ເອ​ກະ​ສານກອງ​ປະ​ຊຸມ​ໃຫຍ່ ຄັ້ງ​ທີ 6 ຂອງ​ພັກ​ປະ​ຊາ​ຊົນ​ປະ​ຕິ​ວັດ​ລາວ

ຂຽນ​ໂດຍ: ໂຮງ​ພິມ​ແຫ່ງ​ລັດ, ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ

ໃນທ່າມກາງບັນຍາກາດ ທີ່ທົ່ວພັກ ທົ່ວປວງຊົນເຮົາຊື່ນຊົມເບີກບານຕໍ່ຜົນສໍາເລັດ ອັນສໍາຄັນໃນຫລາຍດ້ານ ທີ່ບັນລຸໄດ້ໃນການດໍາເນີນ ພາລະກິດປ່ຽນແປງໃຫມ່, ມື້ນີ້ກອງ ປະຊຸມໃຫຍ່ຄັ້ງທີ VI ຂອງພັກປະຊາຊົນປະຕິວັດລາວ ໄດ້ໄຂຂຶ້ນຢ່າງສະຫງ່າຜ່າເຜີຍ !

ໃນນາມຄະນະບໍລິຫານງານສູນກາງພັກ ແລະ ຄະນະປະທານ ກອງປະຊຸມໃຫຍ່, ຂ້າພະເຈົ້າ ຂໍສະແດງຄວາມຄໍານັບຊົມເຊີຍອັນອົບອຸ່ນ ບັນດາສະຫາຍຜູ່ແທນ ເຊິ່ງເປັນຕົວ ແທນ ໃຫ້ແກ່ສະມາຊິກພັກ ໃນທົ່ວປະເທດກວ່າ 78.000 ສະຫາຍ ຢ່າງສຸດອົກສຸດໃຈ ! ຂໍນະມັດສະການ ພະເຖລານຸເຖລະ ແລະຂໍສະແດງຄວາມຄໍານັບຊົມເຊີຍ ບັນດາສະຫາຍ ພະນັກງານ ສະມາຊິກພັກອາວຸໂສ ແລະແຂກພາຍໃນປະເທດ ທີ່ໄດ້ມາຮ່ວມ ກອງປະຊຸມ ໃຫຍ່ຂອງພວກເຮົາໃນຄັ້ງນີ້ ຢ່າງສຸດອົກສຸດໃຈ !