົາ 09 ເປົ້າໝາຍ ແລະ 31 ແຜນວຽກຈຸດສຸມ ແລະ 144 ວຽກຈຸດສຸມ, ຮັບຮອງເອົາກົດລະບຽບສະບັບປັບປຸງໃໝ່ ແນໃສ່ປັບປຸງອົງການຈັດຕັ້ງສະຫະພັນແມ່ຍິງ ໃຫ້ໜັກແໜ້ນ ເຂັ້ມແຂງ ສົມເປັນການຈັດຕັ້ງມະຫາຊົນໃນການພັດທະນາແມ່ຍິງລາວ ແລະ ຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກຢ່າງແທ້ຈິງ.

ຜູ້ແທນກອງປະຊຸມໃຫຍ່ ໄດ້ເປັນເອກະສັນຮັບຮອງເອົາ ຄໍາຂວັນຂອງສະຫະພັນແມ່ຍິງລາວ ຄື: “ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ” ຂໍ້ແຂ່ງຂັນ 03 ດີ ຄື: “ພົນລະເມືອງດີ, ພັດທະນາດີ, ສ້າງຄອບຄົວດີ”.

ເປັນເອກະພາບຮັບຮອງເອົາກົດລະບຽບສະບັບປັບປຸງ, ບົດສໍາຫຼວດການນໍາພາຂອງຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ໃນການນຳພາ-ຊີ້ນຳຂະບວນການແມ່ຍິງ ຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ແລະ ແຜນພັດທະນາແມ່ຍິງແຫ່ງຊາດ ໃນໄລຍະ 2021-2025 ຜ່ານມາ ຊຶ່ງມີດ້ານດີຫຼາຍດ້ານ ທີ່ພາໃຫ້ມີຜົນສໍາເລັດຕາມແຜນການກໍຄືເປົ້າໝາຍທີ່ວາງໄວ້.

ພ້ອມນີ້ຍັງຊອກເຫັນຂໍ້ຄົງຄ້າງ ແລະ ສິ່ງທ້າທາຍ ທີ່ຕ້ອງສືບຕໍ່ແກ້ໄຂໃນຕໍ່ໜ້າ ລວມທັງບົດຮຽນທີ່ຖອດຖອນໄດ້ ເພື່ອເປັນບ່ອນອີງໃຫ້ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX ນຳໃຊ້ເຂົ້າໃນການນຳພາຈັດຕັ້ງປະຕິບັດມະຕິກອງປະຊຸມໃຫຍ່ ແລະ ແຜນພັດທະນາແມ່ຍິງລາວ ໃນ 05 ປີ ຕໍ່ໜ້າ ໃຫ້ບັນລຸຕາມຄາດໝາຍທີ່ວາງໄວ້.

ບັນດາຜູ້ແທນກອງປະຊຸມໃຫຍ່ ໄດ້ພ້ອມກັນໃຊ້ສິດຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງລາວ ສະໄໝທີ IX ຈໍານວນ 61 ສະຫາຍ ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້.

ກອງປະຊຸມຄັ້ງປະຖົມມະລືກໄດ້ເຫັນດີເປັນເອກະສັນເລືອກຕັ້ງເອົາ:

1. ສະຫາຍ ນາງ ອາລີ ວົງໜໍ່ບຸນທໍາ ເປັນປະທານຄະນະບໍລິຫານງານ ສສຍລ;

2. ສະຫາຍ ນາງ ທໍາມາ ເພັດວິໄຊ ເປັນຮອງປະທານ;

3. ສະຫາຍ ນາງ ພັນຈິນດາ ເລັ່ງສະຫວັດ ເປັນຮອງປະທານ;

5.?ສະຫາຍ ນາງ ຜາສຸກ ວົງວິຈິດ ເປັນຮອງປະທານ

ກອງປະຊຸມໄດ້ເຫັນດີເປັນເອກະສັນເລືອກຕັ້ງເອົາ:

1. ສະຫາຍນາງ ຜາສຸກ ວົງວິຈິດ ເປັນປະທານກວດກາຄະນະບໍລິຫານງານ ສສຍລ ສະໄໝທີ IX.

2. ສະຫາຍ ນາງ ພູຄໍາ ຄັດສະຫວ່າງ ເປັນຮອງປະທານກວດກາ ຄະນະບໍລິຫານງານ ສສຍລ ສະໄໝທີ IX.;

3. ສະຫາຍ ນາງ ກອງມະນີ ສີບຸນເຮືອງ ເປັນຮອງປະທານກວດກາ ຄະນະບໍລິຫານງານ ສສຍລ ສະໄໝທີ IX.

ກອງປະຊຸມໃຫຍ່ ຍັງໄດ້ສະແດງຄວາມຮູ້ບຸນຄຸນຢ່າງສູງ ຕໍ່ ສະຫາຍ ປອ ບຸນທອງ ຈິດມະນີ,​ກໍາມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປລາວ ທີ່ໄດ້ໃຫ້ກຽດເຂົ້າຮ່ວມ ແລະ ມີຄໍາເຫັນໂອ້ລົມຕໍ່ກອງປະຊຸມໃຫຍ່ຄັ້ງນີ້, ຊຶ່ງສະຫາຍໄດ້ຍ້ອງຍໍ ຊົມເຊີຍ ຜົນງານການເຄື່ອນໄຫວຂອງເອື້ອຍນ້ອງແມ່ຍິງ, ແມ່ຍິງລາວບັນດາເຜົ່າ ທີ່ໄດ້ປະກອບສ່ວນຢ່າງຕັ້ງໜ້າ ແລະ ແຂງແຮງ ໃນພາລະກິດລວມ ຂອງປະເທດຊາດ, ສົມແລ້ວ ກັບການຕີລາຄາທີ່ຜ່ານມາວ່າ: ຍາມໃດກໍ່ສູ້ຊົນຄຽງບ່າຄຽງໄຫຼ່ເພດຊາຍ ເຂົ້າຮ່ວມຂະບວນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ, ແມ່ຍິງຖືເປັນສັນຍາລັກ, ເປັນຜູ້ສືບທອດ ແລະ ເສີມຂະຫຍາຍ ວັດທະນະທຳ ແລະ ມູນເຊື້ອອັນດີງາມ ຂອງຊາດ.

ໃນຕອນທ້າຍ, ຜູ້ແທນສົມບູນໄດ້ຍົກບັດປະຊາມະຕິ ຮັບຮອງເອົາຜົນສໍາເລັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ແລະ ໄດ້ປິດລົງດ້ວຍຜົນສໍາລັດຢ່າງຈົບງາມ.