ປທສ ຝຶກອົບຮົມການນຳໃຊ້ໂປຣແກຣມ ການຂຶ້ນທະບຽນເລກໝາຍໂທລະສັບ

​ເຜີຍ​ແຜ່​ໂດຍ: admin|ຢ້ຽມ​ຊົມ: 50 ຄັ້ງ | ເວ​ລາ | 2024-12-22 00:00:00

                  ກະຊວງໄປສະນີ, ໂທລະຄົມມະນາຄົມ ແລະ ການສື່ສານ(ປທສ) ຮ່ວມກັບ ສໍານັກງານກິດຈະການກະຈາຍສຽງ, ກິດຈະການໂທລະພາບ ແລະ ກິດຈະການໂທລະຄົມມະນາຄົມແຫ່ງຊາດ (ກສທຊ), ປະເທດໄທ ໄດ້ເປີດການຝຶກອົບຮົມຫຼັກສູດ ການໃຊ້ໂປຣແກຣມການຄຸ້ມຄອງລະບົບເກັບຂໍ້ມູນ, ການອອກແບບ ແລະ ພັດທະນາລະບົບເກັບຂໍ້ມູນ ໃຫ້ແກ່ພະນັກງານວິຊາການພາຍໃນ ກະຊວງ ປທສ ພ້ອມດ້ວຍບັນດາບໍລິສັດ ຜູ້ໃຫ້ບໍລິການໂທລະຄົມ ຂຶ້ນໃນລະຫວ່າງວັນທີ 13-14 ກໍລະກົດ 2017ນີ້, ທີ່ສຳນັກງານສູນອິນເຕີເນັດແຫ່ງຊາດ. ໂດຍການເປັນປະທານກ່າວເປີດຂອງທ່ານ ວັນເພັງ ໄຊຍະກອນ ຫົວໜ້າອົງການດັດສົມໂທລະຄົມມະນາຄົມ, ກະຊວງ ປທສ,  ມີນັກວິທະຍານາກອນຈາກ ກສທຊ ປະເທດໄທ ແລະນັກສໍາມະກອນເຂົ້າຮ່ວມຝຶກອົບຮົມທັງໝົດ45ທ່ານ.

     ການຄຸ້ມຄອງເລກໝາຍໂທລະສັບແມ່ນວຽກງານໜຶ່ງທີ່ສຳຄັນກະຊວງປທສຈຶ່ງຖືເອົາວຽກງານດັ່ງກ່າວເປັນບູລິມະສິດອັນດັບຕົ້ນໆ,ເພາະວ່າເລກໝາຍໂທລະສັບແມ່ນຊັບພະຍາກອນອັນບໍ່ບົກແຫ້ງຂອງຊາດຖ້າພວກເຮົາຄຸ້ມ    ຄອງໄດ້ດີບໍ່ພຽງແຕ່ຈະສ້າງລາຍຮັບໃຫ້ແກ່ລັດເທົ່ານັ້ນເລກໝາຍໂທລະສັບຍັງເປັນລະຫັດບົ່ງບອກຕົວຕົນຂອງບຸກຄົນ,ນຳໃຊ້ໃນການດຳເນີນທຸລະກິດທະນາຄານ-ການເງິນແລະປະກອບສ່ວນສຳຄັນໃນວຽກງານປ້ອງກັນຊາດ-ປ້ອງກັນຄວາມສະຫງົບ ອີກດ້ວຍ.ດັ່ງນັ້ນຫວັງຢ່າງຢິ່ງວ່ານັກສໍາມະນາກອນທຸກຄົນຄົງຈະຕັ້ງໃຈຮໍ່າຮຽນແລະນໍາເອົາບົດຮຽນທີ່ໄດ້ ໄປຈັດຕັ້ງປະຕິບັດຕາມໜ້າທີ່ຮັບຜິດຊອບຂອງຕົນໃຫ້ບັນລຸຕາມຄາດໝາຍ.

                ໂດຍ: ທ່ານ ທອງໃສ ສິນທະວົງ, ອດທ, ປທສ. /  25/07/2017