ຄະນະພັກກອງບັນຊາການ ປກສ ແຂວງສະຫວັນນະເຂດດຳເນີນກອງປະຊຸມໃຫຍ່ ຄັ້ງທີ IV

​ເຜີຍ​ແຜ່​ໂດຍ: admin|ຢ້ຽມ​ຊົມ: 5 ຄັ້ງ | ເວ​ລາ | 2025-05-03 17:31:11

ກອງປະຊຸມໃຫຍ່ຜູ້ແທນອົງຄະນະພັກຮາກຖານກອງບັນຊາການ ປກສ ແຂວງສະຫວັນນະເຂດຄັ້ງທີ IV ໄດ້ໄຂຂຶ້ນເປັນທາງການໃນຕອນເຊົ້າວັນທີ 30 ເມສານີ້ ທີ່ສະໂມສອນຫ້ອງວ່າການແຂວງ, ພາຍໃຕ້ການເປັນປະທານຂອງສະຫາຍ ພົຈ ສົມໝາຍ ພົມມະຈັນ ກຳມະການປະຈຳພັກແຂວງ ເລຂາຄະນະພັກຮາກຖານກອງບັນຊາການ ປກສ ແຂວງ, ໃຫ້ກຽດເຂົ້າຮ່ວມເປັນປະທານຂອງສະຫາຍ ບຸນໂຈມ ອຸບົນປະເສີດກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີສະຫາຍ ພົທ ຄໍາກິ່ງ ຜຸຍຫຼ້າມະນີວົງ ຄະນະປະຈຳພັກ ຮອງລັດຖະມົນຕີກະຊວງ ປກສ, ມີແຂກຖືກເຊີນ ພ້ອມດ້ວຍບັນດາສະຫາຍຜູ້ແທນສົມບູນທົ່ວຮາກຖານພັກກອງບັນຊາການ ປກສ ແຂວງເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການຜ່ານບົດລາຍງານການເມືອງຈາກສະຫາຍ ພັອ ສັງທອງ ສີປະເສິດ ຮອງເລຂາຄະນະພັກຮາກຖານກອງບັນຊາການ ປກສ ແຂວງ ໂດຍໄດ້ຍົກໃຫ້ເຫັນໃນ 5 ປີຜ່ານມາ, ພາຍໃຕ້ການນໍາພາ-ຊີ້ນໍາຂອງກະຊວງປ້ອງກັນຄວາມສະຫງົບ ແລະ ອົງຄະນະພັກແຂວງ, ຄະນະພັກກອງບັນຊາການ ປກສ ແຂວງ ໄດ້ຜ່ານຜ່າສິ່ງທ້າທາຍທົດສອບນາໆປະການ ແລະ ພ້ອມກັນສູ້ຊົນຍາດໄດ້ຜົນງານໃຫຍ່ຫຼວງຫຼາຍດ້ານເປັນຕົ້ນ: ວຽກງານຮັກສາຄວາມເປັນລະບຽບຮຽບຮ້ອຍທາງດ້ານສັງຄົມ; ການປະຕິບັດຕາມມະຕິເລກທີ 03/ກມສພ, ດໍາລັດ 384/ລບ ແລະ ຄໍາສັ່ງ 1526/ປກສ, ຫັນເອົາກຳລັງລົງກໍ່ສ້າງຮາກຖານໃນ 14 ຕົວເມືອງ ແລະ 1 ນະຄອນ ສາມາດຍາດໄດ້ຜົນສຳເລັດ. ກອງບັນຊາການ ປກສ ແຂວງໄດ້ສຸມໃສ່ບັນດາເມືອງຍຸດທະສາດທີ່ມີຊາຍແດນຕິດຈອດກັບຕ່າງປະເທດເປັນຕົ້ນ: ເມືອງນອງ, ເຊໂປນ, ໄຊພູທອງ, ສອງຄອນ, ໄຊບູລີ ແລະ ນະຄອນໄກສອນພົມວິຫານ ສຸມໃສ່ໃນການກໍ່ສ້າງບ້ານປອດຢາເສບຕິດ, ບ້ານປ້ອງກັນຄວາມສະຫງົບດີ, ໄດ້ນໍາພາ-ຊີ້ນຳປັບປຸງການຈັດຕັ້ງກຳລັງ ປກສ ບ້ານ ແລະ ໄດ້ເປີດຝຶກອົບຮົມວຽກງານວິຊາສະເພາະໄລຍະສັ້ນໃຫ້ ປກສ ກຸ່ມ-ປກສ ບ້ານ ຢູ່ 3 ເມືອງຄື: ເມືອງໄຊບູລີ, ໄຊພູທອງ ແລະ ເມືອງອາດສະພອນ. ນອກຈາກນັ້ນ, ຍັງໄດ້ເກັບກຳພົນລະເມືອງຂອງແຂວງສະຫວັນນະເຂດ, ສາມາດອອກບັດປະຈຳຕົວໄດ້ທັງໝົດ 112,515 ຄົນ, ຊຶ່ງປັດຈຸບັນພວກເຮົາກຳລັງປັບປຸງ ແລະ ຫັນເປັນບັດປະຈຳຕົວທັນສະໄໝໄດ້ 15,282 ຄົນ. ສ່ວນວຽກງານວິຊາສະເພາະຕໍາຫຼວດໄດ້ແກ້ໄຂປະກົດການຫຍໍ້ທໍ້ໃນສັງຄົມ ມີຜົນສໍາເລັດໃນຫຼາຍຢ່າງເຊັ່ນ: ວຽກງານສືບຂ່າວກໍາສະພາບການໄດ້ດໍາເນີນການສືບຄົ້ນຫາ, ກໍານົດໄດ້ເປົ້າໝາຍຄຸ້ມຄອງ, ຕິດຕາມປະເພດຕ່າງໆໃນທົ່ວແຂວງ, ໄດ້ແກ້ໄຂຄໍາຮ້ອງຟ້ອງທາງດ້ານເສດຖະກິດ, ວຽກງານຕໍາຫຼວດສະກັດກັ້ນ ແລະ ຕ້ານຢາເສບຕິດໄດ້ດໍາເນີນຄະດີຢາເສບຕິດຢ່າງມີຜົນສຳເລັດ. ປັດຈຸບັນ, ທົ່ວຮາກຖານພັກກອງບັນຊາການ ປກສ ແຂວງມີສະມາຊິກພັກທັງໝົດ 1,260 ສະຫາຍ ຍິງ 282 ສະຫາຍ.

ໃນກອງປະຊຸມ, ບັນດາສະຫາຍຜູ້ແທນສົມບູນຈະໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະພັກຮາກຖານກອງບັນຊາການ ປກສ ແຂວງສະຫວັນນະເຂດຊຸດໃໝ່ ແລະ ຄັດເລືອກເອົາຜູ້ແທນສົມບູນ-ສຳຮອງເຂົ້າຮ່ວມກອງປະຊຸມໃຫຍ່ຄັ້ງທີ X ອົງຄະນະພັກແຂວງທີ່ຈະໄຂຂຶ້ນໃນມໍ່ໆນີ້.

(ແຫຼ່ງຂ່າວ: ແຂວງສະຫວັນນະເຂດ)