ໜ່ວຍພັກໂຮງງານຜະລິດເຂົ້າແຫ້ງ ກອງທັບ ສໍາເລັດກອງປະຊຸມໃຫຍ່ຄັ້ງທີ VII

​ເຜີຍ​ແຜ່​ໂດຍ: admin|ຢ້ຽມ​ຊົມ: 147 ຄັ້ງ | ເວ​ລາ | 2023-04-11 05:02:22

ໜ່ວຍພັກໂຮງງານຜະລິດເຂົ້າແຫ້ງກອງທັບ ໄດ້ເປີດກອງປະຊຸມໃຫຍ່ຄັ້ງທີ VII ຂຶ້ນ​ໃນ​ວັນ​ທີ 31 ມີ​ນາ ​ຜ່ານ​ມາ, ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ວົງສັກ ສີພັນດອນ ກໍາມະການຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ພະລາທິການກອງທັບ, ມີຄະນະພັກຫ້ອງການເມືອງກົມໃຫຍ່ພະລາທິການ, ຄະນະໜ່ວຍພັກ, ສະມາຊິກພັກສົມບູນ ແລະ ແຂກຖືກເຊີນເຂົ້າຮ່ວມ.

ສະຫາຍ ພັນຕີ ບຸນຜັນ ທໍາມະວົງ ເລຂາໜ່ວຍພັກ ຫົວໜ້າອໍານວຍການໂຮງງານຜະລິດເຂົ້າແຫ້ງກອງທັບ ໄດ້ຂື້ນຜ່ານບົດລາຍງານການເມືອງທັງສອງພາກ, ຕີລາຄາໝາກຜົນການຊີ້ນຳ-ນຳພາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ໃນໄລຍະຊຸມປີຜ່ານມາ ຊຶ່ງໜ່ວຍພັກໂຮງງານຜະລິດເຂົ້າແຫ້ງ ເປັນໜ່ວຍພັກເອກະລາດໜຶ່ງທີ່​ຂຶ້ນກັບ ແລະ ຢູ່ພາຍໃຕ້ການຊີ້ນຳ-ນຳພາຂອງຄະນະພັກອົງ​ການກົມໃຫຍ່ພະລາທິການໂດຍກົງຮອບດ້ານ, ສາຍວິຊາສະເພາະແມ່ນຂຶ້ນກັບກົມອຸປະໂພກ-ບໍລິໂພກ, ໜ້າທີ່ການເມືອງຕົ້ນຕໍແມ່ນຜະລິດເຂົ້າແຫ້ງຮັບໃຊ້ກອງທັບ, ໂດຍສະເພາະແມ່ນຕອບສະໜອງໃຫ້ແກ່ການເຄື່ອນໄຫວປະຕິບັດໜ້າທີ່ຢູ່ເຂດທຸລະກັນດານ, ຫ່າງໄກສອກຫຼີກ, ປັດຈຸບັນໜ່ວຍພັກມີສະມາຊິກພັກທັງໝົດ 19 ສະຫາຍ, ສະມາຊິກພັກສົມບູນ 17 ສະຫາຍ ຍິງ 11 ສະຫາຍ, ສຳຮອງ 2 ສະຫາຍ, ອັດຕາສ່ວນນຳພາຂອງສະມາຊິກພັກກວມ 75%, ໄດ້ເອົາໃຈໃສ່ສຶກສາອົບຮົມພະນັກງານ, ສະມາຊິກພັກ ດ້ວຍຮູບການຄົ້ນຄວ້າ, ເຊື່ອມຊຶມ, ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດ, ມະຕິກອງປະຊຸມໃຫຍ່ຄັ້ງທີ VI ຂອງຄະນະພັກ​ອົງ​ການກົມໃຫຍ່ພະລາທິການ, ກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກໍານົດ, ກົດລະບຽບຂອງກອງທັບວາງອອກ, ເຂົ້າຮ່ວມຟັງການປາຖະກະຖາມູນເຊື້ອຂອງຊາດ, ຂອງພັກ, ຂອງກອງທັບ, ເຮັດໃຫ້ຖັນແຖວສະມາຊິກພັກມີຄວາມເຂົ້າໃຈຕໍ່ອຸດົມການຂອງພັກ, ພາຍໃນພັກມີຄວາມສະຫງົບ, ຄວາມສາມັກຄີເປັນປຶກແຜ່ນແໜ້ນໜາ, ຮັກສາໄດ້ຄວາມໜັກແໜ້ນທາງດ້ານຄຸນທາດການເມືອງ, ​ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນບັນດາເຜົ່າ, ວຽກງານກໍ່ສ້າງພັກ, ພະນັກງານ, ນະໂຍບາຍ, ອົງການຈັດຕັ້ງມະຫາຊົນ, ໄດ້ຮັບການຈັດຕັ້ງຍ້ອງຍໍ ແລະ ໄດ້ຮັບການຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ 3 ສະໄໝຕິດຕໍ່ກັນ, ຂະຫຍາຍສະມາຊິກພັກແມ່ນຖືເອົາຄຸນນະພາບເປັນສຳຄັນ, ແທດເໝາະກັບຄວາມເປັນຈິງ, ວຽກງານຜະລິດແກ້ໄຂຊີວິດການເປັນຢູ່ ແລະ ຜະລິດສ້າງລາຍຮັບ, ໂດຍສະເພາະແມ່ນການຜະລິດເສັ້ນເຝີ, ເຂົ້າຊອຍ, ເຂົ້າປຽກຊຽງຂວາງ ແລະ ເສັ້ນ​ໝີ່ເຫຼືອງອອກຈຳໜ່າຍສູ່ສັງຄົມທົ່ວໄປ, ໃນຊຸມປີຜ່ານມາແມ່ນສາມາດຜະລິດໄດ້ຕາມແຜນການທີ່ຂັ້ນເທິງກໍານົດໃຫ້, ຜະລິດເສັ້ນເຝີໄດ້ທັງໝົດ 76.860 ກິໂລ, ເຂົ້າຊອຍ 5.160 ກິໂລ, ເຂົ້າປຽກ 6.780 ກິໂລ, ການຫາລາຍໄດ້ຈາກອົງການຈັດຕັ້ງມະຫາຊົນຊາວໜຸ່ມ-ແມ່ຍິງ ແລະ ກຳມະບານ, ຈຳນວນເງິນ 38.750.000 ກີບ, ຄິດສະເລ່ຍໃສ່ຫົວຄົນຜູ້ໜຶ່ງແມ່ນ 2.156.000 ກີບຕໍ່ຄົນຕໍ່ປີໄດ້ຕາມແຜນການທີ່ກຳນົດໄວ້.

ກອງປະຊຸມຄັ້ງ​ນີ້ ຍັງໄດ້ປະກອບຄໍາຄິດຄໍາເຫັນໃສ່ບົດລາຍງານການເມືອງຢ່າງກົງໄປກົງມາ ແລະ ເອກະພາບຕໍ່ທິດທາງແຜນການນໍາພາຂອງໜ່ວຍພັກແຕ່ນີ້ຮອດປີ 2028, ຈາກນັ້ນໄດ້ປ່ອນບັດຄັດເລືອກເອົາຄະນະໜ່ວຍໂຮງງານຜະລິດເຂົ້າແຫ້ງຊຸດໃໝ່ ຊຶ່ງເລືອກເອົາ ພັນຕີ ບຸນຜັນ ທໍາມະວົງ ເປັນເລຂາໜ່ວຍພັກ, ພັນຕີ ຫຼ້າຊ້ອຍ ພັນທະລາ ເປັນຮອງເລຂາ, ພັນຕີ ອຸລາ ທໍາມະວົງ, ພັນຕີ ວັນນາ ວົງສັກດາ ແລະ ພັນຕີ ວຽງສະໄໝ ອຸດທະລັງສີ ເປັນກໍາມະການ.

ໂອກາດນີ້, ສະຫາຍ ພົນຈັດຕະວາ ວົງສັກ ສີພັນດອນ ໄດ້ໂອ້ລົມ ​ໂດຍ​ໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່, ພະນັກງານ-ສະມາຊິກພັກທຸກສະຫາຍ, ຈົ່ງເອົາໃຈໃສ່ຖືເປັນສໍາຄັນຕໍ່ວຽກງານສຶກສາອົບຮົມການເມືອງ-ນໍາພາແນວຄິດໃຫ້ເປັນກົກ, ເຊື່ອມຊຶມ, ກຳແໜ້ນແນວທາງນະໂຍບາຍຂອງພັກ, ປະຕິບັດມະຕິ, ຄຳສັ່ງຂອງຂັ້ນເທິງຢ່າງເຂັ້ມງວດ, ຫັນເອົາມະຕິກອງປະຊຸມໃຫຍ່ໃນຄັ້ງນີ້ ຕິດແທດກັບແຜນງານ, ໂຄງການອັນລະອຽດຂອງກົມກອງ, ເຊີດ​ຊູ​ນໍ້າໃຈຄວາມ​ຮັບຜິດຊອບ​ຂອງ​ຄະນະໜ່ວຍພັກ ດ້ວຍ​ຈິດ​ໃຈ​ບຸກທະລຸ​ເຂົ້າ​ໃສ່​ວຽກງານ​ທີ່​ຕົນ​ຮັບຜິດຊອບ​ໃຫ້​ມີ​ການ​ຫັນປ່ຽນຢ່າງ​ຈະ​ແຈ້ງ, ​ເດັດດ່ຽວ​ແກ້​ໄຂ​ແນວ​ຄິດ​ຄອງ​​ເດີມ, ຂີ້ຄ້ານ​ມັກ​ງ່າຍ, ​ເອື່ອຍ​ອີງ, ຂາດ​ຄວາມ​ປັນ​ເຈົ້າ​ຕົນ​ເອງ, ເພີ່ມທະວີຄວາມເປັນເອກະພາບພາຍໃນພັກ, ປະຕິບັດຫຼັກການລວມສູນປະຊາທິປະໄຕ, ເຮັດວຽກງານເປັນໝູ່ຄະນະ, ແບ່ງວຽກງານໃຫ້ບຸກຄົນຮັບຜິດຊອບຈະແຈ້ງ, ຕິດຕາມກວດກາຊຸກຍູ້ ແລະ ສະຫຼຸບຖອດຖອນບົດຮຽນ ເພື່ອສົ່ງເສີມດ້ານຕັ້ງໜ້າ, ແກ້ໄຂສິ່ງຫຍໍ້ທໍ້ໃຫ້ທັນການ, ເອົາໃຈໃສ່ປະຕິບັດລະບອບດຳເນີນຊີວິດກາເມືອງພາຍໃນພັກໃຫ້ເປັນປົກກະຕິ, ​ເສີມ​ຂະຫຍາຍ​ທ່າ​ແຮງ​ບົ່ມຊ້ອນ​ຂອງ​ກົມ​ກອງ ໃນ​ການ​ສ້າງ​ເສດຖະກິດ​ແກ້​ໄຂ​ຊິວິດ​ການ​​ເປັນຢູ່ຕາມ​ທິດນໍາ​ ເພິ່​ງຕົນ​ເອງ, ກຸ້ມ​ຕົນ​ເອງ ​ແລະ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງໃຫ້ດີຂຶ້ນເທື່ອລະກ້າວ.

ຂ່າວ: ກົມໃຫຍ່ພະລາທິການ