ປະທານ ສນຊ ເນັ້ນ 4 ບັນຫາຕໍ່ທະນາຄານຄໍາລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 7 ຄັ້ງ | ເວ​ລາ | 2025-05-03 16:47:56

ໃນໂອກາດເຂົ້າຮ່ວມກອງປະຊຸມເຜີຍແຜ່ ແລະ ປຸກລະດົມກ່ຽວກັບການເຄື່ອນໄຫວວຽກງານທະນາຄານຄໍາລາວຈໍາກັດ”(LBB)ໃນວັນທີ 2 ພຶດສະພານີ້ທີ່ໂຮງແຮມຮໍລີເດອິນ ນະຄອນຫຼວງວຽງຈັນຂອງທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງແນວລາວສ້າງຊາດ(ສນຊ)ໂດຍມີການນໍາພັກ-ລັດ, ພະນັກງານຫຼັກແຫຼ່ງກ່ຽວຂ້ອງເຂົ້າຮ່ວມ.

ທ່ານ ຈັນທອນ ສິດທິໄຊ ຜູ້ອໍານວຍການໃຫຍ່ທະນາຄານຄໍາລາວຈໍາກັດ ໄດ້ລາຍງານກ່ຽວກັບພາບລວມການດໍາເນີນທຸລະກິດ ແລະການເຄື່ອນໄຫວວຽກງານຂອງທະນາຄານຄໍາລາວຈໍາກັດໂດຍມີ 5 ເນື້ອໃນໃຫຍ່ເປັນຕົ້ນທ່າແຮງຂອງອຸດສາຫະກໍາຄໍາຂອງສປປ ລາວ; ຄວາມເປັນມາ ແລະ ໂຄງສ້າງຂອງທະນາຄານຄໍາລາວ; ພາບລວມທຸລະກິດຂອງທະນາຄານຄໍາລາວ; ການຍົກລະດັບມາດຕະຖານອຸດສາຫະກໍາຄໍາ-ການສໍາຮອງຄໍາ ແລະ ການສ້າງຕັ້ງໂຮງກັ່ນຫຼອມຄໍາ ແລະ ຍຸດທະສາດ, ຄາດຄະເນຜົນປະໂຫຍດຕໍ່ເສດຖະກິດຂອງປະເທດ.ພ້ອມນີ້, ທ່ານໄດ້ຍົກໃຫ້ເຫັນວິໄສທັດເພື່ອສ້າງສະຖຽນລະພາບດ້ານເສດຖະກິດ-ການເງິນສ້າງໃຫ້ສປປ ລາວເປັນສູນກາງດ້ານການຄ້າຄໍາ ລໍ້າໜ້າດ້ານການກັ່ນຫຼອມ ວັດຖຸມີຄ່າໃນພາກພື້ນອາຊີພາຍໃນ 5 ປີຕໍ່ໜ້າ ທັງເປັນພາລະກິດເສີມຂະຫຍາຍຄວາມໂປ່ງໃສຂອງຕະຫຼາດ, ການປະຕິບັດທີ່ດີທີ່ສຸດຂອງສາກົນໃນການຊື້-ຂາຍຄໍາ ລະຫວ່າງນັກລົງທຶນ ແລະ ບັນດາຜູ້ມີສ່ວນຮ່ວມໃນຕະຫຼາດ. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນແລກປ່ຽນຄໍາຄິດຄໍາເຫັນຢ່າງກົງໄປກົງມາ ແລະ ໄດ້ຮັບຟັງການອະທິບາຍຊີ້ແຈງຈາກທ່ານ ຈັນທອນ ສິດທິໄຊ.

ໂອກາດນີ້, ທ່ານປະທານ ສນຊ ໄດ້ໃຫ້ກຽດໂອ້ລົມໂດຍເນັ້ນໜັກ4 ເນື້ອໃນຈິດໃຈຕໍ່ທະນາຄານຄໍາລາວ ເປັນຕົ້ນ:1) ການເຜີຍແຜ່ຊຸກຍູ້ ແລະ ປຸກລະດົມແນວຄິດຂອງປະຊາຊົນລາວບັນດາເຜົ່າ ເພື່ອເຂົ້າຮ່ວມໃນວຽກງານຂອງທະນາຄານຄໍາລາວນີ້ແມ່ນເປົ້າໝາຍສໍາຄັນຫຼາຍ ຊຶ່ງພວກເຮົາຕ້ອງເຂົ້າໃຈເອກະພາບໄປທິດທາງດຽວ ໃນການຜັນຂະຫຍາຍແນວທາງນະໂຍບາຍຂອງພັກ-ລັດ ຕໍ່ຈຸດປະສົງການສ້າງຕັ້ງທະນາຄານຄໍາລາວ; 2) ຜ່ານການຈັດຕັ້ງປະຕິບັດຂອງທະນາຄານຄໍາມາໃນໄລຍະໜຶ່ງເຫັນວ່າມີຄວາມຄືບໜ້າໃນການຊື້-ຂາຍຄໍາ. ສະນັ້ນໃຫ້ພ້ອມກັນສືບຕໍ່ປຸກລະດົມໂຄສະນາເພື່ອກະຕຸ້ນເສດຖະກິດຂອງສປປ ລາວ, ພວກເຮົາໄດ້ສ້າງຕັ້ງທະນາຄານຄໍາແລ້ວ ການຈໍາໜ່າຍຄໍາຕໍ່ໄປນີ້ຕ້ອງໄດ້ປະຕິບັດໄປຕາມແຜນຍຸດທະສາດ, ແຜນວຽກ ວິໄສທັດທີ່ພັກ-ລັດ ແລະ ທະນາຄານຄໍາວາງອອກເພື່ອບັນລຸຜົນ;3) ພວກເຮົາໃນນາມການນໍາອົງການແນວລາວສ້າງຊາດແຕ່ລະຂັ້ນ, ປະຊາຊົນລາວບັນດາເຜົ່າ, ນັກທຸລະກິດຕ້ອງໄດ້ສະໜັບສະໜູນດ້ານນະໂຍບາຍຂອງທະນາຄານເປັນຕົ້ນ ຈົ່ງພາກັນເຂົ້າໃຈຕໍ່ວິໄສທັດ, ຈຸດປະສົງ, ດ້ານເນື້ອໃນ, ທິດທາງ ແລະ ແຜນວຽກຂອງທະນາຄານຄໍາລາວ; ພວກເຮົາຈະໄດ້ພ້ອມກັນເຂົ້າຮ່ວມຊື້-ຂາຍ ຫຼືໃຊ້ບໍລິການທະນາຄານຄໍາ, ເປັນສະມາຊິກໃຫ້ຫຼາຍຂຶ້ນເພື່ອໃຫ້ທະນາຄານເຕີບໃຫຍ່ຂະຫຍາຍຕົວຂຶ້ນເລື້ອຍໆ;4) ໃນນາມສ່ວນຕົວໄດ້ຕິດຕາມເບິ່ງກຸ່ມບໍລິສັດພົງສະຫວັນ ຂໍສະແດງຄວາມຊົມເຊີຍຕໍ່ຄະນະຮັບຜິດຊອບທຸກພາກສ່ວນທີ່ມີຄວາມກ້າຫານສ້າງອັນໃໝ່ໃຫຍ່ໂຕ ແລະ ທັນສະໄໝ ຈາກການຜັນຂະຫຍາຍແນວຄິດຂອງກົມການເມືອງສູນກາງພັກກ່ຽວກັບ 9 ມາດຕະການໃນການແກ້ໄຂບັນຫາເສດຖະກິດ-ການເງິນຢ່າງເປັນຮູບປະທໍາ.

ຂ່າວ-ພາບ: ລີ