ຜົນຂອງກອງປະຊຸມລັດຖະບານ ສະໄໝສາມັນປະຈໍາເດືອນສິງຫາ ແລະ ແຜນການເດືອນ ກັນຍາ 2017

​ເຜີຍ​ແຜ່​ໂດຍ: admin|ຢ້ຽມ​ຊົມ: 2 ຄັ້ງ | ເວ​ລາ | 2026-07-18 06:16:25

ຜົນຂອງກອງປະຊຸມລັດຖະບານ ສະໄໝສາມັນປະຈໍາເດືອນສິງຫາ ແລະ ແຜນການເດືອນ ກັນຍາ 2017 ໃຫ້ມີປະສິດທິຜົນ" - at 24-25 ສິງຫາ 2017 ນະຄອນຫຼວງວຽງຈັນ ສປປລາວ

(ກ) ກອງປະຊຸມຄັ້ງນີ້, ຄະນະລັດຖະບານແຫ່ງ ສປປລາວ ໄດ້ຄົ້ນຄວ້າ ແລະ ພິຈາລະນາບາງບັນຫາສຳຄັນດັ່ງນີ້:

(1) ບົດລາຍງານກ່ຽວກັບ:

1. ສະພາບພົ້ນເດັ່ນໃນພາກພື້ນ ແລະ ສາກົນ,

2. ວຽກງານປ້ອງກັນຊາດ ແລະ ວຽກງານປ້ອງກັນຄວາມສະຫງົບ,

3. ບົດລາຍງານກ່ຽວກັບຜົນເສຍຫາຍຈາກໄພນໍ້າຖ້ວມ ຂອງບັນດາແຂວງໃນທົ່ວປະເທດ ຈາກບັນດາຂະແໜງການທີ່ກ່ຽວຂ້ອງ;

(2) ການນຳໃຊ້ "ສູນດາຕ້າເຊັນເຕີ້" ເຂົ້າໃນການຫັນເປັນທັນສະໄໝ ເພື່ອພັດທະນາເສດຖະກິດ-ສັງຄົມຂອງ ສປປລາວ;

(3) ການຈັດຕັ້ງປະຕິບັດ ວຽກງານຄຸ້ມຄອງລັດຖະກອນ ປະຈຳປີ 2017 ແລະ ແຜນຄວາມຕ້ອງການລັດຖະກອນໃໝ່ ປີ 2018;

(4) ຮ່າງວິໄສທັດຮອດປີ 2030, ຍຸດທະສາດພັດທະນາ 2025 ແລະ ແຜນພັດທະນາພະລັງງານ ແລະ ບໍ່ແຮ່ 5 ປີ ຄັ້ງທີ VIII (2016-2020);

(5) ຮ່າງດໍາລັດວ່າດ້ວຍ ມາດຕະຖານພົ້ນທຸກ ແລະ ມາດຕະຖານພັດທະນາ;

(6) ຮ່າງດຳລັດ ວ່າດ້ວຍເງິນເບ້ຍລ້ຽງສຳລັບນັກຮຽນຜູ້ທຸກຍາກ ແລະ ດ້ອຍໂອກາດ ໃນສາຍສາມັນສຶກສາ;

(7) ຮ່າງດຳລັດ ວ່າດ້ວຍວັນພັກລັດຖະການ;

(ຂ) ຜົນກອງປະຊຸມລັດຖະບານ ສະໄໝສາມັນ ປະຈໍາເດືອນ ສິງຫາ 2017:

(1) ກອງ​ປະ​ຊູ​ມ​ໄດ້​ມີ​ຄຳ​ເຫັນ​ຊີ້​ນຳ​ ໃຫ້ພາກສ່ວນ​ທີ່​ກ່ຽວຂ້ອງ ນຳ​ເອົາ​ບັນດາ​ຮ່າງ​ດຳລັດ​ດັ່ງກ່າວ ​ໄປ​ປັບປຸງ​ຕາມ​ການ ​ປະກອບ​ຄຳ​ເຫັນ​ຂອງ​ສະມາຊິກ​ ລັດຖະບານ, ພ້ອມ​ທັງ ສົມທົບ​ກັບ​ ຂະ​ແໜງ​ການທີ່​ກ່ຽວຂ້ອງ​ ກັບ​ການ​ສ້າ​ງນິຕິ​ກຳ ​ເພື່ອສືບ​ຕໍ່​ຄົ້ນຄວ້າ​ ເບິ່ງ​ຄວາມ​ເໜາະສົມ​ຕື່ມ ​ໂດຍ​ສະ​ເພາະ ຊື່​ຂອງ​ດຳລັດ, ການ​ໃຊ້​ຄຳ​ສັບ, ​ການ​ກຳນົດ​ມາດຖານ ​ແລະ ​ເງື່ອນ​ໄຂ​ຕ່າງໆ, ການ​ກຳນົດ​ພາກສ່ວນ ​ແລະ ຂະ​ແໜງ​ການ​ທີ່​ມີ​ສ່ວນ​ຮ່ວມ;

(2) ຕໍ່ກັບການນໍາໃຊ້ ສູນດາຕາເຊັນເຕີ (Data Center) ເຂົ້າໃນການຫັນເປັນທັນສະໄໝ ເພື່ອພັດທະນາ ເສດຖະກິດ-ສັງຄົມຂອງ ສປປລາວ ນັ້ນ, ກອງປະຊຸມ ໄດ້ຊີ້ນໍາໃຫ້ບັນດາຂະແໜງການຕ່າງໆ ປະສານສົມທົບກັບ ກະຊວງວິທະຍາສາດ ແລະ ເຕັກໂນໂລຊີ ເພື່ອນໍາໃຊ້ສູນດັ່ງກ່າວ ໃຫ້ມີປະສິດທິຜົນສູງຂຶ້ນ, ສາມາດຮັບປະກັນ ແລະ ຮັກສາຂໍ້ມູນຂ່າວສານໄດ້ ທັງນີ້ ເພື່ອເຮັດໃຫ້ສູນດັ່ງກ່າວ ຖືກນໍາໃຊ້ ແລະ ເກີດຜົນປະໂຫຍດສູງສຸດ. ພາຍຫລັງ ບັນດາຂະແໜງການຕ່າງໆ ນໍາໃຊ້ສູນດັ່ງກ່າວແລ້ວ ໃຫ້ຂະແໜງການກ່ຽວຂ້ອງ ລາຍງານຜົນການນໍາໃຊ້ ໃຫ້ລັດຖະບານຊາບຕື່ມອີກ.

(3) ສໍາລັບບົດລາຍງານ ກ່ຽວກັບການຈັດ​ຕັ້ງ​ປະຕິບັດ​ ວຽກງານຄຸ້ມ​ຄອງ ​ລັດຖະກອນ ປະ​ຈໍາປີ 2017 ​ແລະ ​ແຜນ​ຄວາມ​ຕ້ອງການ ​ລັດຖະກອນ​ໃໝ່ ປີ 2018 ຜ່ານ​ການ​ຮັບ​ຟັງ​ ການ​ລາຍ​ງານ ຈາກ​ຂະ​ແໜງການ​ທີ່​ກ່ຽວຂ້ອງ:

1. ໃນ​ປີ 2017 ທົ່ວ​ປະ​ເທດ​ມີ​ ພະນັກ​ງານ-ລັດຖະກອນ ທັງໝົດ 183.680 ຄົນ, ຍິງ 84.268 ຄົນ (ຂັ້ນ​ສູນ​ກາງ ມີ​ຈໍານວນ 26.727 ຄົນ, ຍິງ 11.546 ຄົນ, ຂັ້ນ​ແຂວງ ມີ​ຈໍານວນ 36.170 ຄົນ, ຍິງ 15.109 ຄົນ ​ແລະ ຂັ້ນ​ເມືອງ ມີ​ຈໍານວນ 120.783 ຄົນ, ຍິງ 57.613 ຄົນ),

2. ຕົວ​ເລກພະນັກງານ-ລັດຖະກອນ​ທັງໝົດ ​ເມື່ອທຽບ​ໃສ່​ພົນລະ​ເມືອງ​ແລ້ວ ​ເທົ່າ​ກັບ 2,8% ທຽບ​ໃສ່​ບັນດາ​​ ໃນປະ​ເທດ​ອາຊຽນ ​ແມ່ນ​ຢູ່​ອັນ​ດັບທີ 3,

3. ກອງ​ປະຊຸມ​ໄດ້ຕົກລົງເປັນ​ເອກະ​ພາບ​ກັນວ່າ: ​ເຫັນ​ດີ​ອະນຸມັດ ​ຕົວ​ເລກ​ລັດຖະກອນ​ໃໝ່ ປະ​ຈໍາປີ 2018 ​ເພື່ອ​ທົດ​ແທນ ​ພະນັກ​ງານ-ລັດຖະກອນ ທີ່​ໄດ້​ອອກ​ທຸກ​ຮູບ​ການ​ເທົ່າ​ນັ້ນ ​ສ່ວນ​ຕົວ​ເລກ​ລາຍ​ລະອຽດ​ ແມ່ນ​ຈະ​ໄດ້​ມີ​ຂໍ້​ຕົກລົງ​ວ່າ​ດ້ວຍ​ ການອະນຸມັດ​ຕົວ​ເລກ​ລັດຖະກອນ ປີ 2018 ສະ​ເພາະ,

4. ​ໃຫ້​ທຸກໆ​ພາກ​ສ່ວນຢູ່​ສູນ​ກາງ ​ແລະ ທ້ອງ​ຖິ່ນ ກວດກາ​ຄືນບັນດາ ຕໍາ​​ແໜ່ງງານ ອັນ​ໃດ​ທີ່​ຈໍາ​ເປັນ ​ແລະ ອັນ​ໃດທີ່​ບໍ່ຈໍາ​ເປັນ ​ເພື່ອ​ເຮັດ​ໃຫ້​ພະນັກງານຜູ້ໜຶ່ງ ສາມາດ​ເຮັດ​ວຽກ​ໄດ້ຫລາຍຕໍາ​ແໜ່ງງານ,

5. ສິ່ງ​ສໍາ​ຄັນກົງຈັກ​ການຈັດ​ຕັ້ງ​ ແຕ່​ສູນ​ກາງ​ລົງ​ຫາ​ທ້ອງ​ຖິ່ນ ​ແມ່ນ​ບໍ່​ໄດ້​ຂະຫຍາຍ​ເພີ່ມ ຄຽງຄູ່​ກັບ​ການ​ເພີ່ມ​ມາດ​ຕະຖານພະນັກງານ-ລັດຖະກອນ ​ເພື່ອ​ຮັບປະກັນ​ ໃຫ້​ມີ​ຄຸນ​ນະພາ​ບ, ມີ​ປະສິດ​ທິພາ​ບ, ມີ​ຄວາມ​ຮັບຜິດຮັບຊອບ ​ໃນ​ການຈັດ​ຕັ້ງ​ປະຕິບັດໜ້າທີ່​ ວຽກງານຂອງ​ຕົນ;

(4) ຮ່າງ​ວິ​ໄສ​ທັດຮອດ​ປີ 2030, ຍຸດ​ທະ​ສາດ​ພັດທະນາ 2025 ​ແລະ ​ແຜນ​ພັດທະນາ​ ພະລັງງານ ​ແລະ ບໍ່​ແຮ່ 5 ປີ ຄັ້ງ​ທີ VIII (2016-2020) ກອງ​ປະຊຸມ​ ໄດ້​ຕົກລົງ​ເຫັນ​ດີ​ ໃຫ້​ນຳ​ໄປ​ປັບປຸງ​ຕາມ​ຄຳ​ເຫັນ ​ຂອງ​ສະມາຊິກ​ລັດຖະບານ:

1. ດ້ານ​ບໍ່​ແຮ່ ​ແມ່ນ​​ໃຫ້​ເອົາ​ໃຈ​ໃສ່ ​ຕໍ່​ຂອດ​ການຈັດ​ຕັ້ງ​ປະຕິບັດ​ຕົວ​ຈິງ ​ໂດຍ​ເລີ່​ມຈາກ​ການ ​ສຶກສາສຳ​ຫລວດ, ​ຄົ້ນຄວ້າ, ​ເກັບ​ກຳ​ຂໍ້​ມູນ​ໃຫ້​ລະອຽດ ຈຶ່ງ​ກ້າວ​ໄປ​ສູ່​ການວາງ​ແຜນ​ ສະຫງວນ​ໄວ້ ຫລື ຂຸດ​ຄົ້ນ​ມານຳ​ໃຊ້ ຕາມ​ຄວາມ​ເໝາະ​ສົມ ພ້ອມ​ກັນ​ນັ້ນ ​ໃນ​ສະ​ເພາະ​ໜ້າ ​ແມ່ນ​ໃຫ້​ເອົາ​ໃຈ​ໃສ່​ ຕໍ່​ຂອດ​ການ​ຄຸ້ມ​ຄອງ ການ​ລົງທຶນ​ໃຫ້​ດີ ມີ​ຄວາມ​ເຂັ້ມ​ງວດ​ ຕາມ​ກົດໝາຍ ​ແລະ ລະບຽບ​ການ, ຖືກ​ຕ້ອງຕາ​ມ​ເຕັກນິກ, ຂະ​ແໜງ​ການ​ທີ່​ກ່ຽວຂ້ອງ ຕ້ອງ​ຍົກ​ສູງ​ຄວາມ​ຮັບຜິດຊອບ​ ຕໍ່ໜ້າ​ທີ່​ການ​ເມືອງ​ຂອງ​ຕົນ ໃຫ້​ສູງ​ກວ່າ​ເກົ່າ,

2. ດ້ານ​ພະລັງງານ ​ແມ່ນ​ໃຫ້​ໝູນ​ໃຊ້​ທ່າ​ແຮງ​ຂອງ​ທ້ອງ​ຖິ່ນໃຫ້​ເກີດ​ປະ​ໂຫຍ​ດ ​ໂດຍ​ສະ​ເພາະການ​ສ້າງ ​ແລະ ນຳ​ໃຊ້​ພະລັງງານ​ທົດ​ແທນໃຫ້​ຫລາຍ​ຂຶ້ນ ຕິດ​ພັນ​ກັບ​ສົ່ງ​ເສີມ​ການ​ຊົມໃຊ້​ພາຍ​ໃນ.

(5) ນາຍົກລັດຖະມົນຕີແຫ່ງ ສປປລາວ ໄດ້ແຈ້ງສະພາບ ການປະຕິບັດວຽກງານ ຈຸດສຸມທີ່ສໍາຄັນ ຂອງລັດຖະບານ ໂດຍສັງເຂບ ໃນ 01 ເດືອນຜ່ານມາ ເຊິ່ງເຫັນວ່າລັດຖະບານ ສາມາດປະຕິບັດ ຫລາຍວຽກງານທີ່ພົ້ນເດັ່ນເປັນ​ຕົ້ນ: ​

1. ໄດ້ເຮັດວຽກຮ່ວມກັບ ຄະນະປະຈໍາສະພາແຫ່ງຊາດ ເພື່ອທົບທວນ ການຈັດຕັ້ງປະຕິບັດ ບັນດາມະຕິຂອງກອງປະຊຸມ ສະພາແຫ່ງຊາດ ແລະ ບັນຫາພົ້ນເດັ່ນທາງດ້ານ ເສດຖະກິດ-ສັງຄົມ ຈໍານວນໜຶ່ງ;

2. ໄດ້ຈັດກອງປະຊຸມຫລາຍຄັ້ງ ເພື່ອປຶກສາຫາລື ສະເພາະກ່ຽວກັບທິດທາງການແກ້ໄຂ ແລະ ກະຕຸກຊຸກຍູ້ເສດຖະກິດ ເຊິ່ງໃນນັ້ນ ໄດ້ລົງເລິກຫລາຍຫົວຂໍ້ສຳຄັນ ເປັນຕົ້ນແມ່ນ ສົ່ງເສີມການຜະລິດເປັນສິນຄ້າ, ການແກ້ໄຂໜີ້ສິນ ການລົງທຶນຂອງລັດ, ການເຂົ້າເຖິງແຫລ່ງທຶນຂອງ ພາກທຸລະກິດ ແລະ ການຄຸ້ມຄອງອັດຕາແລກປ່ຽນ; ​

3. ໄດ້ພົບປະພະນັກງານຫລັກແຫລ່ງ ຂອງຂະແໜງການເງິນ ເພື່ອລົງເລິກຊຸກຍູ້ ແລະ ຊີ້ນໍາທິດທາງການເຄື່ອນໄຫວ ວຽກງານການເງິນໃນຕໍ່ໜ້າ ໃຫ້ມີປະສິດທິຜົນກວ່າເກົ່າ;

4. ໄດ້ຕິດຕາມ ແລະ ແຈ້ງເຕືອນປະຊາຊົນ ກ່ຽວກັບ ສະພາບດິນຟ້າອາກາດ ແລະ ໄດ້ເອົາໃຈໃສ່ຕິດຕາມ ແລະ ຊ່ວຍເຫລືອປະຊາຊົນ ທີ່​ໄດ້​ຮັບຜົນກະທົບຈາກໄພນໍ້າຖ້ວມ ໃນຂອບເຂດທົ່ວ​ປະ​ເທດ. ໄພນໍ້າຖ້ວມໃນເດືອນຜ່ານມາ ໄດ້ສ້າງຄວາມເສຍຫາຍ ຫລາຍສົມຄວນຕໍ່ຊີວິດ, ຊັບສິນ, ຖະໜົນຫົນທາງ ແລະ ເງື່ອນໄຂການທຳມາຫາກິນ ຂອງປະຊາຊົນ. ລັດຖະບານ ໄດ້ຊີ້ນຳໃຫ້ຂະແໜງການ ແລະ ທ້ອງຖິ່ນ ລົງຕິດຕາມເພື່ອຟື້ນຟູ ຜົນເສຍຫາຍ ແລະ ຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ;

5. ໄດ້ດໍາເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອພິຈາລະນາ ແລະ ຕົກລົງບັນຫາສໍາຄັນ ຕາມການສະເໜີຂອງຂະແໜງການ ແລະ ທ້ອງຖິ່ນ ​ເຊັ່ນ: ການເຄື່ອນໄຫວທຸລະກິດ ຂອງລັດວິສາຫະກິດ ຫວຍພັດທະນາ, ແຜນຄຸ້ມຄອງ ແລະ ບໍລິຫານທ່າເຮືອຫວຸ່ງອ່າງ, ການປັບປຸງຮ່າງກົດໝາຍ 06 ສະບັບ ທີ່ຈະນໍາສະເໜີຕໍ່ ກອງປະຊຸມສະພາແຫ່ງຊາດ ສະໄໝສາມັນເທື່ອທີ 04 ແລະ ບັນຫາອື່ນໆ ອີກຈຳນວນໜຶ່ງ;

6. ນາຍົກ-ຮອງນາຍົກລັດຖະມົນຕີ ແລະ ສະມາຊິກລັດຖະບານ ກໍໄດ້ລົງເຄື່ອນໄຫວ ເຮັດວຽກຢູ່ທ້ອງຖິ່ນ ເພື່ອຊຸກຍູ້ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ຢ້ຽມຢາມ ແລະ ຊຸກຍູ້ພື້ນຖານການຜະລິດ ແລະ ກວດກາການຈັດຕັ້ງປະຕິບັດ ການຕົກລົງຕ່າງໆ ທີ່ສຳຄັນຂອງລັດຖະບານ ແລະ ວຽກງານສຳຄັນອື່ນໆ.

(ຄ) ບັນດາວຽກງານຈຸດສຸມສໍາຄັນ ໃນເດືອນກັນຍາ 2017 ເປັນຕົ້ນ:

(1) ສືບຕໍ່ຕິດຕາມຢ່າງໃກ້ຊິດ ສະພາບການພາກພື້ນ ແລະ ສາກົນ ​ໂດຍ​ມີ​ການວິເຄາະວິໄຈ ຢ່າງລະອຽດ ແລະ ເລິກເຊິ່ງກ່ຽວກັບຄວາມສ່ຽງ ແລະ ທ່າອ່ຽງຜົນກະທົບ ທາງດ້ານການເມືອງ, ເສດຖະກິດ ແລະ ສັງຄົມ ຕໍ່ການພັດທະນາ ຂອງປະເທດເຮົາ ສືບຕໍ່ການເຄື່ອນໄຫວຕ່າງປະເທດ ຢ່າງເປັນເຈົ້າການ ແລະ ກະກຽມຮອບດ້ານ ໃຫ້ແກ່ການເຄື່ອນໄຫວ ຢ້ຽມຢາມຕ່າງປະເທດ ຂອງການນໍາພັກ-ລັດ ຕາມແຜນທີ່ໄດ້ກຳນົດ ໃຫ້ໄດ້ຮັບໝາກຜົນສູງ;

(2) ສືບຕໍ່ເພີ່ມທະວີ ຄວາມເອົາໃຈໃສ່ ຕໍ່ວຽກງານຮັກສາ ຄວາມສະຫງົບ ແລະ ຄວາມເປັນລະບຽບ ຮຽບຮ້ອຍ ໂດຍສະເພາະແມ່ນ ການແກ້ໄຂບັນດາ ປະກົດການຫຍໍ້ທໍ້ຕ່າງໆ ໃນສັງຄົມ ທີ່ຍັງບໍ່ທັນຫລຸດລົງ ເປັນຕົ້ນແມ່ນ: ບັນຫາຢາເສບຕິດ, ອຸບັດຕິເຫດຕາມທ້ອງຖະໜົນ, ການປູ້ນຈີ້ຊີງຊັບ ແລະ ບັນຫາອື່ນໆ. ສະເພາະເດືອນນີ້, ພວກເຮົາກໍໄດ້ຮັບລາຍງານ ກ່ຽວກັບກັບ ການລັກຊັບສິນຂອງຊາວຕ່າງປະເທດ ທີ່ມີທ່າອ່ຽງເພີ່ມຂຶ້ນ ເຊິ່ງຫາກຍັງ ແຜ່ຂະຫຍາຍຕໍ່ໄປ ກໍຈະກະທົບເຖິງ ຄວາມສະຫງົບ, ຊື່ສຽງ, ຄວາມໜ້າຢູ່, ໜ້າທ່ຽວ ແລະ ໜ້າລົງທຶນ ຂອງປະເທດເຮົາ ຕໍ່ສາກົນ ແລະ ກໍຈະກະທົບໂດຍກົງ ຕໍ່ການເປີດປີທ່ອງທ່ຽວ ໃນປີ 2018 ທີ່ຈະມາເຖິງ. ດັ່ງນັ້ນ, ຢາກໃຫ້ເອົາໃຈໃສ່ ແກ້ໄຂບັນຫານີ້ໃຫ້ໄດ້;

(3) ກະກຽມກອງປະຊຸມລັດຖະບານ ຮ່ວມກັບບັນດາເຈົ້າແຂວງ ແລະ ເຈົ້າຄອງນະຄອນຫລວງວຽງຈັນ ເຊິ່ງຈະຈັດຂຶ້ນ ໃນວັນທີ 07-08 ກັນຍາ 2017 ໃຫ້ມີເນື້ອໃນເລິກເຊິ່ງ:

1. ກອງປະຊຸມລັດຖະບານເປີດກວ້າງຄັ້ງນີ້ ມີຄວາມໝາຍສໍາຄັນຫລາຍ ເພາະພວກເຮົາຈະໄດ້ປຶກສາຫາລື ຫລາຍບັນຫາທີ່ສຳຄັນ ເປັນຕົ້ນແມ່ນການສະຫລຸບຕີລາຄາ ຜົນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ 06 ເດືອນຕົ້ນປີ, ທິດທາງແຜນການ 06 ເດືອນທ້າຍປີ ຂອງປີ 2017 ແລະ ແຜນພັດທະນາ ເສດຖະກິດສັງຄົມ ສຳລັບປີ 2018,

2. ບົດສະຫລຸບດັ່ງກ່າວນີ້, ຈະໄດ້ລາຍງານ ຕໍ່ກອງປະຊຸມຄົບຄະນະຂອງ ຄະນະບໍລິຫານງານ ສູນກາງພັກພັກ ເທື່ອທີ 5 ໃນກາງເດືອນກັນຍາ ແລະ ກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 04 ໃນເດືອນຕຸລາ ທີ່ຈະມາເຖິງ,

3. ແຕ່ນີ້ຮອດມື້ປະຊຸມກໍຍັງແຕ່ 02 ອາທິດ, ດັ່ງນັ້ນ, ຈຶ່ງຢາກສະເໜີໃຫ້ ພາກສ່ວນກ່ຽວຂ້ອງ ໂດຍສະເພາະ ພາກສ່ວນທີ່ກ່ຽວຂ້ອງ ເອົາໃຈໃສ່ກະກຽມເນື້ອໃນ ແລະ ການລາຍງານຂອງຕົນ ໃຫ້ກະທັດຮັດ, ມີເນື້ອໃນຊັດເຈນ ແລະ ສາມາດລົງເລິກປະເດັນທີ່ຈະປຶກສາຫາລື ໃນກອງປະຊຸມ ເພື່ອໃຫ້ສາມາດ ລະດົມຄວາມຄິດເຫັນ ແລະ ປັບປຸງເພື່ອລາຍງານ ຕໍ່ກອງປະຊຸມສູນກາງ ແລະ ກອງປະຊຸມສະພາດັ່ງກ່າວ,

4. ພ້ອມນີ້, ກໍໃຫ້ຮີບຮ້ອນປັງປຸງ ແລະ ຮຽບຮຽງຮ່າງກົດໝາຍ 13 ສະບັບ ທີ່ຈະນຳໄປຜ່ານ ກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 04 ໃນເດືອນຕຸລາ ໃຫ້ສຳເລັດແລ້ວສົ່ງໃຫ້ຄະນະປະຈຳ ສະພາແຫ່ງຊາດ ທັນຕາມກຳນົດເວລາ;

(4) ສືບຕໍ່ສັງລວມ ແລະ ຄົ້ນຄວ້າແກ້ໄຂໜີ້ສິນ ໂຄງການລົງທຶນຂອງລັດ ດ້ວຍຮູບແບບອວ່າຍໜີ້ 03 ແຈ ແລະ ວິທີການແກ້ໄຂອື່ນໆ ທີ່ເໝາະສົມໃຫ້ສໍາເລັດໂດຍໄວ. ສືບ​ຕໍ່​ຄົ້ນຄວ້າ​ ປະ​ເມີນ​ໂຄງການ​ລົງທຶນ​ຂອງ​ລັດ ກ່ອນ​ພິຈາລະນາ​ເຂົ້າ​ແຜນ ໂດຍເນັ້ນໃສ່ປະສີດທິຜົນ ຂອງໂຄງການ, ຄວາມອາດສາມາດໃນການ ສະໜອງງົບປະມານ ແລະ ການຫລຸດຜ່ອນ ການສ້າງໜີ້ສິນເພີ່ມ ໃຫ້ແກ່ງົບປະມານແຫ່ງຊາດ ທີ່ຍັງບໍ່ທັນເຂັ້ມແຂງ, ສືບຕໍ່ປັບປຸງ ລັດວິສາຫະກິດ ໂດຍສະເພາະ ລັດວິສາຫະກິດການບີນລາວ ແລະ ລັດວິສາຫະກິດໄຟຟ້າລາວ ໃຫ້ມີຄວາມຄືບໜ້າໄວຂຶ້ນ. ວຽກ​​ງານ​ດັ່ງກ່າວ​ນີ້ ຍັງ​ປະຕິບັດ​ໄດ້​ຊັກ​ຊ້າ. ດັ່ງ​ນັ້ນ, ຢາກ​ໃຫ້​ເອົາ​ໃຈ​ໃສ່ ​ແລະ ​ເລັ່ງປະຕິບັດ​ໃຫ້​ໄວ​ຂຶ້ນ;

(5) ໃຫ້ສືບຕໍ່ເອົາໃຈໃສ່ຊຸກຍູ້ ສົ່ງເສີມການຜະລິດ ແລະ ການບໍລິການ ຂອງບັນດາຫົວໜ່ວຍການຜະລິດ ແລະ ປະຊາຊົນ ໃຫ້ເປັນຂະບວນຟົດຟື້ນ ທັງຮັບປະກັນ ໃຫ້ມີຄຸນນະພາບ ແລະ ປະສິດທິຜົນໃຫ້ຫລາຍຂຶ້ນ. ພ້ອມນີ້ ກໍໃຫ້ເອົາໃຈໃສ່ຄຸ້ມຄອງ ການນຳເຂົ້າສິນຄ້າ ແລະ ເຄື່ອງບໍລິໂພກ ທີ່ມີຄວາມສ່ຽງ ຕໍ່ສຸຂະພາບຂອງປະຊາຊົນ ທັງກະທົບຕໍ່ການ ຜະລິດພາຍໃນເຊັ່ນ: ການນຳເຂົ້າຊີ້ນສັດ, ພືດ ແລະ ເຄື່ອງບໍ ລິໂພກ ທີ່ມີສານປົນເປື້ອນ. ໃນເດືອນຜ່ານມາ ລັດຖະບານ ກໍໄດ້ຈັດກອງປະຊຸມສະເພາະ ແລະ ໄດ້ຊີ້ນຳຂະແໜງການ ແລະ ພາກສ່ວນກ່ຽວຂ້ອງແລ້ວ. ດັ່ງນັ້ນ, ໃຫ້ຈັດຕັ້ງປະຕິບັດ ຕາມຈິດໃຈຊີ້ນຳດັ່ງກ່າວ ຢ່າງເຂັ້ມງວດ;

(6) ໃຫ້ສືບຕໍ່ເອົາໃຈໃສ່ ຕິດຕາມສະພາບ ດິນຟ້າອາກາດ ແລະ ແຈ້ງເຕືອນປະຊາຊົນ ພ້ອມທັງກະກຽມຄວາມພ້ອມ ໃນການຮັບມື, ແກ້ໄຂ ແລະ ຊ່ວຍເຫຼືອປະຊາຊົນ ໃຫ້ທັນການ ໃຫ້ຮີບຮ້ອນປັບປຸງດ້ານນິຕິກຳ ແລະ ກົນໄກປະສານງານ ເພື່ອໃຫ້ຄະນະ ຮັບຜິດຊອບວຽກງານ ໄພພິບັດແຫ່ງຊາດ ສາມາດເຄື່ອນໄຫວຢ່າງຄ່ອງຕົວ ແລະ ມີປະສິດທິຜົນ ໃນການຮ່ວມມືກັບ ໄພພິບັດທຳມະຊາດ ແລະ ຊ່ວຍເຫລືອປະຊາຊົນ;

(7) ສືບຕໍ່ເອົາໃຈໃສ່​ເຝົ້າ​ລະວັງ ​ແລະ ປ້ອງ​ກັນ​ເຊື້ອ​ພະຍາດ​ຕິດຕໍ່ ທີ່ອາດຈະເກີດຂຶ້ນ ຕາມລະດູການ ເປັນຕົ້ນແມ່ນ ພະຍາດໄຂ້ຫວັດໃຫຍ່, ໄຂ້ຫວັດ​ສັດ​ປີກ (H5N1, H7N9), ຫູໝູ​ກໍ່າ, ປາກ​ເປື່ອຍ​ລົງ​ເລັບ​, ທ້ອງ​ເບັງ​ແບ້ ແລະ ພະຍາດລະບາດອື່ນໆ ທີ່ອາດມີສາຍເຫດ ຈາກໄພທຳມະຊາດ;

( ຮີບຮ້ອນກວດກາ ແລະ ປະເມີນສະພາບເສັ້ນທາງ ທີ່ໄດ້ຮັບຜົນກະທົບ ຈາກໄພທຳມະຊາດ ຫລືຊຸດໂຊມ ມາຈາກການນຳໃຊ້ປົກກະຕິ ໃນຂອບເຂດທົ່ວປະເທດ ໃຫ້ສ້າງແຜນ ແລະ ຈັດລຽງບູລິມະສິດສ້ອມແປງ ຢ່າງທັນການ, ແຕ່ໃຫ້ປະຕິບັດສອດຄ່ອງ ຕາມລະບຽບການ, ມີຄວາມໂປ່ງໄສ, ວ່ອງໄວ ແລະ ເໝາະສົມກັບງົບປະມານ ເພື່ອບໍ່ໃຫ້ກະທົບຕໍ່ ການສັນຈອນ-ຂົນສົ່ງ ແລະ ການເຄື່ອນໄຫວ ຜະລິດຂອງປະຊາຊົນ. ສືບຕໍ່ໃຫ້ເອົາໃຈໃສ່ກວດກາ ການບັນທຸກສິນຄ້າ ຂົນສົ່ງເກີນນໍ້າໜັກ ແລະ ຈໍາກັດຊ່ອງວ່າງບໍ່ໃຫ້ເຈົ້າໜ້າທີ່ ສວຍໂອກາດເກັບເງິນ ໂດຍບໍ່ຖືກຕ້ອງ ແລະ ກາຍເປັນປະກົດການຫຍໍ້ທໍ້ໃນສັງຄົມ;

(9) ກະກຽມຮອບດ້ານ ການເປີດສົກຮຽນໃໝ່ ສົກປີ 2017-2018 ຂອງນັກຮຽນນັກສຶກສາ ໃຫ້ເປັນລະບົບລະບຽບ ຖືເອົາໄລຍະເປີດສົກຮຽນໃໝ່ ເປັນໂອກາດສຳຄັນ ໃນການສຶກສາອົມຮົມ ນັກຮຽນນັກສຶກສາ ໃຫ້ເອົາໃຈໃສ່ໃນການຮໍ່າຮຽນ, ມີນໍ້າໃຈຮັກຊາດ, ມີຄວາມພະຍາຍາມອົດທົນ, ມີຄວາມເສຍສະຫລະ, ຫລີກໄກຢາເສບຕິດ ແລະ ຖືເອົາຄວາມເອົາໃຈໃສ່ ໃນການຮໍ່າຮຽນ ເປັນການປະກອບສ່ວນທີ່ສຳຄັນ ເຂົ້າໃນພາລະກິດ ປົກປັກຮັກສາ ແລະ ພັດທະນາປະເທດຊາດ;

(10) ບັນດາສະມາຊິກລັດຖະບານ ສືບຕໍ່ຊີ້ນຳ, ຕິດຕາມ, ຊຸກຍູ້ ແລະ ກວດກາການ ຈັດຕັ້ງປະຕິບັດ ບັນດາວຽກງານຈຸດສຸມ ພາຍໃຕ້ຄວາມຮັບຜິດຊອບຂອງຕົນ ໃຫ້ມີປະສິດທິຜົນ ພ້ອມທັງມີການສະຫລຸບລາຍງານ ໃຫ້ລັດຖະບານ ຢ່າງເປັນປົກກະຕິ ຕາມກຳນົດເວລາ.

 

ແຫຼ່ງ: ສຳ​ນັກ​ງານ​ນາ​ຍົກ